المشاركة الأصلية كتبت بواسطة ahmed amin
أهلاً بيك,
أولاً أسوان بعيدة أه, بس أحنا معانا ناس من الأقصر وبتنزل تعمل صيانتها كل 10 الأف برضه في القاهرة كل زي أستاذ أسلام eleanor معاه بيجو 508.
وفعلاً ال 301 هيا أفضل وأقيم صفقة في السوق حالياً, فالو مشكلتك في الصيانة بس
هوا المفروض في خلال فترة الضمان تغير الزيت معاهم,,
ولو كدا هتبقي زيارة كل 10 الأف كيلو مرة, ولو بتعمل 10 الأف كيلو في السنة هتبقي زيارتين بس ليهم لأن في السنة التالتة هتكون خرجت من الضمان
وممكن تغير الزيت في أي مكان ساعتها وهوا مش معقد ولا صعب في التغير وسهل جداً.
وتربيط العفشة ممكن تعمله في أي مكان من يوم ما تستلم العربية عادي لأنها مش حاجة معقدة ولا تخرج العربية من الضمان.
صيانة ال 2500 مهمة عشان تربيط العفشة ومراجعة السوائل,
والحاجات دي مش هيبان لو فيها مشكلة من أول يوم بعد الأستلام,
لأن بعد ال 2500 كيلو لو كان فيه تسريب في زيت من الزيوت أو السوائل هيبان,
لكن من يوم الأستلام مش هيبان الكلام دا عشان يتعمل,, وعموماً ممكن تسئلهم في التوكيل لو كان ينفع تعمل ال check دا بعد ما تستلم يبقي كويس أوي,
لأن فيه عربيات كتيرة ناس بتشتريها من معارض ومش بتروح لا توكيل ولا بتعمل صيانة معاه وبتمشي عادي من غير مشاكل, فا متقلقش نفسك من الحتة دي,
وكمان السوفت وير مش حيوي أووي, يعني مش اللي هوا نازل عشان يعالج مشكلة في العربية,
يعني العربية ممكن تمشي عادي 10 الأف و20 الف من غير ما تعمله,
لكن بعد ما تعمله هتلاقي السحب أحسن والأستهلاك أفضل وتاخد أخر update لكل حاجة.
دي ثقافة ناس كتير من الشعب المصري,, ودا اللي خلي الناس تستسهل وتجيب كوري وتعمل أسم للكوري وتشوف أسعاره دلوقتي وصلت للأوروبي وحتي بعد ما سعره بقي عالي كدا لسه مش في نفس الجودة ولا الأمان.
البيجو صيانتها مش صعبة زي ما الناس متخيلة, كتير تلاقي ناس تقولك لو عطلت لازم ونش يوديها للتوكيل ومش هتتحرك من مكانها, وكل حاجة فيها بالكمبيوتر والعفريت طيب ماهي العربيات الجديدة كلها شغالة بالكمبيوتر !
العربية مش لعبة ولا ورقة, موتورها قوي وعفشتها محترمة,, يعني لا تقارن بالصني ولا الريو,,
أنت لما تركب فيها وهيا واقفة في المعرض هيا والعربيتين التانين هتحس بالفرق في التقفيل والخامات,
ولما تسوقها هتحس أحساس تاني خالص,,
أنا من رأيي أتوكل علي الله فيها,
وكدا كدا أي عربية جديدة مش هتحتاج منك تعمل أي صيانة كبيرة ولا معقدة غير بعد 4 ل 5 سنين,,
وساعتها ممكن يكون فيه مركز فتح قريب منكم أو بقي فيه ناس أكتر تشتغل فيها.
وطبعاً أستخير ربنا قبل أي حاجة, وأعمل الحاجة اللي تريحك وبالتوفيق في الشراء.
المفضلات