استفسار بخصوص ابعاد الكورولا (انا طويل) و مصاريفها

**ahmedtalat** · 29-12-2012 10:53 PM

السلام عليكم يا اهل المنتدى الكرام

انا عندى ثلاثه اسئله :
الأول :
انا رجل طويل الى حد ما (185) سم و عريض (مقاسات بتاعه زمان ) و بحب ارجع كرسى السائق الى الوراء قليلا -يا ترى اللى ورايا حيعرف يقعد و لا ايه النظام
انا بفكر اشترى كورولا 2013 و عاوز اعرف يا ترى ابعاد العربيه حلوه فى الركوب و لا ايه؟
انا بركب اساسا فيات 132

الثانى :
بألنسبه لمصاريف التشغيل ايه الأخبار ؟؟ يا ترى حكع دم قلبى و لا ايه؟؟

الثالث :
بألنسبه للثبات ايهه الأخبار ؟؟
انا معايا فيات المانى ثابته جدا و تقيله و راسخه رسوخ الجبال - يا ترى الكورولا نظامها ايه فى الثبات ؟؟؟

افيدونى افادكم الله بألتفصيل الممل

**S O P H O S** · 31-12-2012 03:13 AM

اولا اهلا بحضرتك فالقسم ,,

اما عن السؤال الاول - فالكورولا عربية واسعة واعتقد هتبقي مريحة
وابعاد العربية لحضرتك بالتقريب اهي :
قاعدة العجلات : 2598 مم
الطول : 4540 مم
العرض : 1750 مم
الارتفاع : 1465 مم
الوزن -- > 1220 كجم

ف ان شاء الله مفيش مشكلة من مساحة العربية الداخلية وافضل شئ تركبها بنفسك وتجرب فأي معرض

-------------------

السؤال التاني -
فالطبع الكورولا كمصاريف العربية اعلي من الفيات القديم ولكن عربية زيرو مصاريف هتكون قليلة لسنتين او ثلاثة او اكثر حسب الاستخدام قطغ الغيار ليست بالرخيصة ولا المرتفعة ولكن تقدر تقول بعد المتوسطة بعض الشئ
ومسألة نسبية من قطعة للاخري ولكن كعربية اعتمادية قطع غيار بتتغير كل 100 الف كيلو او 60 الف كيلو
وقطع معقولة وان شاء الله متحسش بتعب من النقطة دي مع ملاحظة انها عربية فئة مرتفعة يعني
ف قطع غيار هيدفع فيها فلوس بعكس ال 132 ..

---------------------

السؤال الثالث -
بالنسبة للثبات فالشكل الجديد من الكورولا اكثر ثبات من الشكل القديم طبعا حضرتك شايف ان الثبات فتقل وزن العربية
بس انا شايف عكس كده الثبات مش وزن العربية الثبات عوامل الامان وتوزيع الفرامل يعني فمنحني ايه القدرة علي السيطرة علي العربية مع الفرامل ال 132 مش هتكون زي الكورولا كوسائل امان وانظمة مكابح ..

---------------------------

فالنهاية اختيار موفق واتمني تستخير ربنا
هي عربية اعتمادية للغاية وهواية للي بيركب ياباني وتويوتا بالتحديد
وشوف حضرتك العربية فأي معرض هتفرق كتير مع حضرتك
واتمني التوفيق ليك ان شاء الله
واي سؤال اتفـضـل
تحياتــي ..

**AlGazar2** · 31-12-2012 04:05 AM

بص يا باشا لو الى يهمك الثبات و مصاريف التشغيل بتاعت العربيه اكتر من اعاده بيعها توكل على الله و هات سوبارو عربيه دفع رباعى و موتور كويس و ابشن حلوه و كل وسائل الثبات و الامان فى العربيه دى
اول فئه ب 150 الف و الكاملة ب 160 الف و الاسبيشيال ب 180 الف

**ahmed1981** · 31-12-2012 05:17 AM

بالنسبة للحجم
أنا بنفس طولك وحجمك تقريباً
وكان معايا الكورولا 2010 وعامل بيها 40000 كيلومتر
الكرسي قعدته مرتاحة
لكن اللي قاعد خلفك هيبقى مزنوق شوية
-
-
المصاريف
كل اللي غيرته في العربية خلال تلك الفترة
تيل فرامل كل 20000 كيلومتر تقريباً
سير الموتور كل 40000 كيلومتر
-
-
الثبات
في الطوالي ثابتة لغاية 160
أنا مجربها لغاية 200 كيلومتر/ساعة
لكن بعد ال 160 بتبقى على أعصابك

الثبات في المنحنيات ضياع الضياع
أظن لأن العربية طويلة شوية
يمكن
لكن لو خدت ملف جامد هتحدف منك من الخلف
-
-
إستخير ربنا
وشوفها في المعارض
وبالمرة بص على
ألنترا
فلوانس
-
-

**Dr. Elsaadani** · 07-01-2013 11:10 AM

المشاركة الأصلية كتبت بواسطة algazar2

بص يا باشا لو الى يهمك الثبات و مصاريف التشغيل بتاعت العربيه اكتر من اعاده بيعها توكل على الله و هات سوبارو عربيه دفع رباعى و موتور كويس و ابشن حلوه و كل وسائل الثبات و الامان فى العربيه دى
اول فئه ب 150 الف و الكاملة ب 160 الف و الاسبيشيال ب 180 الف

طول 185 سم مش حيعرف يقعد فى السوبارو ، حاولت قبل كده

**Dr. Elsaadani** · 07-01-2013 11:12 AM

اتكل على الله ومش حتندم ، كورولا جميلة فى كل حاجة

**S O P H O S** · 08-01-2013 11:43 PM

فأنتظار صاحب الموضوع
ونطمن قرر ايه ..؟

**ahmedtalat** · 15-01-2013 11:19 PM

انا بفكر بجديه - بس الدولار غلى

و قرات على النت ان كورولا حتغير الشكل فى 2014

**Y a r i s** · 16-01-2013 12:57 AM

وهو حضرتك فاكر ان شكل ٢٠١٤. هينزل بنفس السعر
الحق نفسك يابشمهندس واحجزلك واحد دلوقتي من الشكل بتاع ٢٠١٣ لان حتى الشكل ده هيغلى قريب وهتبتدي المعارض تخزنوا ... عارف ليه لان في عادة تويوتا كل ما تنزل شكل جديد الناس متكنش متقبلاه في البداية ... على الاقل سنتين تلاته ويقولوا ياااااه الله يرحم الشكل بتاع زمان كان تحفة وسعروا كان معقول وعضمو جامد

لذلك الحق واحجز كل شهر العربيات بتغلى والاسعار بتبقى مولعة نار والجنية قيمتو بتقل. وتنهار ... وهتلاقي الفلوس الي معاك دلوقتي الي ممكن تجيب بيها جديد. متجيبش بكرة حتى عربية مستعملة. وتاريخ التويوتا كورولا في مصر بيدل على ذلك

وهتلاقيها نقلة نوعية وفرق فرق فرق بين التويوتا وبين الفايت. بل لا يمكن المقارنة بينهم في الثبات والتوفير والمتعة والوسع بس كمان في مقابل الفرق ده مفيش قطع غيار ب ١٠ جنية او ٦٠ جنية والكلام دهو غير فلتر الزيت :)
كل حاجة وليها سعرها وتحياتي :)