الموضوع: كومبريسور تكييف البى واى دى f3

السادة الأفاضل جميعا
السلام عليكم ..
إليكم أخر التطورات

نزلت الحرفيين دورت على الكومبريسور سواء بتاع الشركة أو بتاع اللانسر اللى بيركب فى البى واى دى ..
أقل مايقال عن الحرفيين إنهم فعلا حرفيين بس فى النصب ..
لقيت الكومبريسور الصغير وسعره الف وأربعمائة جنيه .. والكبير ألف وستمائة .. قلت له مش معقول تكون أغلى من التوكيل .. أروح أجيبه من التوكيل أحسن .. قال لى خلاص أسيب لك فيه 200 جنيه .. على طول تعرف اللى يسيب مبلغ زى ده مرة واحدة يبقى نصاب ... سيبته وقلت أسأل على الإستيراد من باب العلم بالشئ .. لقيته ب 600 جنيه بعد الفصال والمناهدة ووجع القلب وضمانه 3 دقايق بالكثير .. يادوب تجربه ..

رحت لمحل السحار اللى قال عليه الأخ وليد وسألته إيه اللى عنده ممكن يركب فى العربية ..
قال لى مفيش حاجة زى اللى عندك بالظبط وأى تركيب لكومبريسور مخالف هتعدل فى العربية ..
قلت له مش مشكلة .. تعديل يتعديل أعدل عندك ولا أعدلش عند شركة "اليأس" وخصوصا إن الكومبريسورات اللى عنده ماركة ساندن .. فيه منها صينى ب 800 جنيه .. سنغافورى ب 1000 جنيه ويابانى ب 1200 جنيه ..
قلت له خلاص نركب أبو 1200 علشان أخلص من فيلم الكومبريسور ده .. قال لى خلاص روح هات السربنتينة وتيجى هابعتك للخراط يعمل قواعد للكومبريسور الجديد وبعد كده نغير المواسير ..
قلت له ماشى ..
الصراحة كنت متضايق جدا من الحل ده بسبب التعديل بالذات .. ومتنرفز أخر نرفزة .. عربية 2011 وأعدل فيها .. زى ما يكون راكب زاستافا مثلا .. الشئ الوحيد المهون على الموضوع هو إن الكومبريسور الجديد يابانى ..

المهم نزلت شارع دمشق وسألت ألاقى حاجة البى واى دى فين علشان أشترى السربنتينة .. كله قال لى على محل زكى جرجس .. دورت عليه لحد ما رحته له .. سألته على السربنيتنة لقيتها أصلى ب 375 وتقليد ب 310 .. أخدت الأصلى طبعا .. وأخدت فلتر تكييف ب 20 جنيه .. قلت بالمرة أسأل على الكومبريسور يمكن ألاقيه عنده رغم إنى إلى حد ما خايف من الكومبريسور الصينى .. وبالفعل لقيته عنده .. سألته بكام قال لى ب 950 جنيه وعلى فكره هو فى التوكيل ب 815 غير الضريبة .. قلت له أغلى من التوكيل إزاى .. طلع فاهم الفولة وقال لى الموجود فى التوكيل الكبير والصغير مش موجود عنده .. حسيت إن شركة اليأس" بتباصينا بالقصد لمحلات الإكسسورات ... المهم وجود التكييف الأصلى بتاع العربية خلانى أعيد التفكير تانى بالذات بسبب التعديل اللى مطير برج من نافوخى .. المهم فاصلت معاه نزل فى الكومبريسور 50 وفى السربتينة 25 ... فاصلت تانى أخدت الفلتر هدية وفى الأخر دفعت فى كل ا للى أنا أخدته 1250 بدل ما أدفع 1345 جنيه

رجعت على محل السحار إشتغلوا فى العربية ونضفوا الدورة وفكوا القديم وركبوا الجديد وتم الشحن وتم إختبار العربية .. وبعد الإختبار وجدت الأتى ..

دلوقت بس عرفت الناس بتقول على التكييف حلو ليه فى العربية .. التكييف فعلا حلو وساقعة على درجة 2 ..

صوت الكومبريسور الجديد أكد لى بما لا يدع مجال للشك إن الكومبريسور القديم واخده أصلا فى العربية وهو فيه مشكلة يا شركة "اليأس" ربنا ينتقم منكم .. لما كنت بأشغل الكومبريسور القديم ومن أول ما إستلمت العربية كان فيه زى زنة كده .. كنت فاكرها طبيعية وكان عندى حسن ظن برضه فى البهوات بتوع التوكيل إنهم ..

دفعت 300 جنيه عند السحار غير الإكرامية .. وهاروح له بعد إسبوع يختبر تانى ..

شئ أخير .. العربية سحبها قل شوية مع التكييف وإتكتفت شوية .. وده ماكنش موجود مع الكومبريسور القديم .. تفتكروا ده طبيعى مع كومبريسور جديد ويعمل بكفاءة ..

أخيرا .. سؤال تانى لشركة "اليأس" .. الكومبريسور الجديد دورت عليه على النت ولقيت سعره للناس اللى زى حالاتنا من 75-85 دولا بحد أدنى 10 قطع يعنى معاك ممكن تجيبه أرخص أكيد .. ممكن أعرف هو عشر قطع هيضلعوا سعادتكم لما تستوردهم بدل ما تدبسوا الناس فى كومبريسور أكبر وتعملوا تعديل فى العربية ..؟؟ هل المراد هو تصريف بضاعة عندكم على حساب الزبون ..؟؟ ,اخيرا .. أول مرة فى حياتى أشوف قطعة غيار أصلية مش موجودة فى التوكيل وتبقى موجودة عند محل قطع غيار ..

شكرا لكم وأرجو إن تكونوا إستفدتم من تجربتى .. تجربة تكشف عن الوجه القبيح لتوكيل يريد أن يستنزف عملاءه بشكل أقرب إلى النصب منه إلى الحرفية

والسلام عليكم