أوبل أسترا كوزمو سيدان، تويوتا كورولا، ولا كيا سيراتو 2014؟

**Omar Gamal** · 15-11-2013 12:26 AM

ده هيبقى أول موضوع لي في الموقع، و بجد من قراءة كلام الأعضاء ناس محترمة جدا و فاهمة كويس جدا عن تجارب. ربنا يحميكوا.

أنا محتار ما بين ثلاثة عربيات في فئة ال 185000-195000، والعربيات اللي قدرت أوصلها في الفئة دي هي الآتي:

1. أوبل أسترا كوزمو سيدان 2014: عربية جميلة، و لكن قلق من توكيلها منصور و اعتماديتها على فترات طويلة من الزمن بحكم إعادة بيعها الأصعب بين هذه الإختيارات. هل فيها عيوب تخليني أصرف نظر؟

2. تويوتا كورولا 2014 الفئة الثانية: برده عربية جميلة، و لكن قلقان جدا جدا من ارتفاعها المنخفض من الأرض (كذا عربية اتعورت جامد بسبب المطبات اللي في مدينة نصر، خاصة عند الإكصدام الأمامي). اعتمادية طبعا، بس حاسس الأسترا عربية أقيم بكثير. و لكن برده مفيش حد عارف عيوبها لسه؟

3. كيا سيراتو 2014: شكلها ملفت، بالإضافة لسهولة إعادة البيع و توافر قطع الغيار لكونها كوري.

فيدوني يا جماعة أرجوكم. الكورولا حلوة، بس الأسترا أقيم. الحيرة متواصلة والله.

متشكر جدا.

**amgomaa** · 15-11-2013 12:57 AM

بغض النظر عن كوري وياباني والماني لان الكورولا تركي والاسترا بولندي واكيد في ناس هتقول دي مقارنه عيب وحرام انا راي كالتالي اعتماديه الكورولا السيراتو الاسترا اعادة بيع الكورولا السيراتو الاسترا امان الاسترا الكورولا السيراتو التوكيل كيا تويوتا اوبل الكماليات سيراتو كورولا اوبل الشكل سيراتو كورولا استرا الوسع كورولا وسيراتو و بعد كده الاسترا يعني من الاخر لو انا مكانك و بسافر كتير يبقي كورولا اما لو سفر قليل يبقي سيراتو ومش هختار الاوبل وده راي شخصي وبالتوفيق

**Omar Gamal** · 15-11-2013 01:19 AM

شكرا لرد حضرتك و متفق معك في كل نقطة، و لكن انخفاض الكورولا الرهيب و هبوطها على الأرض مخليني قلقان منها جدا، و ده بالتبعية هيأثر على سفري بيها لأني بالحال ده العربية هتحك في كل المطبات.

**amgomaa** · 15-11-2013 01:29 AM

عامة انا لو مكانك المقارنه هتكون بين السيراتو و الكورولا لاني مستريحش للاوبل نفسيا مش عارف ليه بحس ان اعتماديتها مش التوب مع كامل احترامي لاي حد راكب اوبل وعلشان كده هيكون اختياري الكورولا واخد بالي من المطبات بالجنب انزل اللي معايا بس اركب الكورلا بس بلاش اوفر برايس و بالتوفيق

**Mohyeldin1974** · 15-11-2013 01:48 AM

انا من عشاق الكورولا وراكبها من ١٩٩٨ بجميع موديلاتها لحد ٢٠٠٧ وشكرا على كده
وبقالى فتره مع الاوبل خارج وداخل مصر وعربيه تقيله وثابته وكل تفاصيلها بتنزل مصر زى بره بالضبط ومعايا حاليا الكوزمو
كماليات كافيه جدا واعتماديه وثبات وامان وشكل طبعا الاسترا تكسب، بالنسبه للتوكيل انا معنديش مشاكل وناس فاهمه وكويسه ومنظمه ومعامله محترمه. غير انها انتشرت وده مؤشر كويس
مع كامل حبى وتقديرى للكورولا بس ركوبه الالمانى مختلفه ومحدش يختلف على كده وبالنسبه لموضوع اعاده البيع كله بخسر حتى المرسيدس والبى ام واعتقد اذا الكورولا حد عارضها للبيع اكيد هيخسر فيها بردو الا اذا كنت بتبيع بسرعه فالكورولا ممكن تكون خسارتها اقل شويه بس لسه الكلام مش اكيد والدليل الجنوب افريقيى غير موضوع الارتفاع اللى بعض ناس قالت انه مش مؤثر
طبعا ممكن اللى بقوله يتناسب مع متطلباتى الشخصيه وتختلف عند حد تانى
السيراتو تيجى بعديهم ومقدرش طبعا اقارن ، ومن الظلم رفع سعرها بالطريقه دى الا اذا كنت تحب تمشى زى ماباقى الناس ماشيه وخلاص مع ان الثقافه دى ابتدت تتغير بدليل انتشار السوبارو مثلا
حضرتك شوف متطلباتك ايه وتوكل على الله

**saddam** · 15-11-2013 02:00 AM

صديقي المواطن
قولا واحدا مش حنتعب نفسنا معاك أنا قريت موضوعك وشايف قلبك مايل للسيراتو الشكل الجديد وحتجيبها اﻷوبل أسترا مش قد كده وكورولا الجديدة جميلة وكبيرة وملهاش عيب غير إنها أغلى من اللزوم ولو عايز تجمع كل دول في بعض فخد فلوانس الشكل الجديد وعيش حياتك وكون نفسك ولكن أهم حاجة تغير الكلاكس بتاعها ﻷنها عربية فخمة ولكن كلكسها يعر ويكسف
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**Mohyeldin1974** · 15-11-2013 02:14 AM

المشاركة الأصلية كتبت بواسطة saddam

صديقي المواطن
قولا واحدا مش حنتعب نفسنا معاك أنا قريت موضوعك وشايف قلبك مايل للسيراتو الشكل الجديد وحتجيبها اﻷوبل أسترا مش قد كده وكورولا الجديدة جميلة وكبيرة وملهاش عيب غير إنها أغلى من اللزوم ولو عايز تجمع كل دول في بعض فخد فلوانس الشكل الجديد وعيش حياتك وكون نفسك ولكن أهم حاجة تغير الكلاكس بتاعها ﻷنها عربية فخمة ولكن كلكسها يعر ويكسف
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

معلش كنت محتاج حضرتك تقلى الاسترا مش قد كده ليه يعنى نستفيد بردو

**Omar Gamal** · 15-11-2013 02:19 AM

شكرا يا جماعة لردودكم و اهتمامكم.

الحقيقة أنا متفق تماما مع حضرتك في كون الكورولا غالية أوي عن اللازم، و ده اللي خلاني - طالما دخلت الفئة دي - أفكر في الأسترا. مقتنع بيها جدا و شايفها حكاية، و لكن ناس زي حضراتكم كده بيرجعوا يخوفوني منها و يقولولي بلاش.

لو في أي اقتراحات أخرى، مرحب بها. و أرجو تجربة شخصية لدى أي من ملاك الأسترا، و رأيهم فيها بعد امتلاكها و التعامل مع توكيلها.

معلش أنا هتقل عليكم يا جماعة، اعذروني.