الموضوع: تقييمى للفوكاس 2009 بعد شهر استخدام

تقييمى للفوكاس بعد شهر من الاستخدام:

الموديل: 2009 – العداد الحالى: 76,000 كم – الحالة العامة:جيدة جدا الى ممتازة – الفئة: القبل الأخيرة (فتحة – مثبت)

اولا: الموتور

- طبعا انا نازل من اوبترا, و سياراتى الشخصية السابقة هى بورا و النترا 2005 و سبكترا 2003 و اكسنت, و طبعا اقدر اقول بكل ثقة ان الفوكاس هيا اثقل عربية فيهم, و بالتالى ده ماثر تأثير سلبى على السحب, اول ماتركبها بعد العربيات ديه هتستغرب شوية و تحس ان العربية مش عاوزة تستجيبلك, بس مع الوقت بيحصل تقارب, العربية حسيت انها بدأت تتأقلم على اسلوب سواقتى و انا بدأت اتعود على مشيها.


- عموما انا سافرت السخنة و فايد و طنطا خلال الشهر ده, سرعة السيارة القصوى من 180 الى 190 ك/س فى الظروف الطبيعية, طبعا زادت شوية فى منازل السخنة و كسرت ال200, و نزلت لل 170 و 175 فى المطالع.

- محاولتش اشد اوى بيها, لأنى بطلت الى حد كبير, بس احساسى انها تقريبا سدت مع نيو اكسنت 2009

– سيراتو – جولف 5 – و مازدا 3 الجديدة طلعت منى على السخنة (كنت لسه مغيرتش الزيت و محمل 3 غيرى فى العربية و هوا كان لواحدو و لسه كانت اول طلعة بالعربية) و على طريق فايد كنت مثبت 190 مع لانسر 1600 م 2013 اوتو و BYD مانيوال.

- بشكل عام انا مبقتش غاوى جرى, فالماتور ده راضينى و اهم حاجة بالنسبة ليا السفر و اداء العربية على سرعات.

- استهلاك البنزين بشكل عام يتوسط من 190 لى 220 سواء جوا البلد او على السريع مع الجرى على سرعات 160 ك/س ,وبالنسبة ليا ده استهلاك مرضى جدا مقارنة بالبورا و الاوبترا الأوتو.

- صوت الموتور هادى الى حد كبير على سرعات و اعتقد الفتيس ليه عامل كبير فى القصة ديه


ثانيا: الفتيس

بشكل عام الفتيس نقدر نقول عليه مريح و هادى و موفر بس كسول, اوضح اكتر. بشكل عام مبحسش تقريبا بالنقلات خالص غير بس لو بوقف العربية لما توصل لسرعة 10 ك/س مثلا بحس باقل نقلة (بس متهيالى ده عادى). اهم حاجة بالنسبة ليا هوا ان عداد RPM ادائه مرضى جدا على سرعات و مهدى صوت الماتور, يعنى مثلا:

- اقل من 2500 لفة على سرعة 100 ك/س

- 3000 لفة او اقل على 120 ك/س

- 4000 على 160 او 165 ك/س

- و السرعة القصوى (180 ل 190 ك/س) بيكون ال RPM على 4500 لفة تقريبا, و اعتقد هدوء الفتيس ليه عامل فى ضعف السحب على السرعات البسيطة.


ثالثا: العفشة

- العفشة خليط من قوة الأداء و الثبات من بعض النشوفية, خصوصا ان الجنط 16, يعنى بحس ان العفشة انشف من الأوبترا و اهدى بكتير من البورا و اقوى من الاثنين. مع العلم ان مع الكشف مفترض ان العفشة كانت تمام, بس بردو العربية مش زيرو يعنى ماشية بقالها كتير و اعتقد اغلب العفشة لسه بفابريقتها ما عدا المساعدين الأمامى صاحب العربية لسه مغيرهم, و احساسى ان المساعدين الخلفى خفوا بسيط و حاسس بده اكتر على سرعات و انا محمل.


رابعا: الثبات

- طبعا اثبت عربية امتلكتها, مطمن الى حد كبير جدا لغاية 160 و 180 بس لازم اركز شوية من 170 فى المشى, احساسى ان ده ليه كام سبب, اولا زى ماقلت قبل كده شاكك ان المساعدين الخلفى خفوا بسيط, و كاوتشات العربية بريدج تورانزا, و دول فرد ناعمة بس مش ثابتة (و عن تجربة سابقة مع البورا راكبتهم بعد بريللى و حسيت بفرق ثبات لصالح البريللى), بشكل عام انصح اى حد يستثمر فى كاوتشات غالية يجرب البوتنزا من بريدج بدل التورانزا, لأن البوتنزا بتجمع بين النعومة و الثبات.


خامسا: الصالون و العزل:

- صالون مريح جدا, و ممتع بأنوار التابلوه, و كراسى مريحة و تحسها ضامة عليك (بس لو حد مكلبظ ممكن تضايقوا شوية), و الكابينة معزولة عزل رائع عن الضوضاء و الهواء و تقلبات الجو (متحسش ان العربية بتسقع من جوا مهما كان البرد بره) ,و مجرد متشغل النظام الصوتى ,لا هتسمع طريق و لا هوا و لا الكلاسكات فى جميع الظروف و حتى على سرعة 190. و النظام الصوتى صوته رائع بصراحة و نقى جدا و لا ينقصه الا وصلة USP. و العربية الحمد لله مفيش اصوات خلخلة او تزييق فى جسمها, الا من صوت بسيط من زجاج الباب اليمين لما اكون فاتح ربعه بس معرفش ليه (لو مقفول كله او مفتوح كله مبيطلعش اصوات), و كان فى صوت بسيط من التابلوه بيظهر مع المشى على الأسفلت الخشن بس راح لوحدو الحمد لله.


بشكل عام: رضاء الى حد كبير جدا بالسيارة الحمد لله (و ده شىء صعب بالنسبة ليا لانى موسوس) و احساس انها من افضل السيارات فى فئتها “value for money” ,و للعلم ربنا وفقنى فى اختيارها من ضمن قائمة كبيرة من الاختيارات (اوكتافيا a5 – جيتا – جولف 5 – اودى a3 – سيفيك – مازدا 3 – بى ام e46).


و شكرا

المشاركة الأصلية كتبت بواسطة mohamedsotohy

بالنسبه ل وصله usp
دور عليها اعتقد انها موجوده في وش باب التابلوه اول ما تفتحه
عندي شغاله

العندى فتحة aux فقط. انتا مركبها ولا هيا موجودة جاهزة عندك؟؟