سؤال وعايز مصدر موثوق منه !!!

**gangsta6600** · 09-12-2013 07:06 PM

السلام عليكم
انا عايز اعرف ارتفاع تويوتا كورولا 2013 عن الارض !! وعايز اتأكد من المعلومة لانى كل شوية اسمع رقم !! انا عايز اعرفه من موقع تويوتا لو امكن وشكرا ....

**Mohamed.Hany** · 09-12-2013 07:46 PM

تويوتا 2013 مفيش منها جديد في التوكيل.
اللي موجود فقط خليجى بدون ضمان و ارتفاعها 15 سم و كانت معايا و مبتحكش خالص عالية جدا .
اما لو قصدك علي كوروﻻ 2014 الشكل الجديد التركي ارتفاعها 12.5 سم و التوكيل عمل تعديل للارتفاع للي عاوز علي اول السنة لكن ارتفاعها مرضى بالنسبة لي مش بتحك في كل المطبات زي مالناس بتقول بس محتاجة حرص بسيط مش جامد يعني و لكن الثبات واضح في العربية جامد جداااا.
و لو بتفكر في 2013 انصحك تصرف نظر و تشوف ال 2014 حاجة تانية خالص

**bassem.naguib** · 09-12-2013 08:30 PM

بالمللي 14.7سم عند أقل نقطة فيها .. وأؤيد رأي psycholain أن 2014 أفضل من جميع النواحي

**Mohamed.Hany** · 10-12-2013 12:12 PM

المشاركة الأصلية كتبت بواسطة esam_ayad

ياريت حضرتك تقولنا الفرق بين الموديل القديم 2013 والموديل الجديد 2014 بحكم امتلاكك لها.
لأني بفكر جديا في كورولا فول اوبشنز أو النترا أو سيراتو فول أوبشنز.

تحياتي لحضرتك
العربيتين يختلفو عن بعض تماما و اقدر اقول بصراحة اني اتنقلت ناقلة تانية بالعربية.
2013 عربية ناعمة جدا و تقفيل ياباني ولكن التركي تقفيله بجد مفيش غلطة و مش قادر بجد اطلع اي ديفوه او اقول الياباني احس في التقفيل.بس تحس انها بتاعة واحد كبير في السن ومفيهاش اوبشنز تحسها فاضية بس عربية عملية جدا و ممتعة في السواقة.
و الفوج لايت بتاعها قوى جدا وفيها سبويلر و فتحة سقف و الكلاكس بتاعها قوى جدا هي دى مميزات 2013 عن 2014 بالتجربة والمللي
اما 2014 تزيد
وسع داخلي ، صالون عالمي ، حساسات ركن امامية و خلفية ، بلوتوث ، مثبت سرعة ، اوتو بارك، انوار ليدسبورت موود ، سخان بالمرايات ، فتح الشنطة من الريموت ، esp ، trc ده في الفئة التانية اما الهاي لاين تزيد 7 ايرباج كاميرا خلفية ، كاسيت تاتش ، مرايات تعتيم ، حساست مطر و ضوء ، رشاشات فوانيس ، مفتاح بصمة .
عيبها حتي الان صوت الكلاكس مش عالي مقارنة ب 2013، الفوج لايت مش قوى مقارنة ب 2013
الناس بتقول واطية بس ده مش خقيقي عشان لو مظبط الكاوتش زي الكتالوج مش بتحك و التوكيل هيعمل تعديل للارتفاع للي عاوز مع اني مش شايفه مهم ﻷن الناس بتظبط الكاوتش علي 28 و الكتالوج بيقول 33 تخيل الفرق فأكيد ممكن تحك لو مطب وحش.
و اهم ميزة الثبااااااات فرق السما بالارض العربية مكلبشة بجد.
بس نصيحة لوجه الله عشان الالنترا مع حمايا و رجعت بيها من اسكندرية للقاهرة العربية ثباتها مش اد كده و كانت بتعوم جامد من ورا خصوصا بعد ال 120 كنت بخاف اجرى بصراحة

**Mohamed.Hany** · 10-12-2013 03:01 PM

المشاركة الأصلية كتبت بواسطة gangsta6600

انا متفق معاك فى كل اللى قلته على 2013 عشان هيا معايا
وان شاء الله ناويين نجيب عربية تانى بس انا بفكر ان التانية تبقى فلوانس !! ايه رأيك؟؟

الفلوانس عربية ممتازة بس ينقصها في عوامل الامان ال ESP و ال TRC
والعاملين دول بيتوفرو في كورولا 2014 و من اول فئة.
فالكورولا تتفوق عليها في هذه النقاط, وده تقرير لل EURO N CAP فيه تفصيل عوامل الامان للعربيتين. للعلم الفلوانس في التقرير ده فيها ESP و TRCوده مزودها 3 نقاط لكن اللي في مصر مفيهاش في اى فئة. و الكورولا قلت 3 نقاط فيه عشان مفيهاش مثبت سرعة و لكن النسخة المصرية فيها مثبت سرعة.
Renault Fluence ZE | Euro NCAP - For safer cars crash test safety rating
Toyota Corolla | Euro NCAP - For safer cars crash test safety rating

اما بالنسبة للشكل فدي حاجة نسبية, اداءموتور الكورولا رهييب و كمالياتها فوق الممتازة كفاية الاوتو بارك مبينزلش الا في عربيات متقلش عن نصف مليون وده قيديو مصوره بنفسي للاوتو بارك :
http://www.nilemotors.net/Nile/39219...auto-park.html

استهلاك البنزين 8.7 لتر لكل 100 كم مع اني لسه بليين و كل مشاويرى داخل القاهرة وده طبعا عشان فيها النظام الذكي ECO بيشتغل و يقفل حسب دوستك للبنزين.
اما ماشي بالعربية 900 كم فولت مرتين مرة اول مركبتها لانها بتيجي فاضية و مرة كمان قبل مالتانك يفضي ربعه و فاضل فيها ربع التنك .
الصيانة و اعادة البيع ممتازين في الكورولا يكفي اني اقولك لما بعت الكورولا 2011 كسبت فوق ثمنها .