الموضوع: العمر الافتراضي للسيارات الصينية ... حدث ولا حراج

أنا معايا اسبيرانزا 2008 وماشيه اكتر من عربية صاحب حضرتك

هى صحيح مش عربيتى من الزيرو لكن كانت مع واحد غيرى وكانت ماشيه طول السنين دى فى نفس الطرق وفى نفس الظروف

كل الى اقدر اقوله عنها انها عربيه هايله

شكلها الخارجى لم يتغير تقريبا عن شكلها زيرو
وطبعا لو كنت انا ( او صاحبها السابق ) بخبط فيها وبكبر دماغى هيبقى شكلها متبهدل زى اى عربيه صاحبها يهملها

وبشوفها تاكسيات ماليه الدنيا فى القاهره وفيه منها الى باين عليها المحافظه وفيه منها الى اكصدامها اتخبط او فانوسها اتكسر قام صاحبها مصلبه بشوية لزق

البارومه ؟ انا معنديش اى نوع او شكل من اشكال البارومه والحمد لله
وبرضه ارجع واقول اخبط او حك اى عربيه بحيث ان الطبقة الحاميه ( الدهان - المعجون ) يتخدش ثم اهمل فى اصلاحها - النتيجه بارومه من غير كلام يعنى مرة اخرى مسئولية صاحب العربيه مش غلطه من العربيه
يعنى الشكل الخارجى العام ده مسئولية صاحب العربيه تماما

الموتور بيفوت وخفيف بعد 40 الف كيلو ازاى ؟ طيب والتاكسيات الى شغالين عليها ورديتين وتلاته على مدار ال 24 ساعه ومواتيرها زى الفل دى تبقى ايه ؟

العربيات دى ممكن تعمل 500 كيلو واكتر على مدار اليوم يعنى بحسبه بسيطه لو الموتور هيفوت على 40 الف كان زمان العربيات دى بتطلع دخان ابيض بعد 80 يوم من شراها زيرو وده ماحصلش حتى بعد خمس وست سنين

انا موتورى قارب على ال 60 الف وما زال بحالته جديد والحمد لله
ومعنا فى قسم الأسبيرانزا ناس عدت ال 100 الف وال 150 الف وماشيين زى الفل

العربيه بتعوم على 50-60 ؟ برضه دى حاجه غريبه قوى انا معايا لانسر وكان قبلها فيرنا وكان قبلها اكسنت
وسوقت طبعا انواع تانيه كتير
افضلهم فى الثبات على الأطلاق هى الأسبيرانزا وده مش رأيى لوحدى
انا بسافر يوميا تقريبا للقاهره ومعايا زمايلى معاهم عربيات وبنروح كل مره فى عربية حد مننا يعنى كلنا يوميا مع بعض فى عربيه حد فينا
كل الناس اعجبت بثبات الأسبيرانزا لما طلعنا بيها اول مره وحصل مقارنات كتير ما بينها وما بين الانسر الى كنت بسافر بيها علطول والنتيجه كانت لصالح الأسبيرانزا ( مع احترامى الكامل للانسر طبعا دى عربيتى ودى عربيتى )

الفرامل كمان بالمناسبه افضلهم على الأطلاق هى الأسبيرانزا - الانسر اقرب حاجه ليها - لكن وجود اربع طنابير امامى وخلفى فى الأسبيرانزا مقابل اتنين امامى فقط فى كل الموديلات السابقة رجح الكفة لصالحها
ده طبعا بالأضافة الى abs

فيه حاجات زى جودة قطع الغيار وعمرها الأفتراضى مش هقدر اتكلم فيها لأن العربيه مش معايا من زمن كبير

لكن برضه انا عارف ان الحاجه الى ب 10 بجنيه فى الأسبيرانزا مطلوب منها تعيش سنه والحاجه الى ب 5 جنيه فى الانسر مطلوب منها تعيش اربع خمس سنين والحاجه الى ب 100 جنيه فى العربيات الألمانى مطلوب منها تعيش 10 سنين ( الأسعار والأزمنه لتقريب الفكره فقط وليس لها صلة بالواقع )

يبقى انا ببساطه هتعايش وهحترم القاعده دى و لو حاجه باظت منى كمان سنه هروح اغيرها فورا وانا عارف انى ركبت بفلوسى ( 10 جنيه )
وتفضل عربيتى عروسه مش ناقصها حاجه

المشكله بتحصل لما بتركب حاجه ب 10 جنيه وتتوقع انها تفضل شغاله خمس سنين زى الحاجه ام 50 جنيه فى عربيه تانيه وتبوظ منك وتسيبها لأنها باظت بسرعه وحاجه تبوظ جنب حاجه لغاية اما ينتهى بيك الحال راكب عربيه مفيهاش حاجه سليمه ونبدأ نعيب فى العربيه

معلش انا طولت فى الرد غصب عنى :)
لكن الخلاصه انا الحمد لله انا بشرايا للأسبيرانزا أخدت عربيه بضعف الفلوس الى دفعتها

تقبل تحياتى

العربيات الصينى اعتقد انها حظوط

صاحبك ده اكيد مبيعملش اي صيانات دوريه لعربيته