كل شئ عن m11 و m12

**medo_nice** · 13-01-2014 09:51 PM

اسمي محمد اول موضوع لي في المنتدي الجميل والجامد ده

الفكرة هنا اني عاوز الاعضاء الكرام مالكي ام 11 أو ام 12 من موديل 2010 حتي 2014 تكتب كل شئ عن العربيتين من خلال تجربتهم للسيارة سواء ايجابيات او سالبية علشان اللي هيجيب عربية من اي نوع من الاثنين يقدر يحصل علي اكبر كم من المعلومات من الناس اللي راكبه وبلاش نعتمد علي اراء اصحاب معارض البيع لانهم من الاخر بيخدو عمولة بيع علي العربيات اللي بيبعوها وخصم علي كمية العربيات اللي بتتسحب من التوكيل
وبالتالي لو غبور عرض نسبة خصم كبيرة علي صاحب المعرض علي طول صاحب المعرض بيغري البياعين اللي عنده بعمولة حلوه لو سوقوا العربية كويسين وبالتالي هقنع المشترين بالعربية ده اكتر من اي عربية تانية علشان عمولتي فيها اكتر من السيارات التانية وده كلام منطقي جدا
يعني بتوع المصرية كانو بيقولو شعر في ام 11 و ام 12 لما قلة شوية ونزلت ايمجراند واكيد عملتهم امتر وخصم السعر من غبور لصاحب المصرية اكتر من ابو الفتوح بداء البياعين يقولو ان الايمجراند احسن بكتير من اسبرانزا ووكيل قوي وسمعته عالية عن ابو الفتوح وبلاش تدخل في حاجة مش مضمونة عكس كلمهم قبل ما تنزل ايمجراند وتوافر الاسبرانزا ام 12 و 11
وده حصل معايا منهم شخصيا شكرو اوي في الايمجراند وقالو ان اسبرانزا مش حلوه وقطع غيار قليلة وخدمة التوكيل سيئة
مع العلم انهم بيقولو علي التيجو الشكل الجديد 2014 رهيبة وتوكيل ابو الفتوح غني عن التعريف وده كان كلام لمشتري في المصرية حصل بامانة الله امام عيني وسمعته بودني والله علي ما اقوله شهيد - لذلك انا سئلت ناس كتير معاهم ام 11 و 12 ونفسي احصل علي معلومات اكتر بس من مالكي العربيتين لانهم افضل مصدر للمعلومات عن اي حد تاني
وانا هبداء بنفسي واحط كل المعلومات اللي حصلت عليها ولو ان شاء الله اتوفقت واشتريت اي وحده منهم هكون من الاعضاء الدائمين علي الموضوع ده واكتب كل حاجة بشوفها او بتقبليني في العربية بأمانة سواء سلبية او ايجابية علشان اساعد اي حد ناوي يشتريها او بيقارن بينها وبين اي نوع اخر - واعتقد ان ده هو المساعدة الحقيقية وعمل لوجه الله تعالي مش لاصالح توكيل معين ولا معرض معين

**medo_nice** · 13-01-2014 09:54 PM

نبداء بسم الله الرحمن الرحيم اول مشاركة في الموضوع وفي انتظار باقي الاعضاء الكرام

