حصري : تقرير مصور عن fortuner تويوتا 2014 الجديدة كلياً !

**Y a r i s** · 08-02-2014 09:42 PM

بسم الله الرحمن الرحيم
. تقرير عن تويوتا
fortuner 2014 الجديدة كلياً

في شموخٍ واعتزاز كيف لي أن أمر كل يوم أمام هذا الوحش الكاسر ولا أستطيع أن أكتب عنه كلمةً واحدة تعبر عن مدى اعجابي به وتقدير لقوته ... سيارة. ليست كبقاي السيارات. سيارة. تبرز جميع العضلات من أول الترابيس للباي والتراي وحتى البنش والمجانص ...

سيدي الرئيس ... سيدي القاضي أن هذا الوحش ... هذا العتي ... هذا الهيرقل
أنه مش سته وسبعين حصان لا لا لا ... أنه متين تمنية وتلاتين حصان ياسيدي الرئيس يعني الي هيتجوز هذا الوحش قصدي هيشتريه. هتلاقيه يزغرط من قوة كل هذه الاحصنة ... فهل يختلط الزيت بالماء سيدي الرئيس ... بصراحة مع كل هذه القوة الحصانية مش قادر غير اقول رفعت الجلسة يا حضرات .

سيدي القاضي حضرات اعضاء تويوتا الكرام مش عاوز أقولكم قد أيه ازبهليت عندما فتحت غطاء الكبوت ووقفت أمام هذا المارد وامام قلبه النابض ومحركة الجبار... محرك لو ركبوه. في مازنجر هتلاقيه يطير بسم الله مشاء الله

طيب هنا تويوتا بتقدم ... اتنين متور علشان تغطي متطلبات جميع عشاقها

اول متور بقوت ٤٠٠٠ cc
سته سليندر
٢٤ صمام
مع مبرد خاص واسبيشيال للمحرك
بيولد ٢٣٨ حصان عند - ٥٢٠٠ لفة
وخمس سرعات في عين العدو اتوماتيك

@@@@@@@@@

والمحرك التاني. للناس الي بتحب توفر في البانزين
او بيحبو يركبوا عربية جيب ومشاويرهم طريق مسفلت مش وعر
فتويوتا هنا بتقدم متور ٢٧٠٠ cc
و ٤ سليندر فقط
مع ١٦ صمام
وبيديك ١٦٠ حصان عند - ٥٢٠٠ لفة
واربع سرعات فقط اتوماتيك

جدير بالذكر

وزن السيارة بدون حمولة :
الفورتشنر ٢.٧ : ١٨٧٥-١٨٢٥ كيلو
والفورتشنر ٤ : ١٩٤٠ - ١٨٨٠ كيلو

اما وزن السيارة الاجمالي بالحمولة :
الفورتشنر ٢.٧ : ٢٤٥٠ كيلو
والفورتشنر ٤ : ٢٥١٠ كيلو .

يعني خلي بالك العربية اتنين طن ونص فمتجيش تطلع بيها فوق الرصيف وتقول هتطلع عادي حرام عليك الرصيف او البلاط مش هيستحمل وهيتفت فت من تحت العربية .

من فضلك كافئ مجهوداتنا بلايك او شكر او تعليق لنعطيك المزيد والمزيد ... وشكراً

**Y a r i s** · 08-02-2014 09:44 PM

. نظرة على كابينة هذا اللوحش
Fortuner 2014

في البادية انا احترت اقول كابينة ولا ؤوضة نوم ولا صالون ولا ريسيبشن
لكن مين قدك يا ملك وانتا قاعد فيها مين قدك ... يكفي ان من جواها القعده فيها تفصلك عن المحيط الخارجي

هذا الوحش كما هو موضح في الصورة فيه كنبة خلفية زيادة والكنبة دي الحقيقة مش متوفرة في منافسيها في السوق ودي ميزة بتميز تويوتا عن مثيلاتها يعني من الاخر العربية ممكن يركبوا فيها سبعة غير السواق مرتاحين لكن لاحظ معي في الصورة في كتاب كده عامل زي معجم الصحيحين او. فهرس ابن ماجة ولا مقدمة ابن خلدون. لك ان تتصور يا سيدي الفاضل ان الكتاب ده كلو مش دليل تيلفونات مصر لأ ولا يلو بيج ... ده دليل مستخدم فورنيتشر كاتبينلك فيه كل فتفووته في العربية ... ونستطيع ان نسميه سلاح تلميذ تويوتا :)

طبعاً شوف شوف منظر وحجم الكابينة ... وزي ما قلتلكم انا محتار في التسمية الصحيحة ... ولاحظ أيضاً التكييف المركزي الي في السقف ... لان كتير من الناس بيجيبوا سواق على العربية وفي الصيف تلاقي. السواق قاعد يستكيف قدام. وانتا قاعد تتسلق ورى في الحر ... لذلك تويوتا عاملالك توزيع تكيف مركزي علشان كلكم تستكيفوا في الصيف ... ومن المعروف عن تويوتا ان تكيفها تلاجة في الصيف يعني انتا من الاخر لمن تدخل العربية في عز الحر فانتا داخل ديب فريزر ...

