الموضوع: تقرير مبدئي عن كيا سبورتاج 2014 اول فئة و اسباب تفضيلها عن مثيلاتها بنفس الفئة

بسم الله
فى البداية احب اشكر جميع اصدقائى فى المنتدى فهم لم يبخلو بالنصيحة و خاصة ان كنت محتار بين اكتر من عربية و يعد استشارات و عمل مقارنات كتييييييييييييير و اللف على المعارض تم الاستقرار على السبورتاج 2014 اول فئة مع ان بصراحة هى فى الاول مكنتش فى دماغى "لان كنت بقول ان سعرها كتير على عربية كورى و خاصة انه فيه بدائل فى الفئة السعرية دى , ده غيران كنت فاكر ان الموتور gdi لازم بنزين 95 علشان نسبة الانضغاط 1:11 "

احب اوضح ان كان معايا تيجو 1600 موديل 2009 و بصراحة مكنتش مزعلانى فحاجة و لكن كنت عايز اغير لفئة اعلى
من بين العربيات اللى كنت حاططها فى المقارنة " bmw x1 , نيسان قشقاى , جوك ,سكودا ياتى , هيونداى ix 35 و اخيرا السبورتاج "

طبعا السؤال اللى حييجى على بالكوا ايه اللى خلانى افضل السبورتاج على ماسبق ذكره خصوصا ان فيهم ال bmw x1 !!!!

نبدأ بالقشقاى
طبعا انا قريت كل التقارير فى المنتدى عنها و عرفت انا من اهم عيوبها الفتيس ال Cvt سحبه ضعيف و محتاج طريقة معينة فى السواقة علشان تتأقلم معه و لكن بالنسبة لى مش دى النقطة الجوهرية
اما قعدت فيها حسيت انها ضيقة و خاصة الكنبة الخلفية ده غير انها فقيرة اوى من جوة و معجبنيش شكل الطابلوه و الدركسيون ده غير انهم ببيعوها باوفر برايس من 10 الى 15 الف لاما انتظر 5 شهور فى الاقل فقولت بناقص منها خالص

بالنسبة للجوك
كان عاجبنى اوى شكلها بس للاسف ضيقة من ورا و كمان شنتطها صغيرة فمش حتنفع معايا خصوصا لو فيه احجام كبيرة حتركب ورا ولو حد طويل شوية قعد ورا دماغه حتخبط فى السقف

بالنسبة للسكودا ياتى
العربية دى جامدة و ممتازة جدا و عاملة شغل جامد فى اوربا بس بالنسبة لى يعيبها شكلها "عامل زى الكشك المتحرك" و طبعا غير مشكلة الفتيس ال dsg اللى لسه عليه كلام

بالنسبة لل x1
طبعا البى م كماركة لاغبار عليها و هيا بصراحة من جوة تحفة "بتكلم عن موديل 2014 " و خاصة شاشة ال i drive 8.8 بوصة و الخامات و شكل الطابلوه روعة و فخمة جدا طبعا و لكن يعبها بالنسبة لى ضيقة من ورا و كمان شكلها الخارجى حسيت انها مديا على هاتشباك طويلة مش جيب و لا suv ده غير محسيتش انها عالية عن الارض زى باقى الفئات اللى ذكرتها , بصراحة مفيش فرق يذكر بينها و بين السيدان العادية يمكن اعلى بفرق بسيط اوى ده غير ان سعرها 340 الف جنيه فكنت حدفع جزء و حقسط الباقى

بالنسبة للهيونداى ix 35
طبعا شكلها ممتاز وصالونها ممتاز وهو نفس موتور السبورتاج بس بقدرة حصانية اقل "135 حصان" بس علشان ينفع تتركب و تبقى اخد اوبشن معقول يبقى مش اقل من الفئة الثانية و سعرها كان 224 الف جنيه ده غير ان توكيلها غبور و سمعته هنا فى المنتدى مش و لابد "طبعا ده عن سمع لكن انا مجربتوش علشان اقدر احكم عليه كويس"

نيجى بقى للسبورتاج
زى اما قلت ان كنت مستبعدها فى الاول بس مكنتش اتفرجت عليه من جوة لكن فى مرة من المرات و ازدياد الحيرة عندى كنت لسه نازل من سكودا ياتى فى المعرض و كان فيه سبورتاج واقفة فقلت اروح اتفرج عليها مش حخسر حاجة , بصراحة فوجئت انها بالجمال و الفخامة دى من جوة و حسيت انها اوسع من جميع ما تم ذكره سواء من الامام او الكنبة الخلفية او الشنطة و بصراحة فرق كبير عن القاشقى و الجوك فى الشكل الداخلى و الخارجى
فقلت اشوف اسعارها الحالية و الاوبشن اللى ف 2014 فلاقيت ان اول فئة اللى هى ب 208 الف فيها مثبت سرعة و بلوتوث و حساس مطر "الكلام ده طبعا مكنش موجود فى الموديلات السابقة فى اول فئة" و زجاج ملون كمان دع غير ان الجنط ال 16 شكله حلو عليها غير الix35 الجنط ال16 فى اول فئة شكله مش اد كدة عليها و دى كانت ب 204 ألف فمنطقيا كدة قولت ان السبورتاج اول فئة كافية جدا و السعر الى حد ما مناسب عليها خاصة بعد الزيادات الاخيرة فى الاسعار
فبدأ يكون فى ارتياح داخلى للشكل من جوة و من برة
بعد كدة شوفت عنها مواضيع هنا فى المنتدى و بعض المنتديات الاجنبية فلم الاحظ عيوب جوهرية تذكر كمان وجدت انها اخدة تقييمات برة اعلى من الx1
بالنسبة لوضوع بنزين 95 اللى كان قالقنى طبعا انا مبخش بكلام مندبى المبيعات و الكلام ده "بس اما قريت فى الكتالوج لاقيت مكتوب ينصح باستخدام بنزين 91 الى 98 خالى من الرصاص و فعلا بعد اما جبتها حطيت 92و مفيش ادنى مشكلة و لا تسقيف و لا الهوا الحمد لله

نيجى للمميزات و العيوب بعد استخدام 600 كيلو
المميزات :
- طبعا الشكل الخارجى و الداخلى المميز
- الوسع الداخلى
-السحب معقول جدا بس لسه برده ماقدرش احكم الواقتى لان بحاول مخليش الر بى م يعدى ال3 علشان التليين بس اما اكون عايز اخطى عربيى الحمد لله بخطيها بسهولة جدا
- العفشة ولاهى ناشفة و لا ناعمة اوى بس اهى اقرب للنعومية خاصة مع عين القط و الحفر
-ارتفاع ممتاز عن الارض
-الخامات الداخلية ممتازة حتى فى اول قئة سواء خامات الطابلوه او الأبواب أو الفرش الداخلى مع انه قماش بس ممتاز
-ثبات ممتاز بالنسبة لارتفاعها عن الارض "اعلى سرعها جبتها 150 ومش لمدة كبيرة و مرتدش ازود عن كدة علشان التليين مش عارف اللى انا عملته صح كدة و لا غلط , لانه كاتبين فى الكتالوج مزودش عن 100 اول 1000 كيلو "
العيوب :
- حاسس ان استهلاك البنزين عالى شوية خاصة داخل البلد يعنى اخر تفويلة ال 18 لتر عاملين 120 كيلو
و على السفر ال 20 لتر تقريبا بيعملو 200 كيلو "يمكن علشان لسه فى الاول
و بصراحة لسه مكتشفتش عيوب تانبة لان برده فترة الاستخدام مش كافية علشان احكم عليها بشكل كامل

و شكرا