انا سألت في ابو الفتوح اللي في المعادي من 5 ايام قالي موجودة ام 11 و 12 موديل 2014
لو تحب تيجي تشوفهم واقفين عندي رحت فعالا وشفتهم ام 11 سيدان وزجاج فاميه يتم اثباته في الترخيص والام 12 مش هتشباك زي ما الناس بتقول لان الهشباك بتبقي زي الابيزا او الماروتي او الفيات الاونو او الاسكودا الفليشيا صح ام ده بالبلدي بين اللاثنين ليها شنطة صغيرة عن السيدان يعني ممكن اقول ميني سيدان بس فتحة الدخول لشنطة ام 12 اوسع واعرض من ام 11 و شنطة ام 11 اطول في الطول من ام 12 واصغر في العرض من ام 12
انا ان شاء الله ناوي اجيب ام 12 موديل 2014 عمله 83000 ج في ابو الفتوح اكثر 1000 ج من ام 11 موديل 2014 بالنسبة للتحديثات لموديل 2014 للعربيتين عن الموديلات السابقة انهم خلو العفشة اقوي وانعم عن الاول والصاج بتاع ام 12 بقي تقيل عن الاول ومحمل والاكصدام الامامي وراه دعامات قوية عند التصادم لقدر الله من الامام تحافظ علي صدر العربية مهما كانت قوة الخبطة ويبقي الخسارة في الاكصدام وبس يعني اكبر خبطة تغير اكصدام كامل وبس - الردياتير محمي والموتور والشاسيه بفضل الدعامات
لما قعدت في الام 12 حسيت اني في عربية الماني او ايطالي التابلوه خاماته افضل بكتير من الموديلات القديمة والتقفيل ارقي بكتير من القديم
بالنسبة للمعلومات اللي عندي كانت علي ام 11 اكثر من ام 12 لانها مش منتشرة زي الام 11 بس العربيتين واحد من حيث الشكل العام والتكنولجيا والموتور والعفشة والصالون والتابلوه والانوار والازرار كلهم شكرو في الام 11 جدا جدا ومفيش شكوي من اي حاجة بس عيوب التصنيع في الام 11 والام 12 اقل بكتير جدا عن الموديلات الاخري مثل 516 لما كانت نزله و 620 و ايه 113 زي مثلا مساحات مش شغاله كويس لمبة نورت مره ومره لا اكرة باب او شنطة نشفه شوية دراع نور او مساحة خشن في الحركة بس كله تعالج بسهولة في التوكيل بدون اي مشاكل تاني الثبات عالي في السرعات العالية والبطيئة والمنحيات علي سرعة 120 ك امان وثبات تمام التمام واحد من اللي سئلتهم قلي ان دخل بوش العربية في عربية لانوس في جنبها اليمين قال الوش بتاع ام 11 اكيد ادمر نزل يبص بعد الخبطة لقي نغزة بسيطة في حرف الكبوت بتاعه واللانوس الرفرف اليمين بالباب اليمين في الضياع مصدقش نفسه ان عربيته حصلها نغزة بسيطة وبس بعد الخبطة القوية ده كانت ام 11 2011
بعد المعلومات ده كلها كنت بفاضل بين ام 12 وايمجراند لقيت ام 12 احلي واشيك ونفس الاوبشنس واقوي في الصاج وعفشة رياضية
ارجو تصحيح اي معلومة ذكرتها تكون غلط من مالكي ام 11 او ام 12 ولو فيه اي معلوما اضافية ياريت تزودني بيها

**M I D O** · 13-01-2014 10:03 PM

موضوع جميل يا باشا وفكرة حلوة لاكن رغم كل كلامك اتجاة السوق في البيع رايح للامجراند رغم المشاكل بتاعتها و انتشارها في سنة افضل من انتشار الام 11 + الام 12 في 4 سنين و الام 11 عربية ممتازة بكل معني الكلمة وانا كنت هشتريها بس بسبب ضيق الكنبة الخلفية صرفت نظر عنها

**hemaa_82** · 15-01-2014 08:52 AM

انا مش فاكر حاجة .... دماغي ساحت .... ابقي فر التقييم و حط بقي اللي انت عايزه :)

**FaWzY86** · 15-01-2014 05:09 PM

المشاركة الأصلية كتبت بواسطة hemaa_82

انا مش فاكر حاجة .... دماغي ساحت .... ابقي فر التقييم و حط بقي اللي انت عايزه :)

سلامة دماغك يا باشا..
أنا بس محتاج أعرف انت عملت بيها كام كيلو لحد النهاردة ولو هتقييمها النهارده بعد ال3 سنين دول هتقول ايه عنها

**ashrafmahmoud93** · 15-01-2014 06:28 PM

13500 m11 2012
العربية كمجمل تمام الحمد لله بس فيها شوية حاجات رخمة كدا ان الكنبة اللى ورا ضيقة لو انتا طويل وحبيت ترجع الكرسى ورا شويه عشان انا طويل فبرجع الكرسى ورا فاللى بيركب ورا معايا مش بيعرف يرتاح ف القاعده تانى حاجة العفشة مش عارف اصوات التزييق اللى بتطلع منها دى ليه وسببها ايه من يوم ما جبتها وهيا بتطلع الاصوات دى بس انا اتعودت عليها بس انا مبسوط من العربية لان المشكلتين دول مش مأثرين معايا ف حاجة
تانى حاجة اللى باظ فيها من يوم ماجبتها
اول حاجة كان ف افيز بيهرب بنزين جبت افيز تانى وربطة كويس ومنع
تانى حاجة فبرة التنك اتكسرت وغيرتها ب 25 جنية تقريبا او 35 مش فاكر
تالت حاجة سير الدينامو قطع بعد 12000 كيلو وغيرتة ب 130 جنية من التوكيل
اعتقد دى الحاجات اللى باظت عندى غير كدا العربية الحمد لله تمام ربنا يبارك فيها ولسه اما بشوفها واغسلها بحس انها خارجة من المعرض الدهان بتاعها كويس ولمعتة حلوة لانى مش بغسلها بصابون خالص كلة بالمياة فقط كفاية رغى بقى ههههههههه انتا اللى طلبت التفصيل