أيضاً لاحظ معي أماكن لحامل الكوبيات في اليمين وفي الشمال والحقيقة انا أحيي تويوتا على توفير هذه الاماكن حتى للاطفال في الخلف ... علشان الرحلات الطويلة ... وكلنا فاكرين كل شوية لمن تسمع حد من عيلك وانتا سايق يقلك باباااااااااااا تعرف على طول ان في مصيبه حصلت ويقلك بكل برود. بابا كوبايت العصير ادلق ... ومتعرفش. يا أخي أيه السر والمتعة ان العيال تاكول في العربية يمكن علشان بيحبوا نظرت حرقت دم واعصاب ابوهم لمن يشوف العربية اتوسخت واتبهدلت :)

أيضاً كان في علبة في خلف السيارة على الشمال ايديا كلتني وحب الفضول قتلني اني افتحها اشوف فيها ايه ... لقيت جواها كوريك ياباني + شنطة العدة ...وده شيء رائع الحقيقة توفير مكان للعدة وللكوريك ومنعملش زحمة جوا العربية بيهم ... ولاحظ كمان فيه جمب المخبء السري ده في فتحه مدورة كده فتحت ولاعه او نقدر نقول عليه قابس كهربا علشان لو حد من العيال ورى بيلعب بالموبايل او البت بنتك بتكلم زميلتها والشحن قرب يفضى فبدل ما تشغلك بالموبايل بتاعها اهي تنط ورى تشحن الموبايل بتعها ... طبعاً عجبني كمان الشنكل بتاع الشماعة الي ورى ده بس مش عارف بتاع ايه ده هنعلق عليه فوطة ولا أيه !!

ودي صورة عن قرب كمان لاماكن تخزين العصائر وقزايز المية ... وياريت تويوتا تعمل مكان لتخزين السندويتشات

من فضلك كافئ مجهوداتنا بلايك او شكر او تعليق لنعطيك المزيد والمزيد ... وشكراً

**Y a r i s** · 08-02-2014 09:45 PM

. التابلوة ( او غرفة التحكم )

بصراحة يعجز الانسان عن وصف الاشياء وقد تكون الصورة أبلغ من ألف كلمة ... ولكن في تويوتا الاحساس الداخلي وانتا فيه أبلغ وأحسن من ألف صورة وألف كلمة

طبعاً يمكن فيه شبه كبير بينها وبين قعدت الهايلوكس ... بس دي نقدر نقول عليها ليكزيس هايلوكس او هايلوكس فاخرة بالنواكل وبلمسات لمسات الخامة والوسع الذي لامثيل له

طبعاً احب انوه لحاجة مهمة إن الدريكسيون المالتي ده + الشاشة التاتش المزودة بالتيلفون + مثبت السرعة + التكيف التاتش + الكميرة الخلفية موجودة في طراز فورتشنر ٤.٠. فقط

زي ما احنا شايفين جمال التابلوة ... وجمال الماتريل بتاعوا لكن انا باستغرب وباستنكر بشدة العيب الي موجود في التابلوة لاحظ فتحت الايرباج تحس واحد ضربها مفك من الجنب. او الي حط كيس المخدات الهوائية نسي يقفل التابلوه صح ! هل هو كده عيب ولا معمول بحيث لو الي جمب السواق حب ينام ويغفل خمسه او يريح حبه يقوم فاتح التابلوة نافخ الاكياس الهوائية عاملها مخدة. ينام. ويريح عليها وبعد ما يصحى من النوم يفسيها ويرجعها في التابلوة من تاني !!!

طبعاً عاجبني جداً حركة الزراير الكتيررر الي تحت الكاسيت ولكن ياحبذا لو كانوا بدل ماهما قافلينها يحطوا فيها اي حاجة اي حبت زراير بتنور بالليل كده. تدي منظر

الفورتشنر مزودة ب ٦ سمعات اربعه في الابواب وطبعاً اتنين تويترات في المرايات. طبعاً مفيش فرق بين ال ٤ لتر و ٢.٧ لتر مبتفرقيش غير في الكاسيت التاتش والبلتوث ده على المجال الصوتي .

