الموضوع: تقرير عن البيجو 301 بعد صيانة ال 2500 كم

حبيت انقل ليكم صورة واقعية لاختبارى للبيجو 301 ( الهاى لاين ) بعد قيادة تقريبا ما يقرب من شهرين ونصف وبعد تجاوز ال 2500 كم وعمل اول صيانة للعربية بعد استلامها والحمد لله .

اولا : نبذة صغيرة عن البيجو 301 وباختصار لان كلنا تقريبا عارفنها وحافظينها بس لمتابعة الموضوع فى تسلسل لازم ابتدى بشوية معلومات بسيطة عنها ..
الشكل الخارجى .. وطبعا اذواق



الشكل الداخلى .. انا شايفه ممتاز بصراحة وبرضه اذواق ولكن يتسم بالسعة والرحابة ..علما بانى مرجع الكراسى لورا وبرضه المساحة الخلفية واسعة ومريحة للركاب الخلفيين قوى .





العربية 1600 سي سي و 115 حصان . فرامل ايه بى اس . ايه بى دى . مانع التزحلق على الجليد . 2 اير باج للسائق والراكب الامامى ( ويمكن اغلاق ايرباج الراكب الامامى ) . كمبيوتر رحلات . كمبيوتر اعطال . سينسور بارك خلفى . ذراع ملتى فنكشن . اضاءة شبورة ( فوج لايت ) امامى وخلفى . فتيس اتوماتيك ستيب ترونيك اربع نقلات امامية وواحدة خلفية . قيادة رياضية . باور . تكيف تتش . 4 زجاج كهرباء . سنتر لوك . ايمبوليزر . بلوتوث . راديو سي دى مدمج ( بيلت ان ) ام بى ثرى . مدخل( يو اس بى USB . وايه يو اكس AUX) . جنوط رياضية 16 . كاويتش ميشلان . التحكم فى مستوى ارتفاع الاضاءة الامامية . فتح التنك والشنطة من الداخل ومن الريموت . طنابير امامية سكاكين وخلفية درام . اريال سقفى . مفتاح ريموت . تقفيل مصنع بيجو فى اسبانيا .

ثانيا : نيجى بقى للشرح العام وده طبعا حسب انطباعى الشخصى .. انا حجزت العربية من معرض شركة بيجو بصلاح سالم وكان مبلغ الحجز 10 الف ج تم دفعها بالكامل والحصول على استمارة الحجز وتحديد 3 الوان حسب الاولية للاستلام وساعتها انا حددت الفيرانى ثم اللون الموكا ثم الابيض كآخر اختيار .. مدة الاستلام كانت 3 شهور .. وفعلا بعد 3 شهور اتصل بى الوكيل لاستكمال مبلغ 50 % من مبلغ السيارة لاستكمال اجراءات الاستلام فى خلال اسبوع . انا كنت حاجز بسعر 134900 وعند سداد مبلغ ال 50 % اخبرونى بزيادة سعر السيارة 1000 ليصبح 135900 .. بعد اسبوع بالظبط اتصلوا بى مرة تانى للاستلام وفعلا سددت باقى مبلغ العربية وحددت اللون الموكا بعد اقتناعى بيه وعدولى عن اللون الفيرانى وفعلا تم الاستلام والحمد لله واستلام اوراق السيارة كاملة ( المبايعة . الافراج الجمركى . شهادة بيانات موجهة الى المرور الخاص بى ) .. الانطباع الاول .. العربية ناعمة ، صوت ماتورها هادى بعكس ما سمعنا عنها ، الفرامل ممتازة . الصالون وقور قوى ويضفى راحة نفسية عند النظر اليه ، الصاج تقيل ومحمل ، الدهان خامته محترمه .. تانى يوم رخصت وبدأت رحلة الاستكشاف للعربية من خلال قيادة هادية ورزينة اول 1000 كم . وبعد ما خلصت ال 1000 .. حبيت افتح الموتور شوية والتجربة الفعلية لقدرات العربية وابتديت اطمن بقى واستعنت بالله .

