الموضوع: ***تقرير شامل بالصور عن الاليزية بعد الصيانه الاولى

بسم الله الرحمن الرحيم

تقريرى عن الاليزيه بعد صيانة الــ 2000 كم ، فالبداية نتكلم شوية العربية من الداخل و الخارج

عربيتى سوده من الداخل والخارج هاى لاين ( جبتها من اباظه اللى فى سابا باشا - الاسكندرية بــ 132.000 جم والاستلام كان فى خلال يوم واحد ) رخصت 3 سنين فى مرور ابيس ب 1650 جم

شكل العربية من الخارج







الكاوتش جوود والدفعات القديمة كان بينزل ميشلان


المرايات طريقة قفلها غريبة شويه وللاسف مش كهربا





ودا شكل الموتور


علامة بيجو موجوده فى اماكن كتير فى العربيه
1- على البطارية

2- فى جنب الموتور

3- على الازاز اللى ورا


مش عارف بقى اذا كانت علامة ستروين موجوده على ال 301 ولا لأ

ودا فيديو من مصنع بيجو اثناء تصنيع الاليزية والـ 301
Citroën C-Elysée Peugeot 301 Producción en Vigo España - YouTube

انا بس ذكرت الحاجات دى عشان الناس اللى بتتكلم وبتقول ان ال 301 افضل من الاليزية ، الفرق يا جماعه الجنط فى البيجو 16 انش والستروين 15 انش ، و وكيل بيجو افضل من ستروين
بصراحه الاليزيه مش واخده حقها فى الدعايه خالص ودا سبب انها مش منتشره
بس فرق السعر يخليك تفكر فى الستروين وكمان شكلها انا شايفه افضل من البيجو

كنت فى القاهره من فتره وشوفت اعلان للاليزية على المحور الاعلان بيقول كده بالظبط " الاليزية الصالون الجديد اسال عنها " وحتى مش موجود صورة للعربيه ،، وشوفت اعلان تانى عندنا فى الاسكندرية عند اخر الطريق الصحرواى عند كارفور مكتوب فيه نفس اللى فات بس موجود صوره للعربيه باهته جدا !!!

نرجع للصور تانى ونشوف العربية من جوا

العربية واسعه جدا ،، بس انا مش عاجبنى المادة اللى مصنوع منها الكراسى حاسس انه سفنج ضعيف اووى "وهيكش"او هيهبط مع الوقت زى المراتب السفنج التعبانه دى لاحظت دا وهجبلكم صوره للكرسى وهو شكله متبهدل






شكل الباب الامامى


والباب الخلفى


شكل العدادات والتنبيهات كلها شغاله
علامة ال ABS موجوده جنب الاشارة الشمال



السماعات موجوده فى التابلو الامامى والخلفى ( مفيش سماعات فى الابواب )

والسماعه اليمين فى التابوا الامامى موجود فى اير باج للراكب والاير باج التانية موجوده فى الدريكسوين طبعا !

ودا شكل السماعه اللى قدام والاير باج

ودول السماعات اللى ورا 2 متصلين ببعض ( بعتذر عن جوده الصوره )


الفتيس : اتوماتيك ستيب ترونيك اربع نقلات مع وضعى الاسبورت مود للقيادة الرياضية ( S) ونظام السير على الاراضى الزلقة و الجليد ( *)



ودا اللى مكتوب فى الكاتالوج عن وضع الاسبورت و القياده على الجليد


اماكن التخزين فى العربية كويسه الى حد ما ، ، المسند و الابواب الاماميه والدرج الواااسع جدا
كان نفسى يكون فيها مكان للموبايل والمحفظه تحت الكاسيت زى الاوبترا كدا :D


التحكم فى المرياات و فتح الشنطه والبكرة اللى على الشمال دى عشان مستوى الاضاءه ( يعنى ممكن تخلى الاضاءه بتاعت الكشاف الكبير تقريبا يكون متوجه ناحيه الارض ودا كويس عشان تشوف المطبات الجميله اللى عندنا فى مصر )



العربيه كنت مسافر بيها انا و العائله كلها 5 افراد والشنطه كانت ملاينه على الاخر و للاسف العربيه حكت فى معظم المطبات :( لكن لما بكون لوحدى مبتحكش فى اى مطب

الحته دى مش مطغيه مش عارف ليه مع انها قطن !!



انا من الاسكندرية ،، رحت بيها القاهره مرتين والفيوم مره واحده ماشى بيها دلوقتى حوالى 3400 كم ، اقصى سرعه جبتها كانت 180 كم/ساعه على طريق القاهره الفيوم الطريق جميل جدا مفيش مطبات و3 حارات بس كان فاضى وقولت اجرب العربيه انا عاده مش بطلع عن ا 120 ال rpm كان قريب من ال 5 وانا على ال 180 و صوتها طبعا كان عالى ،، ال rpm فوق ال 4 بيبقى صوتها عالى
العربيه ثابته جدا لحد 160 -170 و كمان 180 بتقدر تتحكم فيها

العربيه ممكن نقيمها انها ممتازه فى الفئه دى بالمقارنه بالكورى طبعا واليابانى الغالى جدا 130.000 مش كتير على عربيه زى دى

-الصيانه الاولى كانت عباره عن تربيط عفشه وتحديث للسوفت وغسيل ، حاجات كلها بسيطه عملتها عند الشركة المصربيه الاوروبيه بس ان شاء الله الصيانه الجايه هتكون عند عز العرب

- صوت العربيه كان عالى اول ما جبتها بس بقت هادية جدا وكمان نعمت اكتر
- اللى مضايقنى انها مش فيها انذار ومش عارف هيركبلها ولا لأ لما اروح القاهره هسال عند عز العرب

يا رب التقرير يفيد اللى بيفكر يشتريها واللى عايز يعرف معلومات اكتر

شكـــرا

فى حاجان كتير انا مش ذكرتها أ/ اسلام عامل تقرير بتفاصيل التفاصيل ممكن تشوفه من هنا
http://www.nilemotors.net/Nile/396082-c-elysee.html

الف مبروك ياباشا ربنا يديك خيرها ويكفيك شرها