ثانى الرحلات الإستكشافية لبيجو 301

**د عمرو العمرجى** · 16-12-2013 09:14 PM

الحمد لله رخصت العربية امس الاحد و حصل شئ حابب اقوله
من ساعة ما استلمت العربية و صوت الموتور عالى بدرجة مزعجة و السرعة مش بتزيد عن 40 و لو دوست على دواسة البنزين عداد ال اربى ام يعلى لغاية 6 او 7 و فجاة العربية سرعتها تزيد و العداد يرجع يوطى
انا خمنت انها ماشية بنظام المانيوال بس ما كنتش حابب اضغط على زرار و لا حاجة....من اللى الواحد متوقعه من التكنولوجيا اللى فيها خفت ادوس على زرار يحدفنى على الكرسى اللى ورا او على شنطة العربية مثلا
المهم رحت على صلاح سالم و المهندس مينا ركب معايا و بمجرد ما قولت له المشكلة اتصلحت....انا كنت بجيب عصاية الفتيس للآخر و بعدين احودها شمال فتقلب مانيوال و الصح انها تكون على ال d لتحت و هتكون مكتوبة على الشاشة d و الحمد لله اشتغل الاوتو بتاعها و الصوت اختفى
انا حبيت اقول ده لانى قلت فى التقرير الاول ان صوت الموتور كان عالى جدا
المهم نيجى للعربية
العربية و اللى فيها ممكن نقسمه لتلات اقسام
1- حاجات مش موجودة او ناقصة و مفيش مبرر لعدم وجودها و ممكن تضايق الواحد خاصة ان العربية للشباب و الاسر الصغيرة و اللى عايزة بجانب التوصيل و الامان ..المتعة و الرفاهية زى مثلا : نور الجزء الخلفى و حامل اكواب و وجود مرايات كهربا فى البيز لاين
2- حاجات نستغربها لتغيرها عن اللى تعودنا عليه لكن بسرعة بتلاقيك تعودت عليها و ممكن تلاقى لها ميزة زى: لمبة الحرارة و انا مع احمد امين فى انها كده افضل لان الواحد ممكن يقعد شهور ما يبصش فى مؤشر الحرارة لكن اللمبة تنبهك اسرع و زراير الزجاج اللى جنب الفتيس و حصل موقف حسيت انها كده افضل..كنت سايق و جنبى المدام و ايدى مشغولة بالتليفون و لمحت ولد بيتمشى بين العربيات و يبحلق فى الناس بشكل ما ريحنيش و كنا فى اشارة و قلت لمراتى اقفلى زجاجى بسرعة و لو كانت الزراير ناحيتى ما كانتش قفلتها
و برضه امكانية فتح اى باب فى اى لحظة و فتح اللوك بتاع العربية كلها.... غريب لكن ممكن يكون هدفه الامان و انك تنزل من العربية بسرعة لاى طارئ لا قدر الله
3- اشياء تبهرك و تجعلك سعيد بالعربية من اول استخدام ...مش عايز اقول زى ايه لانها كتير...نعومة العربية..شياكة الفتيس و الشاشة و سهولة فهمهم حتى من غير الكتالوج..الباور الجميل..صوت الكاسيت...التكييف..عوامل الامان.. الثبات الواضح من اول لحظة..المساحات الداخلية للكراسى و الشنطة...علو العربية
الحقيقة انا شايف ان السؤال اللى بتسأله الناس و اللى بيقول: ليه هتركب بيجو؟...المفروض يتلغى و يبقى بداله..انت ليه هتركب حاجة غير البيجو؟

**nonalaziza** · 16-12-2013 09:52 PM

ربنا يباركلك فيها و يديك خيرها و يكفيك شرها.

**J A G U A R** · 16-12-2013 10:00 PM

الف مبرووك الترخيص .. وتقرير ممتاز .

**د عمرو العمرجى** · 16-12-2013 10:08 PM

المشاركة الأصلية كتبت بواسطة nonalaziza

ربنا يباركلك فيها و يديك خيرها و يكفيك شرها.

الله يبارك فيكى عقبالك ان شاء الله

**د عمرو العمرجى** · 16-12-2013 10:09 PM

المشاركة الأصلية كتبت بواسطة j a g u a r

الف مبرووك الترخيص .. وتقرير ممتاز .

الله يبارك في حضرتك و شكرا لذوقك

**د عمرو العمرجى** · 16-12-2013 10:14 PM

المشاركة الأصلية كتبت بواسطة m.emam

الف مبروك العربية والرخصة يا د/عمرو وربنا يرزقك خيرها ويكفيك شرها ونستلم على خير احنا كمان ان شاء الله...كنت بس حابب اعرف من حضرتك اجراءات وتكلفة الترخيص بتاعها كام بالضبط؟

الله يبارك فيك و يا رب تستلم على خير بسرعة و نبارك لك
الاجراءات بسيطة و روتينية و انا كان معايا واحد قريبى خلصهالى و التكلفة فى حدود 900 جنيه

**saddam** · 16-12-2013 11:07 PM

صديقي المواطن
إختيار موفق وعربية جميلة وده زمنها والمستقبل ليها وتقرير جيد ومتحرمناش من كل جديد ليك لفائدة اﻷعضاء الزملاء في المنتدى وربنا يديمها خيمة فوق رأسك
وهذا ما لزم بيانه ودمتم
وبالتوفيق وإلى اﻷمام
ومن نصر إلى نصر
ودمتم للنضال

**د عمرو العمرجى** · 16-12-2013 11:27 PM

المشاركة الأصلية كتبت بواسطة saddam

صديقي المواطن
إختيار موفق وعربية جميلة وده زمنها والمستقبل ليها وتقرير جيد ومتحرمناش من كل جديد ليك لفائدة اﻷعضاء الزملاء في المنتدى وربنا يديمها خيمة فوق رأسك
وهذا ما لزم بيانه ودمتم
وبالتوفيق وإلى اﻷمام
ومن نصر إلى نصر
ودمتم للنضال

الله يبارك فى حضرتك يا استاذ صدام
كلامك عنها فى المنتدى شجعنى و شكرا ليك و شكرا لكل مساهماتك القيمة و ارائك العاقلة