الموضوع: تقرير سريع: أسترا 2013 + صيانة +السوفتوير الجديد

السادة أعضاء منتدى نايل موتورز و بالأخص منتدى أوبل و خصوصاً مالكي الأسترا J
ده يعتبر أول موضوع ليا عن العربية من ساعة ما جبتها في شهر يوليو 2013

أولاً أحب أوضح اني من سعداء الحظ بإمتلاكي سيارة أوبل أسترا 2013 سيدان فئة كوزمو...إشتريتها كسر زيرو و كانت عاملة 14000 كيلو...مع العلم اني طالع من أوكتافيا A5 2007 من الزيرو

بإختصار ...العربية إجمالاً ممتازة و بتحقق كل متطلباتي و زيادة و تعتبر النقلة المظبوطة بعد الأوكتافيا...محستش انها أقل منها بالعكس هي متفوقة عنها في حاجات كتير...

العربية شيك و شبابي، مقصورة روعه looks and feels premium، تصميم خارجي متناسق و أعتقد من العربيات القليلة في السوق اللي تبص على كل جزء فيها و تعجب بيه...

ثباتها و إستقرارها على السرعات ممتاز و ماتحسش بحاجة مثلاً و انت على الدائري ماشي 140-150، تعاملها مع مطبات الهواء و عدم إستواء الطريق في منتهى النضوج...هادية و عزلها ممتاز

محركها مقدرش أقول عليه ضعيف لأني متعود على تقل الأوكتافيا و الفرق بسيط لصالح الأسترا علشان كده مش متدايق منه...

العفشة حدث ولا حرج، نعومة مش طبيعية لعربية ألماني بجنط 17

الكماليات: فيها كل الtoys بتاعة اليومين دول...ماعدا البلوتوث (مستفز جداً الموضوع ده و انت شايف الزراير موجودة بس مش بتعمل بيها حاجة )

الامان: ESP و ده تحتيه كل أنظمة الفرامل التانية + 4 إيرباجز + 5 نجوم في إختبارات الأمانEuroNCap

لو هنتكلم عن العيوب و مفيش عربية تخلو من العيوب طبعاً...بالنسبة لي تتلخص في (من السخيف للأقل سخافة):
1-الرعشة أو البرجلة أثناء السلانسيه و النقل من P إلى D أو R أو ما بينهم... ودي مشكلة عامة تقريباً كل الناس بتشتكي منها
2- إستهلاك البنزين العالي (من 160 ل 200 كم في الصفيحة)
3- ضيق مساحة الأرجل بالكنبة الخلفية (مش مؤثر قوي لأني علطول لوحدي)
4- محدودية القائمة الخاصة بالمعلومات الخاصة في شاشة العدادات (مفيش عرض لمدة الرحلة أو الكيلومترات المقطوعة من بداية التحرك)
4- البومبيه بتاع الرفرف و الإكصدام الخلفي (بيتلكك علشان يتحك)

ده كان تقرير سريع عن العربية...و لو فيه حاجة وقعت مني (وده أكيد) ياريت تبلغوني.

نيجي للشق التالي من الموضوع و هو تجربة الصيانة الأولى:

العربية لما إشتريتها مكنتش عاملة غير الصيانة الأولى عند 6000كم في جسر السويس...فالمفروض كنت أروح عند ال 15000 بس علشان مكنش عندي وقت فضلت مأجلها لغاية إمبارح و العربية كانت عاملة 19000 تقريباً..

يوم الثلاثاء كلمت 16424 علشان أحجز معاد في فرع جسر السويس و رد عليا ولد إسمه محمد سالم على ما أتذكر...و بصراحة شاب في قمة الإحترام و المهنية في التعامل....كانت بداية مبشرة جداً و زاد عليها كمان انهم بعتولي رسالة تأكيد الميعاد و رقم الحجز...

فرع جسر السويس للأسف دورت كتير على مكانة على النت أو جوجل مابس بس معرفتش أوصل لحاجة كل اللي مكتوب عنه انه في الكيلو 18 بالمنطقة الصناعية...فأخدت جسر السويس من أوله على أمل إني ألاقيه لحد ما يأست و بالصدفة دخلت محطة موبيل أسأل قالولي في الشارع اللي في الوش علطول...و فعلاً وصلت في ميعادي الساعة 9 صباحة بالظبط.

