الموضوع: ..:: التقرير المصور الشامل لأرتفاع تويوتا كورولا 2014 ::..

بسم الله الرحمن الرحيم

في البداية احب ابارك للناس اللي استلموا و عقبال اللي حاجر و ربنا يصبر اللي لسه مستلمش و اللي مستنى ورق العربية زيى كده, الموضوع ده تصبيرة صغيرة للناس اللي بتسأل كتير عن الخلوص الارضي للعربية و اللي وعدتهم اني هعمل تقرير مفصل و انزل تحت العربية و اقيس و اصور بنفسي و بمجهودى الشخصى علشان خاطر عيونكم.
احب اقول كام نقطة كده قبل منبدأ :
1.يرجى مراجعة موضوعي السابق بعنوان"اختبار الكورولا 2014 في المطبات"لمعرفة ابعاد الموضوع كاملة http://www.nilemotors.net/Nile/385983-2014.html
2.يرجى ملاحظة فروق الارتفاع في الارض "لأن طبعا الارض غير مستوية" و ذلك للامانة في دقة القياسات.

نبدا بالشكل الخارجى للعربية من بعيد شوية و بعد كدة نقرب















الكاوتش بريدجستون R16/205/55 و دى صورته





بالنسبة للضغط فهو مضبوط علي 30.5 عشان محدش يقولي ان الضغط زيادة فالعربية عالية , كلو بالصور للاثبات هههه





بعد مشفنا العربية من بعيد نقرب شوية , ولكن قبل منقرب اعرفكم علي العلبة الصفيح السحرية و اللي لقيت ارتفاعها 13 سم بعد عناء . والصورة توضع طولها بالمتر





عشان متتوهوش منى , احنا هنقيس بالعلبة دى من تحت العربية و هنبدأ من اخر العربية, منها الي الثلث الاخير, منها الي منتصف العربية عند القضيب اللي بيحمي علبة الشكمان, منها الي الثلث الامامي ,منها الي اول العربية.

ديه العلبة لما حطيتها عند الكساحة البلاستيك اللي عند الكاوتش الخلفي (ملحوظة: كل كاوتشة من الاربعة فيها كساحتين واحد قبل الكاوتش وواحدة بعد الكاوتش, و فايدتها انها تحمي بودى العربية من الطينة اللي بتتنطور من الكاوتش لو دخلت في بركة مياه)
دى صورة الكساحة الامامية للكاوتش الخلفي





ودى صورة الكاسحة الخلفية للكاوتش الخلفي





ودى صورة للعلبة الصفيح تحت المساعدين و السوست





طبعا انتم بعد مشفتو الصور عندكم فضول فظيع "رغم ان الصور واضحة" انكم تعرفو المسافة اللي من فوق العلبة للعربية و تزودو عليها 13 سم "اللي هو ارتفاع العلبة الصفيح" عشان تعرفو الخلوص من الارض في الاماكن دى, و طبعا انا ميرضينيش يبقي عندكم الفضول ده من غير مجيب المتر و انزل تحت العربية و اقيس لكم الخلوص بالضبط.

الصورة دى بقا في منتصف العربية بالضبط و لكن ورا شوية نقدر نقول تحت الكنبة الخلفية, و بتبين اوطي نقطة قيست عندها و هو بار حديد حماية للشكمان و ليس علبة الشكمان. وواضح من المتر انها 4.5 سم + 13سم ارتفاع العلبة الصفيح = 17.5سم





الصورة دى اهداء للزميل Abofandy و متصورة في منتصف العربية من قدام وورا و يمين و شمال عند القضيبين اللي بيحمو علبة الشكمان, وواضح الارتفاع حوالي 2.7 سم + 13 ارتفاع العلبة الصفيح = 15.7 سم





الصورة دى في الثلث الامامي قبل الكساحة الخلفية للكاوتش الامامي حوالي 3.5 سم + 13 سم = 16.5 سم





الجزء الامامي واطى شوية, معلش انا صورت من بعيد مكنتش مركز و نسيت اصور بالمتر و لكن قياس المتر كان حوالي 1.5 سم + 13 سم= 14.5 سم و دية عند الكساحة الخلفية للكاوتش الامامي





نيجى بقا لاوطي نقطة في العربية بجد و هي دى اللي عندها الارتفاع 12.5 سم بجد و هي الكساحة الامامية للكاوتش الامامي و العلبة منزلتش تحتيها ده معناها انها اقل من 13 سم فعلا و لكن اقل حاجة بسيطة جدا حوالي 3 او 4 مللي.





الصورة الاخيرة دة من عند اوطي نقطة في التصفيح الامامي و كان المتر قايس حوالي 0.7 سم + 13 سم = 13.7 سم ولكني معرفتش اصور بالمتر اعذروني




أتمني ان الموضوع يكون عجبكو و يكون افاد الناس اللي محتارة و ان الصور و الشرح يكون يكون واضح و بسيط.
جاهز لأي استفسار, و يارب يكفينا شر العربيات و عنين الناس و شكرأ