الموضوع: كورولا 2013 ولا بيجو 301

محتار بين كورولا الشكل القديم 2013 البيز لاين اتوماتيك والبيجو 301 الهاى لاين
تقريبا لا يوجد فروق في الكماليات والسعر قريب جدا
البيجو اوروبي وشكل جديد وممتازه كصالون وشكل خارجى وماتور 115 حصان وفتيس 4 غيار والتويوتا اعتماديه وسعر اعاده بيع ممتازه وليها مكانتها في السوق المصرى وماتور 122 حصان وفتيس 4 غيار وحجم اكبر

انا شايف المقارنة غير منطقية اصلا لا في الفئة ولا السعر

دى عربية ودي عربية تانية خالص وكل واحدة ليها مميزاتها وعيوبها وكل واحدة ليها طعمها واللى بيركب كل واحدة فيهم بيدور على حاجات مختلفة تماما في كل حالة وشخصية اللى هيركب تويوتا 2013 غير اللى هيركب بيجو تماماااا


التويوتا فئة اعلى من البيجو ولكن تقليدية ونمطية جدا وقديمة ومفيهاش جديد ، في المقابل هى عربية مهروشة في السوق كويس ومعروف اولها من اخرها ، للناس اللى مش بتحب المجازفة او التغيير وعربية هتنقلك من A لـ B بدون ما تفكر في اي حاجة تانية .. صيانة معروفة ، اعادة بيع مضمونة ....


البيجو طعم تانى عربية جديدة شبابية وعائلية قيمة مقابل سعر ممتازة ، اوبشن لذيذ امان جميل .... ولكن في نفس الوقت اولا واخيرا فئة اقل ، ما تحكمش بالـ specs ! مش هى اللى بتحدد فئة العربية ، على سبيل المثال ، في اللابتوب DELL inspiron و DELL xps ممكن اجيبلك جهازين الاتنين corei5 ورامات 8 جيجا و هارد تيرا وزي بعض في كل الـ specs بس في الاول وفي الاخر الانسبيرون انسبيرون كجهاز اقتصادى والـ XPS XPS ، ده على سبيل المثال للتوضيح بحاجة بعيد عن العربيات ومش معناه التويوتا احسن على طول الخط ، بس يبين يعنى ايه فئة اعلى وفئة اقل في اي حاجة في الدنيا


الـ 301 تتقارن بالياريس الجديدة وهنا المقارنة تبقى عادلة وليها معنى .. لانهم قريبين في السعر و الاهم نفس الفئة



كل ده وفي الاخر اقولك لو معايا فلوس مثلا مثلا 170 الف مش هحطهم في تويوتا 2013 لانى شايفها ما تستاهلش سعرها وفي نفس الوقت لو دخلت الـ 301 في المقارنة يبقى بظلمها لانها مش في الفئة دي ، في الحالة دى هتجه لمنافسين محترمين في نفس الفئة زي الاسترا الجديدة والفلوانس الجديدة.....