كيفيه رجلاش الفرامل الخلفيه لفكترا بى ١٦٠٠ ... بالصور
الزملاء الأعزاء
طبعا كلنا متفقين إن أى شغل نقدر نعمله بنفسنا أفضل بكتير من اللى بيعمله الصنايعى .. والأساتذه الكبار فى القسم ليهم رصيد كبير فى شغل الصيانه .. ونصيحتى للكل إننا ما ما نفتحش فى شغل إلا لما نكون على علم بيه ونقدر نكمله
النهارده هاعرض ليكو تجربتى مع رجلاش الفرامل الخلفيه للفكترا ١٦٠٠ سى سى مانيوال .. وطبعا كلنا عارفين إن الفرامل الخلفيه فى الموديل بتكون قباقيب ... وطبعا النوع ده من التيل بيعوز رجلاش كل فتره عشان الفرامل تفضل قويه معانا ... وبتحس انها عاوزه يترجلش عليها كل اما فرامل اليد تعلى معاك لان فرامل اليد بتكون على القباقيب الخلفيه مش زى الديسكات بيكون ليها لقم خاصه بيها
بدايه شغلنا بيكون برفع العربيه وفك العجله الأولى من العجلات الخلفيه بالمنظر ده
http://www13.0zz0.com/2013/11/10/11/997737305.jpg
وبنلاحظ المسمار البورمه ده اللى بنفكه بمفتاح نجمه عشان نخرج الطنبوره .... وبيظهر معانا الشكل ده
http://www2.0zz0.com/2013/11/10/14/630565711.jpg
ملاحظه : لو التيل قديم وبنحل عشان نغيره بنلاقى الطنبوره عامله ( شفه ) ولما نجرها الأفضل نوديها المخرطه عشان نشيل الشفه دى
بعد ما خرجنا الطنبوره بنلاحظ آثار الهباب بتاع التيل .. وبنكون مجهزين مياه بمسحوق عسيل ( يفضل المسحوق عن البريل ) ونبدأ نغسل الهباب اللى نازل من التيل وهيكون معانا المنظر ده
http://www7.0zz0.com/2013/11/10/14/948266436.jpg
طبعا لازم الحذر وقت الغسيل عشان مافيش سوسته تطير مننا وممكن مانكونش عارفين مكانها
بعد كده هانجهز مفتاح عاده عشان هانحرك بيه ترس الرجلاش اللى فى الصوره قدامنا ده
http://www3.0zz0.com/2013/11/10/14/777365019.jpg
هانبدأ ننزل الترس من فوق لتحت ... وهنلاحظ مع كل تكه إن قفل الرجلاش بيقفل على التكه اللى بتجيبها بالمفتاح
ووظيفه ترس الرجلاش انه بيمنع رجوع الترس مره تانيه وبالتالى حفظ الرجلاش اللى عملناه
بعد ما ننزل الترس كذا تكه ( على حسب الحاجه ) نحط الطنبوره تانى ونشبط المسمار بتاعنا ونشوف التيل عامل ايه ... كويس ولا الرجلاش جه تقيل شويه
لو الرجلاش جه تقيل شويه مش مشكله .. هانفك تانى ونرجع الترس لفوق شويه ... بس طبعا القفل مش هايسمح .. هانرفع القفل لفوق شويه بسيطه وهنلاقيه رفع من على الترس ... ونرفع الترس سنه او اتنين لفوق .. ويبقى خلاص مبروك علينا العجله الأولى
وطبعا العجله التانيه هاتكون بنفس الطريقه ... وبعد ما نخلص الاتنين هنلاقى ان مستوى فرامل اليد بقى بالكتير ٣ تكات ( على حسب ايدك والرجلاش اللى عملته ) وانا بصراحه مش بحب أخلى التيل محمل على الطنبوره بعكس صنيعيه كتير لما كنت بعمل الشغل ده عندهم بيخلى التيل محمل اوى وبيحك فى الطنبوره وده بيأثر على سحب العربيه وبيخلى التيل يخلص بسرعه لأنه بيكون دايما بيحتك بالطنبوره ... ولما بكون مش محمل التيل بتكون فرامل اليد ٣ تكات والعربيه تحجر فى الأرض
طالما عملنا الشغل بالطريقه دى مش هنحتاج ناخد هواء دوره الفرامل ولا حاجه بعكس لو فكينا التيل
لو عندك شفه فى الطنبوره هايبقى خروجها صعب شويه وهانحتاج نقفل التيل شويه قبل خروجها وساعتها لازم ناخد الهوا
تحياتى للجميع وأرجو أن تعم الفائده