الموضوع: تجربة شراء بيجو301 و الإحساس بالحسرة و الغضب و الدهشة

انتهت اخيرا خطوات شراء 301 التى حلمت بإقتنائها من فترة و أود سرد تجربتى القصيرة معها
كان الشراء من اتومبيل الحجاز بشارع الحجاز هايلاين بترولى ثمنها 142000
استلمت العربية لكن لسة الترخيص لتأخر فى الاوراق
بدأت قصتى مع البيجو بالمشاكل ............ حيث كنت أقضى ساعات مع البيجو على النت مما جعل زوجتى تجند ابنى سيف-4 سنوات-للتجسس لصالحها ليأتى من خلفى ثم يذهب مسرعا ليخبرها هامسا-بصوت مسموع ليا طبعا-بابا مش بيذاكر و بيتفرج على العربيات
و بعد شراء السيارة و قيادتها احسست بغضب رهيب و حسرة لا حدود لها.......كيف توجد مثل هذه السيارات الرائعة و تقابلنا كلمات مثل اعادة البيع و اشترى للسوق و كل هذا الكلام الفارغ
و أحسست بالحسرة لأنى كنت على وشك السفر اكثر من مرة للسعودية و من أبسط تفاصيل العقد كان الحصول على أى سيارة أتمناها بسهولة شديدة بدون جمارك تقطم الوسط أو عقليات تجعلك تتردد فى الإختيار
أخذت العربية للمستشفى فى طريقى للبيت و هناك كان الإنبهار و الأسئلة و الفرجة من الزملاء و الكل منبهر لدرجة انى بعد ما نزلت مع رابع زميل اوريهاله قلت لهم أنا تعبت و بافكر فى حل من اثنين يا أعملكم محاضرة أجاوب فيها على كل الأسئلة مرة واحدة يا إما أعمل لكل واحد نسخة من المفتاح ينزل يتفرج براحته و يريحنى
طبعا المقارنة هتكون اساسا بينها و بين الفيرنا اوتوماتيك عربيتى السابقة و مع انى ركبت العربيات التالية مع الزملاء و الاقارب بس مش للدرجة اللى تخلينى اقارنها بيهم: نيسان-لانسر-كارينز-هوندا سيفيك-افيو-اوبترا-سيراتو
لكن عامة بعد ركوب البيجو حسيت انها تفوق كل ما سبق
عايز الاول اقول مميزات الفيرنا عن البيجو: كانت أماكن التخزين رائعة و مريحة و خاصة مكان الاكواب فى السفر تحفة-حد الزجاج الامامى كان واطى و بشوف الكبوت كله-تكييفها ممتاز
فى المقابل كانت ريشة-فراملها ضعيفة-واطية لدرجة انى كنت بحس انى تحت الارض و انا على الكرسى
نيجى للبيجو: الموتور شدنى صوته كان عالى جدا جدا و ابتدا يخف و يعلى زى ما يكون هيتعود عليا زى ما قال الزملاء سابقا
النعومة و العفشة ما شاء الله...كنت بعرف انى عديت المطب من صوت هبد العربيات المجاورة
الرؤية الامامية برغم عدم رؤية الكبوت مريحة و المرايات الجانبية رائعة و كبيرة و شيك لكن المراية الداخلية صغيرة
التابلوه و المنظر العام فخم مع بساطته و احساس انك راكب بيجو و اسم بيجو و تفرد العربية و قلتها فى الشارع يديك احساس بالتميز....انا مش مع اللى قلقان و عايز العربية تملى الشوارع
أنا كنت راكب أكتر عربية نشوفها فى مصر و ما كنتش بحس بأن إنشكاح بالعكس كنت بحس بالضيق و انى فى معرض عربيات فيرنا مش فى الشارع
العربية لسة فيها كتير و انا مش مستعجل على إكتشافها
عايز ردود الوحوش
لكن بأعتذر مقدما انى هاكون مشغول لمدة اسبوع كامل يمكن مش هاقدر ارد على الردود
ملحوظة: الاسبوع كله هاقضيه جوه العربية هههههههههههههههه

المشاركة الأصلية كتبت بواسطة silent~dream

ما شاء الله و مبروك و ربنا يباركلك فيها و يكفيك شرها

ربنا يبارك فى حضرتك و ألف شكر يا افندم