مشكلة فى تجديد السيارة ومحتاج راى الخبراء

**moumen_hs** · 23-12-2013 10:20 AM

السلام عليكم ورحمة الله
أنا ياجماعة عندى مشكلة هامة جدا ومش عارف الحل اية دلوقتى
1-من سنتين ونص كنت بعت سيارة بتوكيل بيع لة وللغير والى اشتراها بعها برضو بالتوكيل والى الان السيارة باسمعى .
2- المهم أنا عزلت من المعادى الى المنيل وغيرت البطاقة ثم اشتريت عربية جديدة من سنتين وقمت بترخيصها فى المرور الجديد عين الصيرة طبقا للبطاقة الجديدة ولما جيت أرخص طبعا طلع عندى سيارة تانية المهم دفعت ضريبة ترفيهية سنتين وخلصنا
3- لما جيت أجدد السنة الى بقية بعد مادفعت التامين والضريبة شهادة المخالفات من المرور الجديد الى أنا تابعة وجدو السيارة لسة باسمى رفضوا يجددوا وقلتلهم ادفع الضريبة الترفيهية ولكن للاسف المراجع رفض وقلى النظام أتغير أنت عندك عربية فى حتة تانية روح رخص هناك ياعم أنا مليش علاقة بالمرور القديم خالص والبطاقة الجديدة تبعكوا وطبعا المرور القديم لو أتنطتت عمرة ماهيرخص ليا ابدا المهم المرور الحالى طالب مايثبت أنى بعت السيارة ياعم دية بعتها بتوكيل ومعرفش الى بعتلة فين ولا الى بعلة فين . أرجوا الافادة من السادة الخبراء لانة العربية الترخيص خلص ومش عارف أعمل اية
ياترا فى طريقة لثبات انى بعت أو تعهد موثق مثلا منى أو خلافة ارجوا النصيحة للاهمية وشكرا

**amr011111** · 23-12-2013 10:26 AM

متابع

**john55** · 23-12-2013 10:56 AM

ممكن حضرتك تشوف الضابط اللي موجود داخل وحده المرور وتحكيله علي المشكله واكيد هيلاقي ليها حل مشكله التوكيلات كتيره واكيد هما عارفيين حلها ايه وشكرا

**menaraafat85** · 23-12-2013 11:28 AM

أولا المفروض حضرتك يكون معاك صورة من التوكيل اللى بعت بيه
ثانيا لو مش معاك ممكن تروح الشهر العقارى اللى عملت فيه التوكيل وتقولهم على تاريخ عمل التوكيل وتطلع مستخرج رسمى من هناك وتاخده توديه المرور عشان تثبت انك بعتها
ثالثا (وده مالوش دعوة باستفسار حضرتك) لما ادارة المرور حلوة اهيه وعندها بيانات كل واحد عنده كام عربية ومتسجلة فين أومال ليه الغلب اللى بيعملوه فينا .. ولازم ترخص فى المرور التابع ليه ولازم تجيب شهادة مش عارف اسمها ايه وموافقة مش عارف مييين طب ماهو ممكن نطلع اى بيانات من أى حتة أهوه؟؟؟؟؟؟؟؟؟؟!!!!!!!!!!!!!!!!!!!!!

**moumen_hs** · 23-12-2013 11:48 AM

المشاركة الأصلية كتبت بواسطة menaraafat85

أولا المفروض حضرتك يكون معاك صورة من التوكيل اللى بعت بيه
ثانيا لو مش معاك ممكن تروح الشهر العقارى اللى عملت فيه التوكيل وتقولهم على تاريخ عمل التوكيل وتطلع مستخرج رسمى من هناك وتاخده توديه المرور عشان تثبت انك بعتها
ثالثا (وده مالوش دعوة باستفسار حضرتك) لما ادارة المرور حلوة اهيه وعندها بيانات كل واحد عنده كام عربية ومتسجلة فين أومال ليه الغلب اللى بيعملوه فينا .. ولازم ترخص فى المرور التابع ليه ولازم تجيب شهادة مش عارف اسمها ايه وموافقة مش عارف مييين طب ماهو ممكن نطلع اى بيانات من أى حتة أهوه؟؟؟؟؟؟؟؟؟؟!!!!!!!!!!!!!!!!!!!!!

هو دة الى هخدوا معايا صورة التوكيل مع أنة مش معترف بية وربنا يسهل بس عايز أطمن حضرتك ان الحكومة عارفة كويس من عندة أية علشان لما يحب يجيب عربية تانى تظبطة ضريبة ترفهية أنما تساعد فى حل مشكلة يبقى أنت أكيد مش فمصر

**menaraafat85** · 23-12-2013 12:05 PM

المشاركة الأصلية كتبت بواسطة moumen_hs

هو دة الى هخدوا معايا صورة التوكيل مع أنة مش معترف بية وربنا يسهل بس عايز أطمن حضرتك ان الحكومة عارفة كويس من عندة أية علشان لما يحب يجيب عربية تانى تظبطة ضريبة ترفهية أنما تساعد فى حل مشكلة يبقى أنت أكيد مش فمصر

حضرتك - وبكل أسف- معاك حق
بالنسبة لصورة التوكيل مش حضرتك مش معترف بيه ده ممكن الموظف يتلكك ومايعترفش بيه
بس جرب برضه يمكن تعدى ولو زنقت خالص قوله أجيبلك مستخرج رسمى شوف كدا يمكن يوافق

**wardet** · 24-12-2013 01:01 PM

تجيب من الشهر العقاري التوكيل وتروح بيه المرور
احنا لما جينا نرخص العربية الجديدة ابويا راح مع اللى اشتري العربية القديمة
وجاب التوكيل واديناه للمرور حطوه فى الدوسيه وخلاص ومدفعناش ضريبة رفاهية كمان

**moumen_hs** · 25-12-2013 11:05 AM

الحمد للة تم تجديد السيارة بعد تقديم صورة التوكيلات للموظف وسداد الضريبة الترفيهية وبمساعدةالموضف فى الشرح لزمية المراجع تم الاكتفاء بما تقدم وتم التجديد وأستلام الرخصة
وشكرا لكل الاعضاء الى تفاعلو معايا بس نصيحة ياريت بلاش بتوكيل مهما كان السبب المشترى يسجل فى الشهر العقارى وميمديش مشترى لو عايز يستفيد بالرخصة وتاخد منة عقد البيع صورة للزمن القادم وشكرا

**menaraafat85** · 25-12-2013 11:39 AM

المشاركة الأصلية كتبت بواسطة moumen_hs

الحمد لله تم تجديد السيارة بعد تقديم صورة التوكيلات للموظف وسداد الضريبة الترفيهية وبمساعدةالموضف فى الشرح لزمية المراجع تم الاكتفاء بما تقدم وتم التجديد وأستلام الرخصة
وشكرا لكل الاعضاء الى تفاعلو معايا بس نصيحة ياريت بلاش بتوكيل مهما كان السبب المشترى يسجل فى الشهر العقارى وميمديش مشترى لو عايز يستفيد بالرخصة وتاخد منة عقد البيع صورة للزمن القادم وشكرا

مبروك التجديد ومعاك حق فى اللى قولته