تجربتي مع - شيفرولية تاهو موديل 1996

**faithiologi** · 09-11-2013 11:57 AM

في البدايه كنت ابحث عن سياره تستحمل شوارع مصر و تكون حلوه و مريحة
بصراحة ... دا كان هدفي بس ...
حاولت اسأل عن الجي أم سي لكن مكانش في معلومات كتير عنها في السايت هنا
و خصوصا اني كنت عايز معلومات من حد جربها
عشان كده انا الان اكتب مشاركتي عن تجربتها يمكن حد يستفيد منها
بدأت طبعا مع الشيروكي
و قعدت اسأل عنها و اركبها و اسأل عن قطع الغيار و الذي منه
لكن في الأخر معجبتنيش نهائي
و بالصدفه اتعرفت على السيارات الأمريكاني عن طريق احد الاصدقاء
دورت على الجي أم سي
لكن جه قدامي التاهو في نهاية البحث
---------------------------------
السياره شيفرولية تاهو
موديل 1996
سعة الموتور 5700 سي سي 8 سلندر
من الداخل بها كنبه واحده في الخلف و 2 كريس امامي
الشاسيه بتاعها اقصر من السب إربان او السوبربان زي ما البعض بيسميها
---------------------------------
ربنا كرمني بواحد محترم في كل شئ اشتريتها منه
بعد ما جربتها و اتوهمت بالإرتفاع و القوه اللي في العربية
تخيلوا ان العربيه فيها مثبت سرعه و أيه بي أس و هي إنتاج 1996
ركوبة روعه من الداخل - واسعة - قابلة للتحكم فيها بسهوله
العربية كانت كبيرة عليا في الاول لكن مع الوقت بدأت اخد غرز و مناورات على الطريق موش زي العربيات الصغيره طبعا لكن ... نوعا ما كان تطور لي في سواقتها

قطع الغيار
---------------------------------
- موجوده عند حموده - خلف دار القضاء العالي
- عبد اللطيف - شارع شامبليون
- نجيبكو - خلف مقار اللي عند كوبري الخشب في نهاية شارع التحرير بالدقي - في الشارع كنيسة ... هو بعدها بعمارتين
- صابر - على الدائري في أتجاه طريق مصر اسكندرية الزراعي - مكان اسمه أم بيومي - عند إعلان جبنه عبورلاند
- طبعا فوزي الخواجه - شارع فيصل بعد بنزينة التعاون و كاببجي الفقير - لكنه أسوأ شخصية ممكن أتعامل معاها سواء في التسعير أو على المستوى الإنساني
- سمير الأمريكاني - شارع فيصل قبل كلية التربيه الرياضية و انت جاي من الجيزه على أيدك اليمين

- الشوباسي - دمنهور غالبا قطع غيار جديد و ممكن استيراد
- الحاج جمال الشاعر - دمنهور من على الطريق الزراعي من خارج البلد- راجل محترم جدا - كله استيراد
- أشرف - إدكو - مجربتوش خالص لسه

مميزاتها
---------------------------------
- واسعة من الداخل و رحبه جدا
- مميزات الرفاهيه الامريكاني ... الكراسي الكهربا و المرايات التحكم من الداخل و مثبت السرعه و التكييف التلاجه.
- قوة الموتور و عزمه الشديد
- قوة نظام التعليق - المساعدين و اليايات او ورق السوست
- طبعا الفور باي فور
- قطع الغيار الرخيصه و المعمرة ... و لو اني ما احتجتش اغير غير مساعدين و تيل فرامل و طنابير و مناول دركسيون و شوية جلب - بخلاف لو احتجت تغير الأوتوماتيك (الفيتيس) .. مثلا عرفت ان الموتور الإستيراد ب 4000 ج
- أثناء السواقه الناس اللي حواليك بتعملك ألف حساب ... أشاره يمين يعني انا جاي يمين كله يخلي باله ... و مايحاولش يجري و يسبق و يكسر عليك و الأخلاق المصريه دي في السواقه!!!

عيوبها
---------------------------------
- مكان للركن ... صعب شويه لكني بتعامل مع سايس عند المكتب بيتصرف ... ممكن ياخد 20 جنيه زياده في الشهر مثلا
- البنزين و إستهلاكه 120 في الصفيحه بدون تشغيل التكييف - و لو انها زي غيرها في نفس الفئه
- اقل في امكانية المناوره لكبر الحجم
- لو لا قدر الله احتاجت لتغيير زجاج لها .... هتدور عليه كتير ... لكن البودي غالبا موجود إستيراد و رخيص ... انا مثلا غيرت رفرف و شبكة اماميه ب 800ج و فانوس امامي 100ج و دي اسعار غاليه ... بعدين عرفت كده يعني كان ممكن اجيبهم ارخص شويه
- التعامل مع الصنايعيه غير الدوريين بيعتبروك لقطه و زكيبة فلوس لأن شكلها فخم شويتين
- مغرية بالجري و السرعة و ده كله على حساب البنزين
- قليله الحظ في البيع ... او انا موش ببذل مجهود فيه ... موش عارف ... يمكن مستخسرها و بقول بكره تفرج ... بس اللي يحب يشتري عربيه زي دي يفهم انه لو اتزنق في فلوس موش هيعرف يبيعها تاني يوم