سحب العربية ممتاز بالنسبة ومسعف فى اوقات حرجة فعلا وفيه 3 مستويات من القيادة .. العادية طبعا مع استخدام الكيك داون اللى بيخلى العربية تزأر وتكشر عن انيابها وتنطلق كأسد جامح فى البرية .. واستخدام القيادة المانيوال من خلال تحويل الفتيس من القيادة العادية للمانيول ..و طبعا القيادة الرياضية من خلال الضغط على زر سبورت بجوار عصى الفتيس وده بيسقط نقلة وبيأخر النقلة اللى بعديها فبيدى عزم جامد وانطلاقة قوية .

الفتيس ناعم بصراحة ولكن كان فيه نتشة بسيطة ولكنها ملحوظة عند النقلة التانية سواء بالوصول اليها او النزول عنها .. كنت لازم احس بنتشة تظهر فى حالة التحرك البطيئ عند تغير الفتيس للنقلة التانية وتظهر بقوة اقل اذا كان التحرك سريعا .. ولكنها زالت تماما عند عمل صيانة ال 2500 كم وتم تنزيل سوفت وير جديد شال النتشة خالص ولكنه اثر تأثير بسيط غير ملحوظ على السحب فى النقلتين الاولى والثانية ودى عشان يقدر يلغى النتشة دى تقريبا .. بس فعلا مش ملحوظ قوى . واخيرا السحب لا يتأثر كثيرا بتشغيل التكيف او التحميل .. ولكن هناك نسبة تعتبر عادية ومقبولة وبنسبة مش مؤثرة .


العفشة مش ناشفة قوى ومش ناعمة .. ولكن تميل الى النشوفية اكثروبنسبة 60 % ناشفة . وتحس ان العربية بتنط شوية فى المطبات العميقة .. ولكن امام ده والمقابل ليه .. الثبات ما شاء الله ما فيش كلام عليه .. ممتاز وفى اكثر من تجربة العربية ثابتة وتبعث الطمئنينة عند القيادة والمنحيات حتى على السرعات العالية ..

الفرامل .. الحمد لله ممتازة .. متجاوبة ومسعفة فى المواقف الحرجة وبصراحة انقذتنى فى موقف تعرضت ليه من قيادة بنت ارادت ان تاخد اليوترن المجاور لها تمام فاوقفت سيارتها فى نص الشارع بالظبط علشان تلحق ملف اليوترن وانا كنت وراها فضغط الفرامل بكل قوة وعلى تقديرى انى كنت لابس لابس .. والايه بى اس اشتغل والعربية انضغطت جامد وبدون زحف نهائى واشتغل ضواء انذار الفرامل المفاجاة اتوماتيكيا ( اضاءة الانتظار الرباعية ولكن بسرعة متقطعة اعلى ) وطبعا تماسك العربية وعدم زحفها كانت الميزة لو زحفت كنت قولت على وش العربية يالله السلام .. لكن الحمد لله وقفت قبلها بحوالى 10 سم ولا حاجة ولم المسها حتى .. لا غبار فعلا عليها .

التكيف..ممتاز بصراحة وما فيش اى مشكلة فيه خالص والحمد لله .. يتميز بسرعة التبريد باستخدام زر A/C MAX
وده بيخلى التكييف يشتغل باقصى قدرة ليه واعلى سرعة للمروحة فبيتم التبريد فى وقت اقل وبضغطه مرة اخرى بترجع للظبط العادى ليه .. شاشة عرض دائرية تبين كل وظائف التكيف .. الكمبروسور ينسن يابانى .. انا فى عز الحر لا ازيد ابدا عن وسطية سرعة المروحة وتبريده بيبقى ممتاز وساعات بسقع منه كمان .

المتعة ..نيجى بقى للاستمتاع بالقيادة .. التابلوه جميل والزراير منسقة فيه وسهلة الاستخدام ولا تشغلك ابدا عن القيادة حين استخدامها ومع التعود عليها ..

