الموضوع: الفرق بين فلوانس القديمه والجديدة

السلام عليكم اخواني الرينوهيين.......
انا استلمت بحمد الله الفلوانس 2014 الفئة الكاملة بدون فتحة سقف وده كالعادة في كل عربياتي لاني مش بحب فتحة السقف و دي تعتبر تالت رينو بعد الميجان و الفلوانس الشكل القديم...يعني مدمن رينو.
انا حاقول لكم علي ما وجدته من فرق بين الشكل القديم والجديد.
1-طبعا الشكل من قدام احلي كتير و له هيبة كده في الدخله.
2-الانوار النهارية حلوة جدا بس لمبات النور الصغير في الفوانيس مش بتنور واللي بينور مكانها لما بتشغل النور لمبات الled .كمان فوانيس الشبورة اصغر فالاضائة بتاعتها اقل.
3-الفوانيس الاماميه رياضيه يعني مش كل الفانوس لامع في اجزاء سوداء.كمان تم اضافة عدسات في الفوانيس ودي ما كانتش موجودة غير في الهاي لاين.
4-الجنوط شكلها الجديد يوحي بالقوة.

وده انطباعي عن الشكل الخارجي....استكمل معاكم انشاء الله باقي الملاحظات عن باقي العربية في وقت قريب....

اضافة كمان للاختلافات .
1- الزجاج مختلف عن الشكل القديم كما ذكر الاخ احمد الفقي...هوه مضاد للشمس زي الميجان 2
2- مفاتيح الزجاج كلها اتوماتيك بخلاف الشكل القديم .كان الزجاج الامامي بس مفتاح اتوماتيك اما الخلفي ضغطه واحده حتي في لوحه مفاتيح السواق.
3- الزجاج في الاربع ابواب فيه وحدات رفع اتوماتيك عند الضغط علي زر الاغلاق مرتين في الكارت زي الميجان 2 وده ما كانش موجود في الشكل القديم .اضافة طبعا لسنسور السيفتي بتاع غلق الزجاج علشان ما يقفلش علي ايد حد.
4- فترة التحكم في رفع الزجاج او تنزيله بعد ايقاف المحرك اطول بكثير من الموديل القديم اللي كان تقريبا 50 ثانية فقط .بعد كده لازم تدور علشان ترفع الزجاج او تنزله.

بس طبعا في عيبين مش عاجبني لازم اقول عليهم
1- السي دي الجديد حساس قوي مش بيشغل سيديهات كوبي بسهولة واذا كانت الcd مخربشه علي خفيف تفضل تقطع.يعني عاوز سيديهات اوريجنال دايما
2- التحكم في السي دي من مفتاح الطارة ضعيف و معظم الوظائف لازم تتحكم فيها من السي دي نفسة.حتي وظيفة الok من العجله الخلفيه في مفتاح الطاره مش مفعلة وانا جربتها في اكتر من عربيه في التوكيل.