الموضوع: بيجو 301 بعد النترا 2012

بسم الله الرحمن الرحيم
أول مشاركة لي وأرجو أن تكون مفيدة.....من حوالي 10 ايام اشتريت بيجو 301 هاي لاين بعد ان بعت الالنترا 2012 الشكل الجديد واللي قضت معايا حوالي سنتين (من اغسطس 2011) والحقيقة ان السنة الاخيرة كنت خايف جدا من موضوع السرقة المنتشرة للالنترا لان مفيهاش ايموبيلايزر وكمان كانت اول فئة يعني مفيهاش اي عوامل امان ...لا ايرباج ولا abs وانا بسوق على الدئري يوميا من المعادي للشيخ زايد وبشوف حوادث غريبة لكن طبعا الالنترا تصميمها الخارجي والداخلي متميز جدا وتسارعها ممتاز كمان استهلاكها للبنزين كويس جدا اما عيوبها صاجها زي الورق اقل خبطة او خربشة تعلم فيها كمان اتزانها في الملفات او المطبات سئ جدا (العربية بتعوم) واخيرا ارتفاعها قليل عن الارض وخصوصا لو فيه ركاب في الكنبة الخلفية علطول بتحك في المطبات.
للاسباب اللي فوق كنت عاوز عربية يتوفر فيها عوامل أمان من ايرباجز و abs ويكون فيها نقس كماليات الالنترا أو اكتر زي البلوتوث والجنوط وحساسات الركن ويكون سعرها مقارب لسعر بيع الالنترا أو اكتر حاجة بسيطة.
وبعد البحث ومتابعة مقالاتكم الوافية على المنتدى الجميل ده كان الاختيار للبيجو والحمد لله اعتقد انه اختيار موفق لان لقيت فيها كل اللي عاوزه من أمان وكماليات وسعر و كمان بعد سواقتي لها فثباتها ممتاز مقارنة بالالنترا كمان من الداخل واسعة جدا وكنت متخيل ان الالنترا أوسع لكن تقريبا نفس الحجم الداخلي والشنطة ما شاء الله واسعة بزيادة كمان الراديو والتحكم في الصوت ومستوي الصوت والبلوتوث شايف انه على مستوى عالي ايضا ارتفاع العربية عن الارض وخصوصا مع الجنوط 16 كويس بالنسبة لشوارعنا والتكييف فعال وقوي
الصالون الداخلي حلو جدا وشيك أكيد ان صالون الالنترا متدلع اكتر لكن صالون البيجو راقي
العيوب اللي شايفها لحد دلوقتي هو أماكن التخزين الداخلية قليلة جدا واللي موجوده مش عملية يعني بكون محتار احط الموبايل أو المحفظة أو كانز بيبسى فين (في الالنترا اماكن التخزين الداخلية كتير ومعمولة بذكاء) كمان حاسس ان استهلاك البنزين عالي شوية مقارنة بالالنترا وصوت العربية وخصوصا مع مروحة التكييف شغالة عالي جدا لكن ده عادي العربيات الفرنساوي عن تجربة سابقة مع الرينو
ديه مقارنة سريعة بين العربيتين بناء على تجربتي الشخصية ولا يزال للعربيات الاوروبي مزاق مختلف وأرجو من الله ان يعطيني خيرها ويبعد عن الجميع كل شر

المشاركة الأصلية كتبت بواسطة h hafez

لا الالنترا مش ضايعة ولكنها كانت بتعوم يعني في نفس الملف ونفس المطب اللي يتعامل معاه كل يوم (الملف الطالع من الاوتوستراد من جهة المعادي على الطريق الدائري لأكتوبر واخر الملف مطب) كان لازم اهدي خالص بالالنترا لانها بتحدف من الخلف لكن مع البيجو التبات افضل في نفس المكان ومن غير تهدية قوي
كمان مرة فرملت حامد شوية لاني اتفاجئت بمطب والالنترا لفت بالعرض في الشارع و الحمد لله ربنا ستر والشارع كان فاضي بس احقاقا للحق الالنترا عربية كويسة جدا بس مفيش حاجة كاملة تماما

كتير جدااا من ملاك الالنترا بيتكلمو بشكل واضح عن الحدفه الخلفيه دى

واعتقد ان لازم هيونداى تغيير التعليق الخلفى من تورشن بيم لمالتى لينك او حتى تركيب وتصميم التورشن تتغير لان اكيد بالشكاوى دى فيه عيب فنى خطير