الموضوع: بالصور تغيير وش السلندر و طقم جوان كامل عند محمد عبده

السلام عليكم

من فترة اشتكيت من المياة و قولت علي طريقة حل اغلب المشاكل في الموضوع ده :
http://www.nilemotors.net/Nile/380119-a.html

و المياة فضلت تنقص و ده لان الريادياتير كان بيسرب من عند العلبتين البلاستيك تسريب خفيف بس غير مقبول ابدا


المهم عدت الايام و العربية بقت تقطع تقطيع مفاجيء فغير قلب طرمبة بنزين و برضة مظبتطشي فغيرت رشاشات
http://www.nilemotors.net/Nile/385832-90.html


و برضة مفيش فايدة فشكيت في البوبينة في الموضوع ده :

http://www.nilemotors.net/Nile/387891-a.html


المهم

استاذنا محمد ممدوح لقيته اهتم بالموضوع و بجد ربنا يكرمة و يبارك له لانه شخص في غاية الادب و الزوق و الاحترام
لقيته بيتصل بيا بيقولي انا في الرحاب و انزل خد بوبينة مني جرب بيها و هجرب لك العربية بنفسي

نزلت سهرنا سوا و في اخر القعدة طلع جرب العربية مشكورا بنفسة و ركن و نزل و فتح القربة لقيته بيشمها و قالي العربية دي فيها جوان وش سلندر لان القربة كلها ريحتها عادم شديدة جدا و فعلا انا كنت بشتكي من ريحة عادم بتدخل عليا و انا سايق بتعميني فقال ان بلوف الغطاء بتخرج العادم عليك

تاني يوم ممدوح باشا كان رايح لمحمد عبده المهم لحقته هناك بالعربية بعد الشغل من ستر ربنا برضة انه كان هناك بيعمل شغل في عربيته هناك

المهم سبت العربية و مشيت لانها كانت وصلت لمرحلة مقرفة جدا جدا و تقطيع بقي و قرف في الدوارة و مكنتش ناوي اروح بيها طبعا لان العربية فيها جوان من كشف استاذ محمد و كشف محمد عبده

نيجي بقي للجد

محمد عبدة كشف علي العربية و قال البوبينة ضعيفة و الرشاشات وحشة و الجوان في بداية البوظان طبعا اللي الناس متعرفهوش ان محمد عبده عنده لاب توب و بيعمل اسكان للعربية في الورشة

المهم
قولت له فك الموتور طلعة برة هو و الفتيس و انا هجيبلك طقم جوان كامل و ننفض العربية لان الفتيس كان بينقظ زيت و مكنتش عارف اويل سيل كرنك خلفي ولا اوي سيل زور

طقم الجوان الاصلي بيبقي مكون من:
اويل سيل كامة
اويل سيل كرنك امامي
اويل سيل كرنك خلفي
اويل سيل بوابة
اويل سيل طرمبة زيت
جوان طرمبة زيت
او رينج ثرموستات كوعة
او رينج طرمبة مياة
جوان وش سلندر
جوان منافولد
جوان فرن
سيليكون غريب كده اول مرة اشوفه بس نضيف جدا
دي تقريبا كل المكونات علي حسب ما افتكر بس هو فكرة ممتازة جدا لانه بيريحك من وجع الدماغ

فك و لقينا الوش بالمنظر ده :

الصورة دي انا عامل سهم علي التأكل اللي في جدار غرفة الاحتراق و عامل خط علي الحد اللي المفروض يكون موجود بس للأسف تأكل من مياة الحنفية اللعينة

الفاصل ده المفروض يبقي قد كده مرتين بس مياة الحنفية اكلته و الفاصل ده اللي جوان وش السلندر بيسند عليه يعني جوان وش السلندر كان نصه علي الهواء و بالتالي بيسرب مياة علي غرفة الاحتراق باين اثرها علي الصباب و البوجية باللون البني

[IMG][/IMG]



الصورة دي عكسية لنفس اللقطة و نفس غرفة الاحتراق
و بتوضح نفس الكلام في الناحية الاخري بس بدرجة اقل

[IMG][/IMG]



دي صورة لغرفة الاحتراق رقم 3 و للأسف كان فيها تأكل برضة و تسريب خفيف:
[IMG][/IMG]


طبعا انا و محمد عبده رفضنا التركيب تاني و فضلنا التغيير
و للأمانه ممدوح باشا برضة كان محذرني اني ممكن لما افك الاقي الوش متأكل من مياة الحنفية اللي الراجل اللي قبلي كان بيستخدمها

جبت وش استيراد من ابوهاشم في شارع العشرين ب 600 جنية و محمد عبده راح معايا بنفسه و اصر علي انه يجي علشان ابوهاشم يعمل خصم و بعديها سألت في الحرفيين اقل سعر كان 750 جنية و كان بيكلمني انه مجاملني !!! و فيه واحد قال لي 900 جنية !!! فمعني كده ان فعلا ابوهاشم سعره كويس و ان محمدعبده فعلا عمل خصم كويس ده غير انه فحص الوش قبل ما ندفع يعني ريحلي دماغي بصراحة

المهم
جبت الوش و محمد عبده اصر علي تغيير كاوتش الصبابات و قال استحالة اركب الوش الاستيراد بكاوتش الصبابات بتاعة انا فاكك و بالمرة لازم اغيره و احترمته جدا في النقطة دي خصوصا انها وجع قلب لانه هيودي الوش يتعمل و يجيبة و يعطله و العربية تتركن عقبال ما الوش يجي يعني قرف له و شغل مكان في الورشة.

