الموضوع: انتو فاكرين بيتضحك علينا في العربيات بس ؟ تجربتي مع الشراء الالكتروني في مصر

السلام عليكم
بنطحن في فوايد وجمارك العربيات ؟ ومن كتر ما اتضحك علينا اعتدانا يتضحك علينا وبقى عادي

لكن مش العربيات بس الي بيتضحك علينا فيها

خدمات الانترنت والاتصالات بيتضحك علينا فيها

جودة المنتجات المستوردة - ال يعني في منتجات مش مستوردة - بناخد اردئ فرز

وحدث ولا حرج

المهم
ظهر في الاونة الاخيرة حاجة جديدة اسمها التسويق الاليكتروني وطبعا دي طفرة في مصر انك تدخل موقع تتسوق وتتفرج على المنتجات وبعدين هووب تعمل اوردر وهوب يجيلك الي طلبته وانت قاعد مكانك وزي ما طلبت ... ثانية واحدة انا بقول زي ما طلبت ؟ لا هنا في وقفة صغيرة

القصة تبدأ مع اكبر موقعين تسويق اليكتروني في مصر وهم سوق دوت كوم و جوميا

سيبك من جوميا خالص لان الي بيحط الاسعار فيها اكيد مبرشم وادخل واتفرج واضحك واخرج

نيجي للبيج بوص وهو سوق دوت كوم

بمنتهى الامانة علشان مبقاش بتجنى على حد انا عملت عدة اوردرات من عندهم وبصراحة وصلت في معادها وكله تمام لكن المنتج نفسه مش زي الصور لكن مش مشكلة ممكن يمشى ، الكارثة بقى لما يجيلك منتج سيئ جدا وتعمل اوردر ارجاع للمنتج دا وتتجرأ على انك تطلب ترجعه وتاخد حقك .

اشتريت منتج من عندهم ومش عايز اقولك ان المكونات الاصلية كلها متشالة منه ومحطوط مكانها مكونات معمولة على الرصيف كسبيل المثال عارف قلاية الزيت الكهربائية البلاستيك النضيفة دي ؟ تخيل اشتريتها لقيتهم بعتين حلة مخرومة من فوق محطوط فيها كوع مواسير ومربوط فيها ماسورة ال يعني يطلع بخار الزيت ؟
انت متخيل ؟
حاول كدا تتخيل وانت بتفتح اللفة تلاقي المنظر دا بعد ما شوفت صور القلاية دي والفيديو الاصلي على يوتيوب وتشوف امكانيتها وتقتنع بيها فتعمل الاوردر فيجيلك حلة ملزوق عليها بوستر معفن باسم الشركة المصعنة وعيش يا معلم ...

طبعا اتصلت بسوق دوت كوم وقولتلهم كل الي حصل دا وبالفعل قالولي احنا اسفين وهنبعت ناخد المنتج من عندك خلال يومين و مر يومين ثم يومين واتصل يقولولي يومين ثم يومين واديني منتظر اليومين الي اخد حقي فيه ويا عالم .
ومتعرفش العيب عندهم ولا عند الوكسة التانية الي اسمها ارامكس شركة التوصيل ام فيزبا

المهم انتو فاكرني زعلان ؟
اطلاقا انا مبسوط جدا خصوصا اننا برة في السفر لما عملنا اوردر من شركة اجنبية وبعدين جه الاوردر واكتشفنا انه غير متوافق مع اجهزتنا - يعني غلطتنا اصلا - بعتنا ايميل للشركة جت خدت المنتج وبعتتلنا فلوسنا خلال 5 دقائق ، ولما بعتنلها ايميل شكر على سعة صدرهم ، استغربوا جدا !!!

مواطن مصري بني ادم والله وبيدفع فلوس قدام الي بياخده ... محدش يفهم غلط بالي بياخده دي

شكرا