بعد ما وقفت العربية في الطابور دخلت الإستقبال و إستنيت 15 دقيقة لحد ما المهندس نادى عليا...و قالي عايز تعمل إيه؟ :) قولتله انا شاريها مستعملة و عايز اعرف المفروض أعمل اي صيانة دلوقتي...قام بص على السيستم و أكد معلومة الصيانة الاولى و قالى كده هاعمل صيانة 5000 و هانغير زيت موبيل 1 و فلتر بس و باقي الحاجات هانكشف عليها و المصنعية 300 جنيه بخلاف القطع و الزيت. انا كنت جايب معايا 5 لتر زيت كاسترول إيدج و فلتر K&N (أشكر العضو m.farouk على نصايحه)... و طلبت وضعهم و المهندس ماعرضش خالص و رحب جداً و إتكتب في أمر الشغل ان الحاجات دي هاتتغيير طرف العميل.

ده الpart number بتاع الفلتر لو حد فكر يجيبه:






بعدها قاللي تيل الفرامل الأمامي و الخلفي انت كده قاعد بيهم كتير لأنه المفروض بيتغيروا عند ال 15000!!! الأمامي ب 775 و مصنعيته ضمن الصيانة و الخلفي ب 1150 + 100 مصنعية!!! ياللهول! قلتله إكشف عليهم و كلمني...

بعد كده بدأت أتكلم في موضوع الرعشة و قبل ماخلص الكلمة هز راسه إيجاباً و أكدلي وجود السوفتوير الجديد اللي هايحل الموضوع إن شاء الله...الوقت المتوقع لإنتهاء أعمال الصيانة ساعتين... و العربية دخلت علطول و إترفعت و بدأوا شغل فيها بدون أي تأخير أو دلع.

نص ساعة و لاقيته بيكلمني على التيل الامامي و الخلفي انهم لازم يتغيروا..قلتله غير الأمامي بس الخلفي هامشي عليه شهر كمان ولا حاجة.. عقبال ما أشوف بديل ...انا بصراحة خفت أجيب تيل مش أصلي من بره علشان ليا تجارب سيئة كتير أيام الأوكتافيا و كنت برجع تاني لبتاع التوكيل.

ساعة و نص بالظبط و العربية كانت خلصانة و خرجت بره و روحت أخدت الفاتورة و مضوني على بيان ضمان موجود فيه تحديث السوفتوير. دفعت إجمالي 1180 جنيه و ختمت دفتر الضمان و إتوكلت على الله

قبل ما اتحرك قلت أعمل إحتبار للرعشة...تحريك الفتيس لأوضاعه المختلفة و التحرك بالعربية للأمام و الرجوع للخلف...جربت كل حاجة كان بيظهر فيها الموضوع و الحمد لله الرعشة ماظهرتش خالص نهائياً...طول السكة في الزحمة و الوقفة بردو ما ظهرتش...انا سقتها بالظبط 50 كيلو بعد الصيانة فا ممكن مايكونش كفاية للحكم الكامل بس لحد دلوقتي السوفتوير الجديد مبشر جداً و أنصح الكل يروح يعمله فوراً...انا هاتابع معاكم الأداء خلال الإسبوع ده علشان أطمنكم بإذن الله.

لاحظت بردو و انا مروح ان الفتيس بقى بيتلكك علشان يسقط النقله عكس الأول كان ممل جداً و لازم تدوس جامد علشان يقرر يسقط النقله فكان بيزود شعور ان العربية بطة...بس دلوقتي النقلات بقت أكثر نشاطاً و بتنقل كتير و بالتالي العربية بقت ممتعة أكتر.

العربية عموماً بعد الصيانة فرقت و سحبها إتحسن و صوتها هدي و عفشتها مسكت نفسها...بس ده أكيد طبيعي لأن كان فيها موبيل 1 و قاعد 13000 كيلو و الفلتر الجديد كمان... و الفرامل طبعاً اتحسنت كتير عن الاول لان التيل كان فعلاً فاضله شعره و يخلص.

دي كانت تجربتي الإيجابية في صيانة العربية في منصور فرع جسر السويس...انا راضي جداً عن أداء المنظومة و الخدمة و أعتقد هاكمل باقي الصيانات كلها هناك رغم ان المسافة بعيدة عليا...الأسعار مش لذيذة خالص من أولها كده بس انا بعمل تقريباً 10000 كم في السنة فالموضوع مش هايبقى متعب بإذن الله.

انا طولت جداً مش عارف ليه! و عموماً انا جاهز لأي إستفسار أو سؤال...تحت أمركم.