اصعب ما فيها صراحة زراير الزجاج الكهرباء وده مش عيب ولكن تعود فقط لا غير لان معظم العربيات بل وكلها ازار التحكم فى الزجاج فى مخدع باب السائق اما فى البيجو فى منتصف الكونصول فدايما ايدى تروح على الباب لنزول الشباك وارجع افتكر مكانها فى الكونصول ..لكن مع الوقت ابتديت اتعود على مكانها وكله تمام .


البلوتوث . بصراحة من المتع الجميلة فى العربية .. واستخدامه سهل وسلس بعد ظبطه لاول مرة فقط وفكل مرة تدخل فيها العربية بيحصل الكونتاكت مع الموبيل اتوماتيك وكله تمام .. الصوت مسموع سواء مرسل او مستقبل وساعات بسيطة بيحصل شوشرة اذا كانت الشباك مفتوح فصوت الهواء بيشوشر وبمجرد قفل الشباك .. بيرجع الصوت تمام وبالذات للطرف التانى طبها .. يمكن الاتصال والرد والتحكم فى صوت المكالمة ارتفاعا وانخفاضا من خلال ذراع المالتى فنكشن وبرضه يمكنك من الدخول على ملف الاسماء واختيار الاسم لاجراء مكالمة وهكذا .. وايضا هو الوسيط لنقل ملفات الميديا من خلال الموبيل للسيارة وتشغيل كل ملفات الصوت المحملة على الموبيل . وكمان ممكن تحويل المكالمة على الموبيل فى حالة الخصوصية لعدم سماع المكالمة للراكبين فى السيارة وفى حالة تحويل الصوت لسماعة الموبيل يبقى صوت الراديو هولد على الصامت ( MUTE ) لحين الانتهاء من المكالمة لعدم شوشرة صوت الراديو على المكالمة .


الصوت .. اقدر اقول عليه جيد جدا مش ممتاز ولا جيد حتى .. لأ .. يرتقى الى الجيد جدا من مؤثرات صوت مختلفة واربع سماعت بتدى صوت حلو قوى فى الصالون والاحساس بصفاء الصوت ونقائه واحساسك البيز والتريبل محترم جدا . طبعا الصوت على كل النواحى من خلال السى دى و الفلاشة او الاى بود .



العدادات .. بسيطة ولكنها وافية .. من متابعة كل وظائف التشغيل .. مع الاخذ فى الاعتبار ان مؤشر البنزين ديجتال مش مؤشر شبيه بالهوندا سيفيك وان مؤشى الحرارة هو لمبة فقط ( اشارة ضوئية ) تضاء فى حالة سخونة العربية فقط .



الشاشة الديجتال .. لبيان كل المعلومات الخاصة بالاستخدام .. اظهار الساعة .. ومسافة الرحلات وكمية البنزين المتبقية والمسافة المتوقع قطعها بالبنزين المتبقى .. ومتوسط استهلاك البنزين كام لتر لكل 100 كم .. اسم مقطع الصوت المشغل سواء من السى دى او الفلاشة او الموبيل .. التنبيه فى حالة وقف تشغيل الموتور وابقاء الفتيس على وضع القيادة بارجاعه الى وضع البارك .. التنبية على قرب نفاذ البنزين .. التنبية على نسيان رفع فرامل اليد ولو بمرحلة واحدة عند التحرك بالعربية لانزالها .. اشارات السينسور عند الرجوع للخلف للوسط وللاجناب .. بيان بالاشارة لاى باب مفتوح من ابواب السيارة .


الخامات الداخلية .. مرضية بصراحة وبالذات التابلوه شيك ومحترم وخاماته حلوة مش سيئة .. اينعم البلاستيك فيه كثير بس مش سئ وتطعيم التابلوه بالفضى والاسود اللامع مديله فخامة .. ولكن الابواب كلها بلاستيك ما عدا مخدع اليد قماش .. حجم المخدع صغير .



