الموضوع: مازدا 3 2013 ام بيجو 301

المشاركة الأصلية كتبت بواسطة amrelsaqqa

كلامك بيقول كورولا بصراحة
ولو هختار بين البيجو والمازدا في حدود الـ 150 الف ، لا هاخد المازدا ( كعربية قصاد عربية )، مش عشان البيجو وحشة ، بس المازدا فئة اعلى وفي نفس الوقت يابانى ، المازدا مشكلتها في توكيلها وضعف انتشارها وقطع غيارها المبالغ في سعرها جدااااااااا ، انصحك تراجع اسعار قطع الغيار وتشوف رأي الناس في التوكيل وكدة لان ده عامل مهم جدا في الشراء ..

انما لو عربية لعربية مع انى ما ركبتش المازدا 2013 بس هختارها عن البيجو لان البيجو حتى وهى هايلاين مازالت فئة اقتصادية ، والمازدا فئة متوسطة حتى لو فاضية ، القرار ليك في النهاية ، وانا شايف من كلامك انك محتاج عربية اعتمادية وبس ومش هتمشى بيها كتير اوى وما يهمكش الركوبة ومتعة السواقة والشد والثبات والكلام ده ... ، فلو مكانك هفكر جديا في الكورولا لانها عربية مبسطة ومعروفة في السوق واعتمادية جدا وفي نفس الوقت ماسكة سعر تكسب فيها في اي وقت لما تيجى تبيعها ، عكس المازدا مثلا اللى هتنزل جامد لما تيجى تبيعها خصوصا بعد فترة

كمان المازدا عيوبها في وجهة نظري انها هتبقى ضيقة شوية ومش عائلية اوى ، يعنى حتى الشنطة 430 لتر مقابل 506 في البيجو وقاعدة عجلات اقصر من البيجو مع ان الطول الكلى اطول ، بردو موتورها مش الجامد ، يعنى تقريبا 105 حصان و عزم 144 نيوتن على بودي مش خفيف ، مقابل 115 في البيجو وعزم 150 نيوتن ، ولكن فتيس المازدا هيكون افضل في رأيي والثبات بديهيا لصالح المازدا الا لو حد جرب العربيتين وله رأي تانى ، بالنسبة مثلا لاستهلاك البنزين اعتقد والله اعلم ان الكورولا هتبقى افضلهم في النقطة دى ، الخامات الداخلية والفخامة هتبقى المازدا افضلهم

بعد ده كله انا شايف المازدا كعربية ممتازة ولو مفيهاش مشكلة التوكيل وقطع الغيار هفكر فيها جديا وافضلها عن البيجو ، ولكن بالنسبة لى موضوع الانتشار وقطع الغيار بيخلينى شخصيا اشيلها من حساباتى تماما

اصل المشكلة يا استاذ عمرو ان انا هجيب زيرو وفي حد اقصي 150 الف جنية فا شايف ان الكرولا مغالي في سعرها اوي وانا يهمني انها تكون عائلية بردو وانا بعمل في حدود 12 الف كيلو في السنة كحد اقصي ف انا محتار جدا بين ال اتنين