في الاخر احب اقول انه بالنسبة لي انها عربية لا تباع ... لأنها لاتعوض ... عائليه ... ممكن تعتمد عليها أوف رود و جوه البلد
عربية ممتازه لي في كل شيئ
أتمنى أن أكون أفدتكم بكلامي ده و لو حد عنده سؤال ما يترددش
و شكراً لكم

**Gelgel2004** · 09-11-2013 12:13 PM

مشكور و ربنا يكفيك شرها

**hugan** · 09-11-2013 12:50 PM

تقرير ممتاز
ولو صور يبقي تمام
بس 8سلندر و5700سي سي
في مصر شيء صعب

**hugan** · 09-11-2013 12:53 PM

تاهو (بالإنجليزية: Tahoe) مركبة دفع رباعي من شيفروليه التابعة لشركة جنرال موتورز الأمريكية. وهي مركبة جبارة تحتوي على محرك سعة 5.3 لتر من ثمان إسطوانات بقوة 355 حصان ومحرك آخر سعته 6.2 لتر أيضاً من ثماني اسطوانات، وقد قامت الشركة بإجراء تغيير كامل للمركبة في سنة 2007ممن حيث الشكل والقاعدة كما أضافت للمركبة النظام الفعال للتوفير من استهلاك الوقود (AFM) حيث يقوم هذا النظام بفصل أربع اسطوانات عن العمل وذلك عند ثبات السرعة أو التسارع بشكل بطيء، وقد تفوق تصميمها الجديد عل معظم مركبات الدفع الرباعي وخصوصا إنفنتي كيو إكس 56 التي يراها.

التاهو هي بحيرة مياهها عذبة تقع في الولايات المتحدة الأمريكية في جبال سييرا نيفادا بالولايات المتحدة. تقع على طول الحدود بين ولاية كاليفورنيا ونيفادا وهي ثاني أعمق بحيرة في الولايات المتحدة وقد سمت شركة جنرال موتورز مركبتها نسبةً إلى هذه البحيرة

حصلت شيفروليه تاهو على العديد من الجوائز العالمية على جميع المستويات والأصعدة مما جعلها واحدة من أفضل سيارات الدفع الرباعي في العالم ومنها :
جائزة أجمل سيارة في العالم قابلة للتعديل والتطوير في شكلها للعام 2007م
جائزة أفضل سيارة للدفع الرباعي للعام 2007م

**MaZaGAngeE** · 09-11-2013 03:37 PM

المشاركة الأصلية كتبت بواسطة faithiologi

شكرا لكل من اهتم و علق على مشاركتي البسيطه ... من الأعضاء القدامي المخضرمين او الجدد
أما عن الصور فبصراحة موش عارف ازاي
تصحيح بسيط للأخ hugan - التاهو السعة اللتريه لها 5.7 و ليست 5.3 و الموتور العالي منها 6.x هو موتور الديزل منها
و عن موضوع الغاز فعلا انا فكرت فيه و هنفذه قريبا إن شاء الله

التاهو نزل ليها مواتير كتير منها المواتير اللي انت كاتبهم و غيرهم و كمان منها موديلات خاصة للبوليس الامريكي و هتلاقي كل التفاصيل في صفحة العربية على ويكيبيديا ..

طمني اول ما تعمل حوار الغاز عشان قدامي عربية كابريس هموت عليها بس خايف من استهلاكها للبنزين ال 90 دي هتعوزلها بتاع 100 جنيه كل يوم على مشاويري .. بس لو غاز هتبقى الدنيا لوز و لو ال80 متوفر كنت جيبتها ..

**faithiologi** · 09-11-2013 05:22 PM

الراجل اللي اشتريت منه العربيه كان عنده اختها بابين و نفس الموتور موديل 94 و كان مركبلها غاز و بيقولي 100% و زي الفل
مشكلة الغاز زي ما شرحهالي احد مهندسين الميكانيكا كالأتي
البنزين اللي بنستعمله فيه نسبة رصاص و دي بتفضل في جدار الموتور و غالبا بتمنع تأكله من جراء احتكاك الحديد في بعضه
و ده غير موجود في الغاز بالتالي بيأثر على عمر الموتور لكن مع الإستخدام البسيط للبنزين من وقت لأخر ممكن يطول عمر الموتور شويه
و الحرق بتاع البنزين اسرع من الغاز عشان كده العربية بتنطلق و تبقى اسرع - و زي ما حضراتكم شايفين شوارع مصر فاضيه و تساعد على الإنطلاق
فمن تجربة الأخ اللي اشتريت منه العربية بيقولي كويسه بالغاز و موش فارقه كتير لكنها بتوفر مع تشغيل التكييف و الزحمه و الجو القاهرى في القياده ده
و الموتور ال8 سلندر 5700 بيعمل في الانبوبه ال90 نفس اللي بتعمله الصفيحه من كيلومترات يعني تقريبا 100-120 كم
بس اهم حاجه تكون العربيه مظبوطه تماما كبنزين و موش هيبقى في مشاكل مع الغاز بعد تركيبه

و ربنا يوفق الجميع