صديقي المواطن
شكرا لمشاطرة إخوتك المبتدئين من أعضاء المنتدى تجاربك الثرية والحديثة عشان تعرفنا وتوافينا وبآخر تطورات الموقف ومنتظرين منك كل جديد
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال
رقم العضوية : 38569
تاريخ التسجيل : 21Apr2009
المشاركات : 58
النوع : ذكر
الاقامة : القاهرة
السيارة: لانسر بومة 2014
السيارة[2]: فيات 128
الحالة :
مساء الخير عالجميع،
الحقيقة أنا بسبب إني استفدت كتير من موقعكم قبل ماروح أجدّد رخصة السواقة فحابب أشارك بخبرتي. أنا لسة مجددها من أسبوع من مرور عبود.
كان يوم سبت صحيح كتير من الناس بيحذروا نبعد عن السبت بس ماكانش عندي غيره عشان ظروف الشغل.
- رُحت الساعة 9 الصبح مستشفى حكومي عشان أعمل شهادة النظر والباطنة بصورتي ممضية ومختومة على الصورة بختم النسر. طبعاً دكتور الباطنة كان متأخر. كنت مخلص على الساعة 11 بتحليل الدم عشان ماكنتش أعرف فصيلتي. الغريب إني دفعت في الشهادة الواحدة 40 جنيه غير 20 جنيه تحليل فصيلة دم يعني إجمالي 100 جنيه شهادات طبية. دكتور الباطنة حسّرني قاللي يا عم دي بتتباع ب5 جنيه قدام المرور (لا تعليق!)
- وصلت عالمرور 11:20 ص. كنت خايف أبقى كدة متأخر. جيت أدخل على شباك التصوير قلتله أنا باجدد قاللي ماتشتريش حاجة خش على طول.
1- أول خطوة شباك المخالفات. سلمت الرخصة والبطاقة وبيقوللك وإنت واقف إنت عليك مخالفات عليها ولا لأوغالباً لأ فا تستنى وسط زحمة كبيرة لحد ما يتنده اسمك في الشباك التاني. البطايق بيطلعوها للناس توزعها على بعض قبل ما شهادة المخالفات تطلع ويتنده اسمك فركّز عشان تسترجع بطاقتك أول ما يطلعوها. استنيت تقريباً تلت ساعة واتنده اسمي وبتديهم (5 جنيه) طبعاً من غير وصل (هي غالباً إتاوة للموظفين لأني حسبت قد إيه ممكن يدخلهم في اليوم من الأعداد الرهيبة دي لقيته مبلغ).
2- بعد كدة سألت أكمل فين: كان في الدور التاني. طلعت شبابيك التجديد كانت مش زحمة قدامك واحد أو اتنين. لما جه دوري الست كانت بترد بصوت واطي هي غالباً متوقعة إن الناس عارفة الخطوات وهايفهموا على طول. المهم شافت الرخصة وإدتني رقم الملف بتاعي في الأرشيف في ورقة صغيرة وقالتلي أديه للعسكري في الأرشيف إدتهوله واستنيت لحد ما ملفي ييجي.
3- لما الملف وصلها من العسكري جوا أخدت مني شهادة المخالفات بالرخصة - الشهادات الطبية - صورة من البطاقة - والغريب إنها ما طلبتش أي صور شخصية وبصت في البطاقة وادتني ورقة كتبت فيها 50 جنيه أدفعهم في الخزنة. الخزنة في نفس الدور وكانت هي أصعب حاجة في اليوم بسبب فهلوة شعبنا: مبدأ الطابور يمكن التحايل عليه بميت طريقة وفي الآخر إنت اللي هاتعطّل لأنك ملتزم! قضيت تقريباً نص ساعة في طابور الخزنة.
4- المهم وأنا في الطابور سمعت خبرات الناس. اكتشفت إن مش المفروض بس تدفع الرسوم اللي الست في شباك التجديد كتبتهالك، المفروض كمان تشتري من عندهم نموذج التجديد بدمغاته (تمنه 10 جنيه). دفعت وخدت وصل الدفع ونموذج التجديد ورجعتلها.
5- طلبت مني أملا النموذج - مليته وإدتهولها. لزقت هي الدمغات وقالتلي معاك دوسيه قلتلها لأ قالتلي طب هاديك أنا من عندي (طبعاً عشان أشوفها بحاجة في الآخر لأنها كانت عمالة تجر ناعم في الكلام). عملت إمضاءاتها عالورق وجمعته وطلبت مني (دمغة طبية) على حظي كان فيه واحد داخلها فقالتله يجيب لنفسه ولي بالمرة (تمن الدمغة 1.5) وقالتلي بعد ما هاتاخد الدمغة أستنى التصوير.
6- وقفت قدام قوضة التصوير لحد ما بعد 10دقايق كدة لظابط نده اسمي وسط 4 عليهم الدور يدخلوا بعد الللي جوا. تدخل قوضة التصوير الموظفة تقرا قدامك اسمك ووظيفتك وعنوانك عشان تتأكد من صحة البيانات. المشكلة إن فكرة إنك تضحك بعد يوم حافل زي ده صعبة أوي أخري كانت ابتسامة صفرا وتمام.
7- استنيت ربع ساعة تاني على ما الرخصة اتغلفت وطلعت واستلمتها ومضيت بالاستلام في دفتر نفس الظابط. خلصت الساعة 2 اللي هو ميعاد قفل شبابيك التجديد.
باختصار الحاجات اللي إنت محتاجها:
- الشهادات الطبية باطنة عليها فصيلة الدم + نظر (على كل واحدة صورتك مختومة بختم النسر)
- الرخصة
- البطاقة وصورة من البطاقة
- ممكن تشتري ملف من شباك التصوير تحت وخللي معاك قلم جاف احتياطي
- نموذج التجديد بدمغاته من الخزينة + دمغة طبية من المرور تحت
أخدت تقريباً ساعتين في الشهادات الطبية و3 ساعات في المرور
إجمالي التكلفة بالنسبة لي:
100 جنيه شهادات طبية
5 جنيه شهادة مخالفات + 50 جنيه رسوم تجديد + 10 جنيه نموذج تجديد بدمغاته + 1.5 دمغة طبية + 10 جنيه إكرامية للست (إجمالي للمرور بس 76.5 جنيه)
أتمنى أكون أفادتكم زي ما فيدتوني :)
رقم العضوية : 96064
تاريخ التسجيل : 23Apr2011
المشاركات : 3,658
النوع : ذكر
الاقامة : nasr city
السيارة: more than 300 cars سابقا
السيارة[2]: now I have 11 cars
دراجة بخارية: من زمان
الحالة :
صديقي المواطن
شكرا لمشاطرة إخوتك المبتدئين من أعضاء المنتدى تجاربك الثرية والحديثة عشان تعرفنا وتوافينا وبآخر تطورات الموقف ومنتظرين منك كل جديد
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال
رقم العضوية : 128692
تاريخ التسجيل : 12Aug2012
المشاركات : 12
النوع : ذكر
الاقامة : naa
السيارة: mm
السيارة[2]: Renault Liogan
دراجة بخارية: aa
الحالة :
انا عندي نفس ميعاد التجديد لرخصة القيادة الشهر ده بس المشكلة ان انا رخصة القيادة مرور فيصل وانا دلوقتي محل السكن في البطاقة أكتوبر فأكيد لازم أجددها في مرور أكتوبر فهل لازم أجيب شهادة المخالفات من نيابة فيصل الأول ولا ممكن أجيبها من مرور أكتوبر؟
طيب و بعد شهادة المخالفات أروح مرور فيصل ولا أكتوبر؟
المفضلات