صندوق القفزات ( او درج التابلوة ) قفزات ايه هو احنا راكبين موتسيكل
المهم الصندوق ده لا يتناسب معانا هنا في مصر بالذات احنا شعب يعشق التخزين ... كنت متصور. هلاقي درج درج احط فيه ملفات الشركة. وشاحن الموبايل واحط فيه فورشة شعر. ... واحط فيه طبنجة او حتت مسدس كده صغنطط ... على علبة سيدهات على رخصة على حبت فواتير وورق ملهومش اي تلاتين لازمة كده يعني فبرجاء تكبير حجم صندوق القفزات شوية

طبعاً شيء جميل في تويوتا في جميع طيرازتها
انها بتهتم بأماكن المشروبات السحرية ... ولكن لاحظ تحت فتحت التكيف في مكان فارغ ... في هونداي ماتريكس ايام مكانت معايا كانوا عاملين. درج سحري كده زي المكان ده بالزبط. بتقدر تحط فيه. النقود او العملات المعدنية او فلوس احتياط لان احيانا بتدخل بانزينة. تمون تيجي تفتح المحفظة. متلاقيش فيها ولا مليم ( ياصلاة النبي ) طب ياعتها هتقول لعامل البانزينة أيه أيديني فوطة زفرة وبخاخة وانا أطوئلك وامسحلك عربيات البانزينة كلها ولا هتخش تغسل المواعين في المطبخ !!! لذلك وجود درج مهم جداً في العربية

اهو مكانين اهم بامكنا عمل درجين سريين فيهم لتخزين العملات
وده شيء يحسب للألمان. والفرنسين ... هو استغلال الاماكن الفاضية الاستغلال الامثل .

درج تخزين الاشرطة او السيديهات ... في سيارات لاند كروزر عامةً بتلاقي الدرج ده اكبر من كده + ان في امكانية لتشغيلوا تلاجة ... يعني افرض مثلاً حضرتك بتحب تسافر كتير. هل معقول وانتا سايق وتعبان. تطلع علبة الكنز من الدرج وتشربها سخنة !!! ده حتى يبقى حرام ! في الحر ده كلو :)

من فضلك كافئ مجهوداتنا بلايك او شكر او تعليق لنعطيك المزيد والمزيد ... وشكراً

**Y a r i s** · 08-02-2014 09:47 PM

. نظرة عامة على السيارة

طبعاً السيارة من الخارج مش محتاجة لاي حاجة
فيها عتب فيها سبويلر خلفي فيها مقابض نيكل ومريات ايشارات وحتى الدليات بتاعت الامطار
زائد جنوط اصلية 265/65SR17
ده غير. الشبكة الجميلة الي بتنزل فيها بس مش عاجبني اريل الراديو بصراحة

الجميل في العربية هيا بطاقة التعريف بتاعتها
وكفاية اني اشوف كلمة Egypt لا وكمان مكتوب الاسكندرية
طيب وبالنسبة للخشب الابنوس الي فيها من دمنهور ولا دمياط ههههههه. لا بجد هيا ايه علاقة الاسكندرية بالموضوع !!!

طبعاً منظر العربية من الخلف بس مين الشاطر الي يقدر يقولي فين الكميرة الخفية موجودة
لكن بصفة عامة هيا شيك شيك جداً ويمكن ينقصها الزجاج الفامية .

فتحت الباب ذات نفسها كأنك فاتح باب ڤيلا
كأن العربية فتحالك صدرها وبتقولك تعالالي يا حبيبي تعالالي ... خوش في لحمك يافوزي ... من فتحت الباب وقفلتوا تقدر تميز لمسات الفخامة وقوة العربية. ... وبتاخود عنها الانطباع الاول. اذا كانت العربية دي ممتازة ولا لأ ... بصراحة تحفةةةة. ومتعت ركوب الجيب. ولمن تخش وتقفل على نفسك الباب جوه بتحس انك في برج عالي فوق كل العربيات. وانك انتا الكبير يا كبيرررررر يا كبيرررر ... وجمال الركوبة في الجيب بعكس العربيات التانية انك بتبقى كاشف كل الي حوليك حتى لو واحد قاعد وعامل فيها مئدب بس ماسك ايد البت الي جمبو فانتا من فوق كاشف العملية ... وغير كده في العربيات الصالون. بتبقى قاعد مركز ومحروق دمك قوي في الزحمة ان العربية الي جمبك هتخبطك داخلك في الباب او هيلطشلك المرايا او العربية الي قدامك عربيتوا بترجع في الاشاره وهيريح عليك وحجات كتير زي كده ... لكن في عربيات الجيب. انتا راكب ومكبر دماغك على الاخر وخلي الي يريح يريح هو الخسران مش انتا لاحظ كمان كرسي السائق التحكم بيه كهرباء في الطراز ال ٤٠٠٠ سي سي .

