الموضوع: يوميات مواطن بيسوق كل يوم في بلد راحت خلاص :(

دي عبارة عن شوية فضفضة من مواقف بتحصل للواحد على الطريق و تقريبا بتحصل مع كل واحد فينا كل يوم
مش عارف لحد امتى , بس تقريبا لحد ما نمشي :(

موقف رقم 1 :
يوم السبت اللي فات
كنت واقف في يوترن مستني الطريق يفضى عشان اتحرك
عربية جاية , ممكن ادخل بسرعة قدامه بس هاخليه يفرمل , قلت استذوق و بلاش
كانت النتيجة انه بعد ما عدى و هابدأ اتحرك سواق في نص نقل ورايا قرر يعاقبني و خبطني في الاكصدام من ورا زقني , و لما وقفت على جنب و نزلت ازعق فيه , قال لي ما انت مش عايز تمشي و سابني و مشي !



موقف رقم 2 :
ده بقى موقف بيحصل كتير
طريق زحمة و العربيات ماشية على مهلها
واحد عنده نوبة سفاهة مؤقتة عمال يكبس عليك من اليمين لحد ما يحطك في اختيار يا اما تقف و تعديه مكانك يا يبقى احتمال يحك الرفرف بتاعك
و عادة بيبقى سواق ربع نقل , نص نقل , تاكسي , مكروباص , مكروباص سوزوكي صغير , المهم سواق يعني , او ملاكي عربية قديمة , او عربية متروشة , او الاتنين
طبعا الاخ ده بمجرد ما الطريق بيفتح و مع اول دوسة بنزين لو مش لسه في حارتك بتعديه و تبص عليه تلاقي نوبة السفاهة خلصت و جت بدالها نوبة استلواح و ماشي زي السلحفاة و ما تملكش الا انك تدعي عليه و تدعي للي هايتنقط منه و هو زانقه وراه

موقف رقم 3 : راكن عمودي عالرصيف , ترجع تلاقي واحد راكن عمودي وراك , جيتا يعني مش اي سواق من القائمة المذكورة , و مريح على اكصدامك الوراني (اللي لسه النص نقل خابطه امبارح) , يرجع البيه تلاقيه راجل كبير , تكلمه و تقول له عيب , الاسرة معاك هاتعمل ايه ؟ يرجع بعربيته و تبص مكان الترييحة تلاقي حتة بوية صغيرة مطقطقة , تحمد ربنا , و سعادة البيه يقول لك مافيش حاجة , و تقول له البوية طقطقت تلاقي شاب من المحل اللي هو كان فيه يجامله على قفاك و يقول لك مافيش حاجة , و لازم تقول له انك ما بتكدبش و ان البوية طقطقت , و الكبير العايب يرد و يقول لك (اجيب لك بداله؟) , ايه العالم اللي الواحد عايش في وسطها دي ؟ (قال يعني لو قلت لك هات هاتجيب , خلاص حصل خير) , و المسخرة بقى ان السايس الواقف مستني ياخد فلوس , و طبعا ما عبرتوش

كل ده و اكتر السبت و الحد بس
و للحديث بقية طول ما احنا في البلد دي :(