الموضوع: بأنهي أمارة سعر السيفيك الجيل التاسع؟!!

السلام عليكم جميعا,
بقالي فترة بعيد عن متابعة سوق السيارات ولكني فوجيئت بسعر السيفيك الجيل الجديد (التاسع) إنها نازلة ب 198,500 وال VTi ب 215,000 ..... سؤال كدة هو إيه إللي زاد في الجيل التاسع مقارنة بالثامن يرفع ثمن ال VTi من 178,000 ل 215,000 وال LXi من 150,000 ل 198,500؟؟؟؟
أنا بجد مش فاهم وأكيد مش فرق سعر الدولار .... ولو فرق سعر الدولار يبقى مش طبيعي سعر المستعمل يكون آخره 125,000 لل LXi و 140,000 لل VTI
نفس الموتور والجيربوكس .... إيه بقى؟!!
ياريت إللي متابع وفاهم يفهمني

المشاركة الأصلية كتبت بواسطة SAMEH_FOUAD

احمد باشا , طبعا اللى يقولك ان مافيش فرق مابين السيفيك الجيل الثامن والتاسع , يبقى ماركبش الاتنين , ودة الفرق مابين الاتنين عن طريق تجربة السياراتين

1- المحرك , انت شايف انة نفس كل حاجة بس فى الواقع المحرك بتاع الجيل الثامن اسرع من الجيل الثامن بفرق 0.5 ثانية , ونقلات الفتيس سلسة جداا عن الجيل الثامن اية التغير اللى حصل ( سوفت جديد عالج مشاكل القديم )

2- الثبات : نظام vsa اصبح ثابت فى الفئتين يعنى lxi - vti اصبح فيها vsa دة طبعا نظام مهم جداا وخطوة جامدة جدا ان الهوندا تعملة standard فى كل سياراتها بعكس الجيل الثامن اللى كان مقتصر على ال vti فقط

3- eco mode : اصبح نظام الوضع الاقتصادى موجود فى المحرك , فطبعا بيديك اقتصاد حقيقى فى الوقود ومش كلام وخلاص او زرار موجود وخلاص زى بقية المنافسين , دة ماكنش موجود فى الجيل الثامن

4- شاشة المعلومات : كل اللى اقدر اقولة انها شاشة رائعة وممتازة وبجد فيها اوبشن كتييييييييييييييييييييير جداا , يقل حاجات بسيطة جدا عن الموجود فى السيارات الالمانية , طبعا هو نازل باتنين اوبشن واحد لل lxi واوبشن اكتر منة فى ال vti بس الاتنين ممتازين جدااااااااااا

5- السيارة عليت عن الارض + سقفها على من الخلف + عفشتها اصبحت انعم + العزل افضل بفرق واضح + اوسع فى الامام والخلف ووضعية القيادة نفسها اصبحت اعلى

6- ميزة جامدة جدا ( ان السيارة عالجت كل عيوب الصناعة اللى كانت موجودة فى الجيل الثامن

( علبة الدركسيون - البطاحات - الطنابير- قواعد محرك ) كل دة اصبح غير موجود تماما فى الجيل التاسع

7- العدادات بقت اوضح افضل رؤية

8- الفرامل بقت افضل بفرق ملحوظ

10- الاوبشن زاد شوية وفية حاجات اتشالت زى مثلا ال paddle shift فى ال vti اتشال وهو دة العيب الوحيد اللى فيها + ان الخامات كلها بقت بلاستيك بس من نوع نظيف , وانت بردة لو شوفت الجيل الثامن هتلاقى ان اصلا مش كل التابلوة كان جلد فمش فارقة كتير , بس اللى يهمك التقفيل والخامة

كل دة ومش عايز الفرق يزيد , دية كدة اصبحت صفقة رابحة لكل اللى عايز يشترى سيارة ويشترى دماغة معاها

وماتقليش سعر السيفيك غالى لية عن الجيل الثامن , اللى يشترى سيراتو والنترا ب 180-200 الف يبقى السيفيك المفروض يكون سعرها كدة طبيعى جدااااااااااااا

ياراجل دة ال rb والريو بقوا ب 150 الف جنية

هاخد من كلامك الاخير واقولك ان مشكلتنا مش السيفيك بس... المشكلة ان الوكلاء عندنا بيزودوا بمزاجهم طالما البضاعة مطلوبة ومضمون زبونها... هي السيفيك مازادتش علشان الupgrade اللي حضرتك فصلته فوق... لا هي زادت بس علشان الجيل التامن كسر الدنيا والناس بتحلف بيه فالطبيعي ان الناس دي هتتسابق على شراء الجيل الجديد... بس كدة... والا بقى لو السيفيك الجيل العاشر ان شاء الله نزل بدفع رباعي مثلا وشوية اوبشنز زيادة يبقى يقوموا منزلينها ب300 الف مثلا؟؟؟؟

زي ما بقول لحضرتك كل موديل من شركة معينة يبيقى ليه رينج سعر معين لا يزيد عن الشكل اللي قبله الا في حدود تكاد لا تذكر لانه ببساطة مينفعش يدخل في شريحة الفئات الاعلى منه...

بمعنى تاني... في امريكا هتلاقي السيفيك والكورولا والشارك والمازدا3 والفوكاس بينزلوا باسعار تكاد تكون متطابقة لانهم فئة واحدة بمعنى انهم موجهين لشريحة واحدة من الزباين... تطلع بالسعر شوية -وبنفس النسب تقريبا- تلاقي نفس الشركات بتتنافس بالاكورد والكامري والجالانت والمازدا6 والمونديو على الترتيب... وهكذا في السوبارو مثلا تلاقي الامبريزا داخلة مع السيفيك ونظيراتها في حين الباقي يدخل معاهم الليجاسي... انما مينفعش الامبريزا تنزل السنة الجاية بسعر الليجاسي والليجاسي يقوم سعرها ينط للفئة الاعلى وكدة... ده بيحصل في مصر فقط لا غير...

فاعتراضي مش على السيفيك لانها عربية محترمة جدا جدا... انا بقول ان الوكلاء عندنا بيستعبطوا -حرفيا- تبعا لاتجاه السوق فتلاقي السيفيك والكورولا عدوا ال200 الف في حين ان الشارك والمازدا اخرهم ال170 ببساطة لان دول سوقهم ماشي ودول فاشلين تسويقيا.... في حين كلهم برة مصر سعرهم واحد!!!!! في نفس الوقت تلاقي ان الامبريزا -اللي سعرها برة اعلى نسبيا من كل دول- بتنزل هنا ب185 يعني ارخص من السيفيك ب30 ألف!!!!!!!!!

انت تعرف ان الكورولا الجديدة في السعودية ب62 الف ريال؟؟؟ طيب تعرف ان الشكل اللي فات كان بينزل ب60 الف؟؟؟؟ ليه بقى محدش قال انها السنة عربية مختلفة تماما واوسع وقاعدة عجلات اطول واوبشنز رهيبة وبارك اسيست وليدات ونظم ثبات وووو وقاموا مخليينها ب90 الف ريال مثلا؟؟؟؟؟؟

وعلى فكرة اول فئة في السعودية فيها 8 ايرباج!!!! يعني احسن من اعلى فئة عندك واللي ب210 تقريبا!!!!!!!!!!

انه الهوان!!