الموضوع: شراء سيارات نمر سياحة

متابع و موضوع مهم جدا ياريت نسمع ردود من المهتمين بالأمور دي و كمان مدى شرعية التعامل كده من عدمه.

نصيحة بلاش... كان معانا سواق في الشركة ربنا فتح عليه وراح جايب ميكروباص تويوتا Hi-Ace ورخصه على شركة في القاهرة... أول ما الثورة قامت اخدوا العربية منه وخسر تقريبا كل ما يملك، وبعد ما قوم محامين بقى وقعد يلف ويدور قاموا سكتوه بعربية سيراتو (سياحة برضه)، وطبعا الـHi-Ace وقتها كان بيعمل حوالي 180ألف (نمر سياحة يعني مفيش جمارك) والسيراتو السياحة دي مكانتش هتعدي الـ70 ألف اساسا زيرو لأن مفيش جمارك برضه... غير كده وكده هيدفعوك كل سنة مبلغ كده مش فاكر تأمين بقى ولا ايه... غير ان العربيات السياحة مينفعش تركب فيها مصريين، ولو اتغلس عليك واتعملتلك مشكلة هتلبس جمارك العربية علشان تخلصها يا اما تتاخد منك...
رأيي ان اللي يعمل الحكاية دي يكون حد شغال في السياحة (يعني معاه ارنيه غرفة السياحة مثلا علشان لو حصل حاجة يلاقي اي حجة زي مثلا انه مندوب الشركة الفلانية ودي عربية الشغل الخ) + ان يكون له حد (صديقه او قريبه مثلا) هو صاحب شركة النقل اللي العربية هتبقى باسمها (وطبعا ده نادر) علشان يبقى فيه ثقة وما يحصلش اللي حصل مع السواق بتاعنا وغيره... غير كده بلاش مخاطرة، احنا اساتذة في النصب ومش هتعرف تاخد حق ولا منطق مع حد لو لا قدر الله حصل حاجة!! وهتبقى دايما على اعصابك وانت معاك اسرتك وداخل على اي كمين، البلد محدش عارف رايحة على فين وايه اللي ممكن يحصل بكرة، فخليك في المضمون!!
ده اللي اعرفه من مجال شغلي، ولو لسة هتفكر في الموضوع وعايزني اجيبلك تفاصيل ادق واكتر قولي!!

بص ياباشا،،،،مبدأياً لو المعرض اللى بتتكلم عليه ده هو الحاوى،،،فيبقى انا اقدر افيدك كتير فى الموضوع ده،،،،بحكم اولاً انى كنت حعمل الحوار ده معاهم لان فرعهم الرئيسى هنا فى الاسماعيليه وانا اعرف صاحب المعرض والشركه نفسه،،،الحاج شعبان،،وبصراحه الناس كلها محترمه وثقه،،،،،،

القصه باختصار انك بتاخد عقد ايجار للعربيه طوال مده الخمس سنين،،،،ومعاك عقد بيع كمان من الشركه ليك،،،بس طبعاً مش موثق ولا حتقدر توثقه الا بعد الخمس سنين،، يعنى بمعنى اصح ملوش لازمه اوى،،،،الموضوع بيعتمد على حاجتين،،اسم وسمعه الشركه اللى حتجيب منها،،،تانى حاجه انك تكون عارف حد فى الشركه دى،،،،،العربيه فعلاً بينزل سعرها قرب ال ٥٠٪ وبتدفع ٦٠٠٠ سنوياً لوزاره السياحه،،،،،نوعاً ما ممكن يرخموا عليك فى الكماين شويه بس فى الاخر بتمشى مدام معاك العقد بتاع العربيه،،، ومش كل العربيات ينفع تاخدها سياحه،،،بتبقى انواع معينه اللى هو الشركه اصلاً مبلغه بيها من الاول وبتبقى على حسب تصنيف الشركه،،،

الموضوع مربح ومجدى بس محتاج انك تدور كويس اوى وتحاول تاخد اكبر قدر من الضمانات،،،،وربنا يقدملك اللى فيه الخير