لاحظ : تفصيل الكراسي الجلد والي ايضاً متوفر في الطراز ٤٠٠٠ سي سي فقط ... تفصيلة الكراسي ذات نفسها وشهادة لله. ومريحه اكتر من كراسي اي مكتب في الدنيا تحس الكرسي كده حضنك من ورى ومش من نوعية الجلد الي. بتخليك تعرق ... بس الحقيقة ممتازة ممتازة

طبعاً حبت الهمبكة دي انا بحبها جداً جداً
لمبتين غير لومض الصالون والي بنسميها في عالم السيارات. لمبة قرائة الخرائط. تقولش الخرائط مقطعه بعضها هنا في مصر ... لكن شيءميل وعظيم توفرها في اي سيارة لكن اعتراضي على مكان تخزين النظارة يعني اغلب نظارات الشمس بتبقى عدستها كبيرة والمكان الي انتوا عاملينوا يادوبك يشيل نضارة قراية فارجو تكبير جراب النضارة شويتين

تاني بكرر العيب الموجود في التابلوة ده لابد من وضع حل سريع له

صورة كمان : لفتحت الباب الي ورى وزي ماذكرة السمعات بتبقى موجودة فيه ... نوعية التنجيد الابواب الحقيقة مش بطالة بالعكس ممتازة وعملية ... كمان مننساش دي مش لاند كروزر ولكن هيا تعتبر لاند كروزر مصر او بيبي لاند كرورز .

.
@@@@@@@@@@@@@

الاسعار والموصفات

فورتشنر 2.7cc. : عاملة ٣١٠.٠٠٠ جنية
وفورتشنر 4.0cc : عاملة ٣٥٠.٠٠٠ جنية مصري

والفرق بين الطرازين :
١- في المتور واحدة ٤٠٠٠ سي سي والتانية ٢٧٠٠ سي سي
٢- في عدد الاحصنة واحدة ١٦٠ حصان والتانية ٢٣٨ حصان .
٣- مثبت سرعة .
٤- كميرة خفية خلفية .
٥- شاشة كاسيت تاتش .
٦- بلوتوث
٧- فرش جلد .
٨- كراسي كهربا للسائق
٩- عجلة قيادة تحكم بالمسجل وبالتيلفون ايضاً .
١٠- تاكييف تاتش .
١١- وحدة اربع سرعات اتوماتيك والتانية خمس سرعات اتوماتيك .
@@@@@@@@@@@@@@@@@@@@
في الختام احب اشكركم واشكر المجموعة المتحدة للتجارة والتوزيع
وعلى رأسهم المهندس / محمد نشأت
والاستاذ / مصطفى كامل .
لحسن تعاونهم معنا ... وكرم ضيافتهم وحسن استقبالهم
كما ارجوا ان يحوذ التقرير على اعجابكم ورضاكم

من فضلك كافئ مجهوداتنا بلايك او شكر او تعليق لنعطيك المزيد والمزيد ... الموضوع حصري لنايل موترز ومن اعدادي وتصويري وحقوق الطبع والنشر محفوظة لنايل موترز ... وشكراً

**Y a r i s** · 08-02-2014 10:26 PM

المشاركة الأصلية كتبت بواسطة midnightman_74

اولا .. شكرًا على الموضوع الشيق لانى من عشاق هذه السيارة لأنها عربية حمارة شغل بمعنى الكلمة
بس السؤال هنا .. اية الفرق بين موديل ٢٠١٤ و ٢٠١٣ ؟؟

حبايب قلبي تسلمولي ... وسؤال الحقيقة ممتاز
الفرق بين ٢٠١٣ و ٢٠١٤ الحقيقة مفيش فرق بينهم غير في الموديل :). بس انا كتبت الجديدة كلياً كاسلوب تشويق للقارء ... زي ما يقولك ألحق الفنانة الفلانية اتقتلت وفي النهاية تشتري المجلة وتكتشف انها اتقتل كده وكده في الفيلم الجديد بتاعها الي لسه هينزل في الصيف :) ... وتحياتي