الموضوع: تشغيل ليدات الفوانيس الأمامية بالنهار (اصنع بنفسك بالصور)

* معلش يا جماعة... ممكن تلاقي الموضوع منشور في اكتر من مكان *

Day Running light drl in Chery Tiggo

الفكرة جات لي لما لقيت ليدات الفوانيس الامامية تقريبا مالهاش لازمة.. الليدات دي اصلا معمولة علشان تنور مع الموتور وتفضل منورة على طول ليلا نهارا طول ما العربية دايرة حسب المواصفات الاوربية... ولما فكرت انور العربية على اول تكة على طول اكتشفت انه ليدات الفوانيس الخليفة نورها اصبح ضعيف عند الضغط على الفرامل.. اتاري قوة وشدة النور في الليدات بتفرق لما يكون الدراع على اول تكة او لا.. فكان لازم نخلي ليدات الفوانيس الامامية تنور مع الموتور من غير ما نحرك دراع النور ولا تكة.. ودي الطريقة اللي تخلي ليدات الامامية تشتغل على طول من غير ما تشتري ليدات بـ400 جنيه



دي الدايرة... الفكرة ببساطة انك توصل طرف سلك بيكون فيه 12 فولت اثناء فتح الكونتاكت ACC او تشغيل المحرك engine start مباشر على الفانوسين الامامين بحيث تنور الشمعة والليدات مع فتح الكونتاكت على طول...



طيب.. نلاقي فين الطرف دا في حوض العربية... انا جبت الطرف دا من ضفيرة موتور المساحات اللي بيشتغل مع ACC... الصورة التالية بتوضح مكان ضفيرة موتور المساحات



اهم حاجة ان السلك اللي بيمر فيه 12v+ مع الكونتاكت يكون عليه فيوز لا يقل 10 امبير ويفضل 13 امبير.. والصورة التالية فيها صورة لحاوية فيوز بيقولوا عليها inline fuse holder... هو دا الفيوز اللي انا مركبة




السلك إللي واصل لسوكت الفانوس فيه اكتر من سلكة.. السلكة الرمادي دي (تقريبا 2مم داخل الديرة السودا) هي اللي بيمر فيها 12 فولت+ لما تشغل نور الشمعة (مع اول تكة في دراع النور).. هاتقطع السلك دي.. الطرف الواصل إلى الفانوس هاتوصله بالسلك اللي الواصل من موتور المساحة (12 فولت+ مع الكونتاكت) واللي عليه الفيوز.. والطرف التاني تعزله تماما علشان ما يعملش قفلة ومشاكل كبيرة في العربية



ماتنساش في الاخر تشيل اللمبة 5w خمسة واط اللي في الفانوسين علشان الشكل يبقى مظبوط مع الاستندارد الاوربي