الشنطة ..واسعة ورحبة صراحة مع امكانية طى الكنبة الخلفية لزيادة مساحة التخزين وفيها فانوس للاضاءة ..


طيب كده تقريبا قولت كل ما للعربية من مميزات بصراحة ..
نيجى بقى لما عليها .. وطبعها ده من وجهة نظرة الشخصية برضه .

درج التالبلوه .. تصميمه فيه حاجة غلط .. عميق قوى وبعيد عن الايد .. لو عايز تجيب منه حاجة وانت سايق صعب جدا .. بعيد قوى عن الايد ولازم تميل جامد علشان ايديك توصل لاخره .. فعلا تحس بمشكلة لاخراج اى حاجة منه .. وطبعا ينقصه اضائة مش عارف ليه ما حطوش لمبة فيه .. مش توفير يعنى .


اضائة الصالون كافيه فى الامام علما بانها تضيئ فور فتح السيارة بالريموت كنترول وقبل قتح الباب نفسه وعند وقف تشغيل الموتور واخراج المفتاح وقبل فتح الباب نفسه مع تدرج فى قوة الاضاءة عند القفل . اما فى الكنبة الخلفية غير كافى ابدا وكانت محتاجة لاضائة خلفية .. علما بان النسخة الاوربية فيها فانوس اضائة خلفى .. برضه انه شايفه مهم ومش توفير يعنى لبيجو .


مساحات التخزين كمساحات داخلية بصراحة معدومة ما فيش غير درج التابلوه تقريبا ومسند اليد الوسطى .. ومساحت صغيرة قوى .. غير كده ما فيش المفروض فى الكتالوج فيه مساحة تحت مسند اليد الوسطى بس لا تذكر اصلا .
نقص كماليات مهمة ..كاجهاز انذار ضد السرقة علما بانى سألت عليه فى التوكيل وسعره 3500 ج ويزيد الى 5000 حسب الاوبشن بتاعه وده لازم مع الاموبليزر علشان الاشارة الصوتية والضوئية لان الاموبلايزر هايمنع تشغيل اموتور الا بالمفتاح الاصلى بس مش هايمنع كسر الزجاج وتقليب العربية ..

رفع للزجاج مع اغلاق السيارة بالريموت كنترول .

اضائة بشماسات السقف ومراية فى شماسة السائق .



داليات لان اى شوية ميه بتمشى عليها بتبوظ الجناب من طرطشة الطيبة وكمان وحش مستقبليا فى البارومة رغم انها مضمونة 10 سنوات ضد الصدأ بس مش فى مصر طبعا وركبت الداليات فى التوكيل ب 735 مع شديد الندم طبعا لانها غالية جدا .. هما بدأو ب 500 وبعدين ضريبة ومصنعيات وحركات وصلوها ل 735 وطبعا كانوا ركبوا خلاص ودفعت وكلى اسى على المبلغ ولكن الحمد لله .
الخامات الداخلية.. وبالذات الابواب كلها بلاستيك فبتعمل شحنات كهربائية مع الهواء وبتلم تراب حول تلك الشحنات فى اشكال دائرية حسب مغنطة الشحنات دى فتحس ان البلاستيك عليه عنكبوت من دوائر التراب عليه ولازم يتمسح كل يوم للاسف علشان ازالة اثارة التراب وتكاثفة على الشحنات الكهربائية نتيجة احتكاك الهواء ببلاستيك الابواب او استخدام اى قماشة للتنظيف .

طيب التقيم فى كلمة مختصرة نهائية .. بصراحة صفقة رابحة ومغنم على مستوى سعرها .. امام .. ثبات ..عربية صاج محمل وتقيل .. كماليات مرضية .. صالون وشنطة واسعين .. تسارع جيد جدا .. التقيم العام بالدرجات من 9 /10 فى شريحتها وسعرها .

تقرير ممتاز ما شاء الله