الموضوع: تعلية صوت كلاكس كورولا 2014 بنفسك ( تقرير مفصل مصور )

بسم الله الرحمن الرحيم

اولا احب اشكر الدكتور ابوفاندي علي مجهوده و مساعدته ليا في الموضوع ده .
بصراحة اللي كان راكب تويوتا من موديلات 2013 و ما قبلها يعرف يعني ايه كلاكس الكورولا المزعج , بس للاسف الحلو ميكملش في كورولا 2014 نازل صوته رقيق قوي وده عشان نازل بفردة واحدة بس اللي هي ال LOW و طبعا ده مينفعش في بلدنا المحروسة اللي لازم كل دقيقة تدي كلاكس عشان سواقتنا الجميلة.

هبدأ بالمكونات اللي هتحتاجها لعمل التعديل :

1. كلاكس ماركة DENSO ياباني الصنع و فيه منه شكلين بيفرقو بس في شكل الكلبس اللي بيركب فيه السلك, طبعا لما تيجي تشتري الكلاكس هيديك العالي و الواطي و مش هيرضي يديك العالي بس و سعر الشكل اللي انا جبته 125 جنيه و النوع اللي جابه دكتور ابو فاندي 130 جنيه مواصفاتهم 12 فولت و 4 امبير 113 ديسيبل , و دي صورهم :

النوع بتاعي :









النوع بتاع الدكتور :






2. متر سلك 2 مللي , كليبسات بكافر بلاستيك و ده شكلهم :



3. مسمار راس مسدس مقاس 12 مللي و وردة عادية ووردة زنق .

4. قصافة , قشارة سلك , مفتاح 12 مللي و شريط لحام.

سوكيت الكلاكس عبارة عن فردتين , فردة كهرباء و دي بيوصلها 12 فولت لما تدوس علي الكلاكس و الفردة التانية الارضي , بالنسبة للنوع بتاع دكتور ابوفاندي الارضي فيه في نفس المكان اللي بيتربط فيه المسمار في الشاسيه للتثبيت و ده اسهل بكتيير.
اما النوع بتاعي ففيه مكانين لكلبسين , واحدة للكهربا وواحدة للارضي.
فكل اللي هعمله اني هوصل الارضي بسلك و اربطه مع مسمار التثبيت و بكدة ابقي اديت الارضي في شاسيه العربية , اما الكهربا بقا فهوصلها بالكلبس الكهربا اللي واصل بالكلاكس الاصلي ال LOW بتاع العربية , يعني كأني عملت كوبرى مبين كلبسة الكهربا في الكلاكس العالي مع كلبسة الكهربا في الكلاكس الواطي .
وبكدة ابقي وصلت لكل كلاكس ارضي و كهربا و اهم حاجة السلك الكوبري ده تبعده بقدر الامكان عن الرداتير عشان تتجنب انه يسخن او يسيح .
الكلاكس صوته فارق جدا و صوته قوي و مزعج و هو ده المطلوب .
وديه الصور بعد التركيب :





اتمني اكون وضحت و جاهز للاسئلة بتاعتكم ............ بيب بيب