الموضوع: ارجو المساعدة لافتتاح محل اكسسوارات

بص يا سيدى ..... اولا جهاز الطباعة اسمه كاتر بلوتر و ده سعره ما بين 12500 لحد 2500 السعر الغالى بتاع الماكينة اليابانية الرولاند و دى فى توكيلها شركة كيميت فى اخر شارع بيروت بمصر الجديدة و ده جهاز بيقص لعرض 60 سم و هو مناسب جدا لكماليات السيارات و فى عروض تانية توصل لحد 160 سم بس انت مش ح تحتاجها .. و الجهاز ده قوى و تمنه فيه .... اما السعر التانى فهو للكاتر الصينى و ده مش حلو بصراحة و عن تجربة و لو حبيت تجيب حاجة كويسة فى الصينى حتلاقيها عند محمد ابراهيم فى التوفيقية و هى بحوالى 4500 جنيه .

ثانيا ..... الميزانية ..... ده حسب انت ناوى تشتغل فى ايه ( شعبى و ميكروباصات و نقل ) ولا ( شغل ملاكى و ستايل ) و حسب المكان و موقعه و كمان حسب مساحة المحل ....... ممكن تبدأ بـ 20 الف لو شغل شعبى و تجيب عدد قليل من كل حاجة فى الأول ..... حيكون مناسب كبداية طبعا . أما لو دخلت فى كاسيتات و حاجات غالية كتير حيكون المبلغ اكتر من كده ....... و نصيحة ابدأ شوية شوية و شوف و جرب السوق و اكبر معاه .

ثالثا .... تجيب بضاعتك منين ؟؟؟ انزل على التوفيقية على طول فى الاول و شوف الدنيا هناك عاملة ايه ... ابتدى بمبالغ بسيطة فى الاول عشان تتعرف على الشركات و المحلات هناك و بعد كده ح تتعرف على الاسعار و مين ارخص و مين احسن فى بضاعته ...
عندك هناك مثلا شركة الهوارى و دول اسعارهم كويسة و عندهم تشكيلة حلوة لفتح محل و اسعارهم جملة
و ده لينك لصفحتهم ع الفيس بوك

https://www.facebook.com/elhawary1980

تحياتى ..... برازيلى