بشرى لحاجزي بيجو 301

**abohend** · 03-12-2013 01:32 PM

السلام عليكم و رحمة الله و بركاته
أنا كلمت النهاردة توكيل بيجو عباد الرحمن بالأسكندرية-سابا باشا
أنا حاجز من يوم 30-10-2013 المانيوال
قالي إستلامك آخر الشهر
سألته عن إمكانية تعجيل الإستلام و إختيار اللون التاني أة التالت
قالي فيه مركبين داخلين مصر واحدة كمان يومين و واحدة آخر الشهر
أنت على التانية لكن عموما إستنى لما المركب الأولى توصل و نشوف الألوان أخبارها ايه و أنا هرد عليك عن إمكانية إستلام اللون التاني أو التالت

اللي مقلقني بقى إني لما قلتله أن بدل المركب هتدخل آخر الشهر يبقى الإستلام على الأقل أول السنة الجديدة عقبال إجراءات الجمرك متخلص
كان الرد........ربنا يسهل

**ِA.Elsobky** · 03-12-2013 01:43 PM

بصراحه يا ابوهند عباد الرحمن بيستهبل جدا ... يا رب نكون من العربات اللى داخله كمان يومين دى
و لو حد كلمت يا ريت تفدنا ... و ربنا يصبرنا والله

**m.basha** · 03-12-2013 02:25 PM

والله يا جماعة قلبى معاكم و تستلموا على خير بس بصراحة عباد الرحمن اجراءاتهم مملة و بطء غير طبيعى دى الحقيقة بصراحة عشان ما ترميش الهلب انك حاتستلم زى ما بقول انا مش قصدى اعقدك و الله بس انا كنت حاجز معاهم و نفخونى برده لحد ما استلمت

**abohend** · 03-12-2013 03:16 PM

المشاركة الأصلية كتبت بواسطة ِa.elsobky

بصراحه يا ابوهند عباد الرحمن بيستهبل جدا ... يا رب نكون من العربات اللى داخله كمان يومين دى
و لو حد كلمت يا ريت تفدنا ... و ربنا يصبرنا والله

يا رب نستلم مع الشحنة اللي جاية
هو أنت حاجز من إمتى و آخر رد منهم ايه؟؟؟؟
و إن شاء الله هفيد الأعضاء أول معرف أي معلومة جديدة

**abohend** · 03-12-2013 03:20 PM

المشاركة الأصلية كتبت بواسطة m.basha

والله يا جماعة قلبى معاكم و تستلموا على خير بس بصراحة عباد الرحمن اجراءاتهم مملة و بطء غير طبيعى دى الحقيقة بصراحة عشان ما ترميش الهلب انك حاتستلم زى ما بقول انا مش قصدى اعقدك و الله بس انا كنت حاجز معاهم و نفخونى برده لحد ما استلمت

الله يخليك يا باشا
بس أنت استلمت بعد أد ايه؟؟
و هل فعلا أخروك عن الميعاد المتفق عليه
أنا و الله مش عايز أبيع لحد دلوقتي عشان خايف من الحركات النص كم بتاعتهم
بس في نفس الوقت خايف ألاقيه بيكلمني و أنا لسه مبعتش و فلوسي مش جاهزة
ساعتها مش عارف هيبقى الوضع ايه؟؟

هل ممكن يسلم العربية لحد تاني بحجة أني متأخر!!!
ربنا يستر

**cahmeda911** · 03-12-2013 04:25 PM

انا حاجز فى فرع صلاح سالم وكان المفروض استلم نهاية 11 بس ان كلمتهم فى التوكيل يوم 28 /11/2013 علشان اسمع البشرى لقيت المفجأة انه بيقولى لسه كمان اسبوعين المشكلة ان انا بعت العربية على اساس اخر الشهر
يا مسهل افرجها من عندك يا رب

**m.basha** · 03-12-2013 04:27 PM

المشاركة الأصلية كتبت بواسطة abohend

الله يخليك يا باشا
بس أنت استلمت بعد أد ايه؟؟
و هل فعلا أخروك عن الميعاد المتفق عليه
أنا و الله مش عايز أبيع لحد دلوقتي عشان خايف من الحركات النص كم بتاعتهم
بس في نفس الوقت خايف ألاقيه بيكلمني و أنا لسه مبعتش و فلوسي مش جاهزة
ساعتها مش عارف هيبقى الوضع ايه؟؟

هل ممكن يسلم العربية لحد تاني بحجة أني متأخر!!!
ربنا يستر

بص يا باشا انا حجزت عندهم هاى لاين يوم 2/9 واستلمت يوم 10 /11 بالظبط و الورق خلص بعدها بحوالى اسبوعين كمان متخيل بس الكلام ده بينى و بينك عشان ده كمان و فى واحد زميلى من زمان اوى و شغال هناك فا بصراحة مش عايزه يعنى يعرف انى بذم فيهم و لا حاجة بس بص اوعى تعمل غلطتى و تبيع عربيتك انا اسعجلت لانى لما حجزت زميلى ده قالى شهر و نصف بالكتير و حاسلمهاللك قبل كده فبعت ولبست شهرين كامليين من غير عربية المهم لو قاللك على اخر الشهر يبقى اعمل حسابك انك حاتستلم كده على نص شهر يناير ده توقعى الشخصى و الله اعلم و على حسب حضرتك حاجز ايه مانيوال و لا بيز و لا هاى لاين بتفرق طبعا لان الضغط كله على الهاى لاين

**ِA.Elsobky** · 03-12-2013 08:19 PM

المشاركة الأصلية كتبت بواسطة abohend

يا رب نستلم مع الشحنة اللي جاية
هو أنت حاجز من إمتى و آخر رد منهم ايه؟؟؟؟
و إن شاء الله هفيد الأعضاء أول معرف أي معلومة جديدة

والله يا ابو هند انا حاجز بعدك علطووول يوم 1\11 و لما كلمتهم من حوالى كام يوم قالولى فى نص 12 او اخر 12 .. نور الدين بيسلم اسرع من كده

**smsm2004w** · 03-12-2013 10:26 PM

طيب انا حجزت من صلاح سالم يوم 18 / 11 مانيوال وقالى يوم الحجز بالكتير نص شهر 12 هتستلم وممكن قبل كده كمان الكلام ده ايه ؟

**abohend** · 03-12-2013 10:46 PM

المشاركة الأصلية كتبت بواسطة smsm2004w

طيب انا حجزت من صلاح سالم يوم 18 / 11 مانيوال وقالى يوم الحجز بالكتير نص شهر 12 هتستلم وممكن قبل كده كمان الكلام ده ايه ؟

فطش طبعا
على الأقل نص واحد إلا لو واحد كنسل أو غير الحجز و انت استلمت مكانه
و ده أسلوب البيع للأسف ساعة الحجز الدنيا جميلة و كله تمام....مش بيقدروا ظروف الناس
تستلم علي خير إن شاء الله و في إنتظار تقريرك بعد الإستلام