الموضوع: عيب في تقفيل نيسان صني 2014

حبيت انقل لكم تجربة زميل لي في العمل معاه صني الجديدة و ماشية حتي الان 12000 كم.
كنا طالعين في مأمورية في الاسكندرية بعربيته و انا بصراحة كنت اول مرة اركب العربية دى بس لفت انتباهي اول مركبت وسع العربية الرهييب وبدأت اتكلم معاه علي العربية و كان مبسوط بيها جدا بس كان متضايق من الفرامل في الاول بس قالي انهم اتغيرو في التوكيل و المشكلة الي الان اتحلت.
المهم واحنا في طريقنا عدينا عند كوبري مرغم و هناك كان فيه بركة ميه فعدينا عليها زى كل العربيات معدت عادي و المية مكانتش عالية خالص، المهم و احنا ماشيين سامعين صوت كأنك حاطت جركن ميه مش مليان في العربية و الميه اللي فيه بتعمل صوت كأن حاجة بتلق !!!
المهم ركنا علي جنب و فتحنا الكبوت و الشنطة ملقناش حاجة ، فقلنا ممكن يكون شوية مية او طينة لزقت في العربية من تحت، المهم وصلنا الشغل و لما خلصنا ركبنا العربية حسينا اننا داخليين جوة ثلاجة و برطوبة غير طبيعية فقعدنا ندور و شلنا الدواسات لقينا الموكيت بتاع العربية كلو مبلول ، فكلمنا الدليل سألناه علي اقرب توكيل نيسان في الاسكندرية المهم رحنا وكشفنا علي العربية المهندس قالنا ان فيه ميه دخلت في العربية و انهم لازم يفكو الارضية وهتاحد وقت فقررنا نرجع القاهرة و نوديها في مصر.
انا طبعا مرحتش معاه بس لما رجعنا وداها تاني يوم ابورواش و فحصو العربية و المهندس قالو نفس الكلام و انهم لازم يفكو الكراسي و الفرش و ينضفو و انها سوء استخدام و تكلفتها 800 جنيه طبعا هو اتعصب عليهمو قعد يزعق و قال ان ده عيب صناعة و تقفيل في العربية و انه مش هيدفع ولامليم و كمان عاوز يحضر فك العربية عشان يشوف العيب فين و الميه دى جت منين عشان يثبت انه عيب صناعة، طبعا المهندس رفض حضوره فصديقي قالهم ابدأو الاصلاح و نشوف العيب فين الاول.
المهم ساب العربية و بعد 4 ايام كلموه قالو له العربية جاهزة ، فراح يستلم العربية و هو متضايق جدا و عاوز يعرف الميه دخلت منين فالمهندس بيقولو ان المجرى بتاعة تسريب الميه في العربية مسدودة طبعا كلام مش مقنع ﻷن المجرى دي من فوق العربية و معدية من الشنطة نزولا الي الاكصدام لخارج العربية و طبعا المهندس مش عارف ايه اللي حصل للعربية و بيحاول يحور عليه فرد عليه و قالو ان العربية نزلت في بركة ميه و مش عاليه و كل العربيات اللي جنبينا نزلت فيه فالمهندس سكت متكلمش و جالو مهندس تاني كان صريح وواضح و قالو ان المية دخلت من الباب الخلفي شمال !!! طب ازاي دخلت يا باشمهندس ؟ منعرفش ، بس ده سوء استخدام و حضرتك لازم تدفع 800 جنيه و كمان كده الضفيرة اللي جوة في الارضية بقت خارج الضماان !!
طبعا قعد يزعق و هددهم بحقوق المستهلك و بأنه يبعت لليابان و يعملهم مشكلة ، فالمهندس قالو خلاص لو حضرتك مش عاوز تدفع مفيش مشكلة بس احنا مش هينفع نضمنلك عمل الضفيرة الداخلية.
المهم اخد العربية و كان متضايق جدا من التجربة السيئة دى و مستغرب من الميه دى جت منين ﻷنه كان معاه فيرنا من سنتين ايام مكان فيه سيول و ياما دخل فيها مع العلم ان الفيرنا واطية جدا و عمره محصل كده او سمع ان عربية اتملت ميه !!!