نويت اشترى الاوبترا ----حد ندمان او ليه تحفظات

**محمد سماحة** · 02-12-2013 12:08 AM

السلام عليكم
رجالة انا نويت اشترى الاوبترا الاوتوماتيك زيرو...حد ندمان انه اشترى العربية دى او له تحفظات عليها فى حاجات او فى عربية تانية ممكن تكون احسن فى نفس الفئة السعرية (117000 جنية)

اخيرا حد يعرف معرض فى القاهرة الاقيها عنده و يكون بيقسط مباشر(اسلامي) ؟ ولا لازم عن طريق كونتاكت؟

**madinabaza** · 02-12-2013 02:09 AM

انا جبتها يا باشا وهي زي الفل والي في نفس سعرها الصني الجديده بس بصراحه معجبتنيش كليا غير انها تقفيل مصري

**midooo_119** · 02-12-2013 02:24 AM

الاوبترا عربيه محترمه و اعتماديه مفيش كلام ربنا يباركلك فيها

**saddam** · 02-12-2013 04:12 AM

صديقي المواطن
هي عربية محدش إشتكى منها بس يعيبها إن شكلها خلاص راحت عليه من كام سنة كتير حلوين وهي بنفس الشكل الكئيب وكمان هي قليلة الكماليات ومش حلوة في حقك في المنطقة بتاعتك جايب عربية زيرو شكلها قديم أنا شايف إن اللي يدفع فيها فلوس اﻷوبترا فوق ال 70 ألف جنيه حتى لو كانت زيرو محتاج يقعد مع نفسه ويراجع ويسأل نفسه هو بيعمل في روحه كده ليه وبيظلم نفسه وعيلته وجايبلهم عربية شكلها قديم بفلوس عربية جديدة ليه وإنت الصح مهما كرهت الصني الجديدة ومهما حيظهر فيها من عيوب وهمية مستقبلا فهي أحسن من أوبترا بكتير شكلا وموضوعا وعندك البيجو 301 عشان تجيب من اﻵخر وبالمناسبة لو بتحب اﻷشكال القديمة فخليك في صني الشكل القديم برضو أشيك من أوبترا
أنا عارف إنك نويت خلاص وكلامي مش حيهمك ودي فلوسك وإنت حر بيها ولكن أنا قلبي بيتقهر على إخواتي في المنتدى لما أشوفه بيضيع نفسه وفلوسه على حاجة متستاهلش نص ثمنها معلش يا جدعان دي الشبح بأقل من 120 ألف جنيه
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**dodo2000** · 02-12-2013 08:23 AM

عربية بدائية
موتور كويس و ثبات كويس و واسعة
مفيش كماليات - سواقتها عادية و مش ناعمة

**كابتن أهلاوى** · 02-12-2013 08:32 AM

عربية مريحة جدا واوسع صالون نزل فى فئتها...فتيس يابانى بتاع تويوتا محترم جداا جداا وموتور قوى جداا...اعتمادية ومش مستهلكة لقطع الغيار...تكييفها جبار بمعنى الكلمة...رخيصة ...عيوبها ان شكلها وتصميمها مش اللى هو من برة بس عادى يعنى العربية فعليا ممتازة جدا

**محمد سماحة** · 02-12-2013 10:36 AM

طب بالنسبة للنيسان الصنى الجديدة السوير صالون ...مشاكل الفرامل و التيل و الطنابير ..انا عارف انهم كانوا بيغيروها فى الضمان و سمعت انها اتعالجت فى الانتاج الجديد هل الكلام ده سليم ؟

**Hosam_fouad** · 02-12-2013 10:39 AM

عربيه اعتماديه بمعني الكلمه ..... والثبات والمتور زي الفل . . .

المشكله زيها زي اي عربيه بعد 5 او 7 سنين هتفتح معاك في قطع الغيار :d

**Hosam_Optrawy** · 02-12-2013 01:12 PM

شوف يا أستاذ محمد , بما إننا داخلين على 2014 بعد أيام إن شاء الله فيفضل إن الواحد يخليه فى الحديث لأن الأوبترا فعلا تعتبر قديمه

يعنى لو الماديات تسمح لحد 124 يبقى بيجو 301 أوتوماتيك أول فئه , أو ستروين C Elysee ب 120 الف أوتوماتيك أول فئه ولو انها مانتشرتش بالرغم من انها توأم ال 301 فنيا فى كل شئ موتور وفتيس وعفشه وكله وخارجين من نفس المصنع , بس يمكن عشان علامة بيجو ليها سوق عن الستروين فى مصر , وكمان كان حصل مشاكل فى بعض العربيات الستروين فى أول دفعات فى السحب والتكييف بس إتحلت دلوقتى بتنزيل سوفت وير

لكن لو الماديات ماتسمحش وهاترسى على صنى سواء جديد أو قديم , يبقى خليك فى الأوبترا أفضل وقديم بقديم بقى :)