دي صورة كاوتش الصبابات الاصلي ب 45 جنية من ابوالحسن:


[IMG][/IMG]

[IMG][/IMG]



نيجي بقي للمنظر بتاع الفتيس و ده اللي خلاني افك الموتور برة لانه كان منرفزني جدا طول ما هو راكب و مش راضي ينضف بسبب اويل سيل العقربة لما باظ من فترة كبيرة و غيرته
طبعا لونه الفضي مش باين اساسا و اخد لوحدة نص يوم غسيل و وصلنا لمرحلة ان اسلام اللي شغال مع محمد عبده ساب الشغل و غسلة بنفسة لان الاطفال اللي شغالين مقدروش عليه

دي صورة جانبية للفتيس
الاسهم الطولية بتشاور علي العقربة
السهم الافقي بيشاور علي مكان تسريب الزيت لما اويل سيل العقربة بيضرب
[IMG][/IMG]



و دي صورة الاسطوانة و الديسك و محمد عبده صنفرهم بنفسه و مرضيش يغيرهم قال انهم جداد.
[IMG][/IMG]



و انا اصريت علي تغيير البلية بتاعة طقم الدبرياج و هو اقتنع لانها كانت غرقانه زيت بسبب اويل سيل الزور ده:

[IMG][/IMG]

اويل سيل الزور بيخلي زيت الفتيس ينزل من بين الموتور و الفتيس في حلة الفتيس من جوة و بتغرق زيت بالبلية بتاعة طقم الدبرياج بقي و بتبقي حاجة بهدلة يعني و ممكن لو قفلت علي البلية بتاعة الدبرياج بعد ما منعت الزيت تلاقيها عملت ونة لان الزيت نشف و الشحم بتاعها وقع من اللي بيبقي حاصل


و ده منظر حلة الفتيس و السهم بيشاور علي بلية الفتيس و اويل سيل الزور تحتها تقريبا
[IMG][/IMG]



ده بقي السيليكون اللي جي مع طقم الجوان

[IMG][/IMG]

السيليكون ده عايز اعرف لو حد يعرف يجيبه من برة لان اسلام اللي عند محمد عبده كان هيتهبل عليه و بيقولي ممتاز جدا للجوانات فياريت اللي يعرف يفيدنا بالمعلومة لانه جي جوه الكيس المقفول بتاع قطم الجوانات

جبت طقم رشاشات ب 200 جنية بتاع الاكسنت بناء علي نصيحة من محمد عبده و شغال كويس الحمد لله و جبناه برضة من ابو هاشم و اصر علي انه يفكه من علي موتور و دي نقطة كويسة في ان الرشاشات يبقوا ليهم نفس زمن الفتح لانهم شغالين علي نفس الموتور

محمد عبده قبل التقفيل اثناء الغسيل لقي خرمين صغيرين في المنافولد و بعت لحمهم

و بعت الريادياتير يتسلك و يتظبط التسريب اللي فيه عند بتاع الريادياتيرات اللي جنبه

الحمد لله بعد التقفيل العربية اختلفت تماما و نقص المياة توقف اخيرا بفضل الله ثم بفضل الشغل النضيف اللي محمد عبده عمله في العربية

و البوبينة مغيرتهاش لحد دلوقتي و الفضل يرجع لله ثم العضو المحترم ابو اياد اللي قابلني هناك صدفة و اداني البوبينة بتاعة اجرب بيها و كان عايز يديني الرشاشات كمان اجرب بيها و بجد ربنا يكرمة
بس معايا بوبينة جديدة كنت جبتها من محل بتاع واحد صاحبي ادهالي و قال متدفعشي فلوس لحد ما تجرب و تتأكد ان هي السبب شايلها معايا احتياطي

نيجي بقي للتكاليف بالتفصيل:

600 جنية وش سلندر استيراد
375 جنية محموعة جوانات كاملة اصلي
35 جنية اويل سيل زور اصلي
45 جنية كاوتش صبابات
20 جنية طبب مياة امامية اصر علي تغييرها لانه فاكك و عايز يحكم دورة المياة و برضة احترمته جدا في انه عايز شغلة يطلع نضيف
150 جنية بلية دبرياج اصلية
125 جنية زيت فيسكو 3000
25 جنية فلتر زيت اصلي
200 جنية رشاشات
150 جنية خراطة
40 جنية لحام الومنيوم للمنافولد
20 جنية بنزين غسيل
40 جنية تسليك الريادياتير
500 جنية مصنعية فك الموتور و تجميعة و تركيبة

الاجمالي 2325 جنية يعني بالاكراميات للصنايعية و النثريات حوالي 2400 جنية

نسألكم الدعاء