الموضوع: طريقة تعديل شبكة اللانوس\النوبيرا

ناس كتير كانت بتسال ازاى نعدل شكل شبكة اللانوس او النوبيرا و نعملها شبكة سلك... الموضوع دة بيشرح باختصار القصة دى بتتعمل ازاى

اولا الطريقة دى تنفع مع شبكة اللانوس 1 و النوبيرا 1 و 2... اللانوس 2 شبكتها مختلفة و متنفعش فى الموضوع دة

1- هتفك الشبكة من الكابوت... هى متثبتة بحوالى 7 او 9 صواميل مقاس 7 فا يفضل يبقى معاك بيبة 7 عشان تنجز فى الوقت

2- فى ضهر الشبكة هتلاقى حوالى 12 مسمار بيثبتوا الفريم النيكل فى الجسم البلاستيك بتاع الشبكة... فك كل المسامير دى

3- بعد ما تفصل الفريم النيكل عن الجسم هتجيب منشار اركت او حتى صفيحة منشار و هتقص كل ريش الشبكة لحد ما تبقى مفرغة زى الفريم النيكل بالضبط... اهم حاجة ميبقاش فية اى زوائد من الريش البلاستيك بارزة فى الفريم



4- هتجيب سلك بتاع الاسقف المعلقة من عند بتاع الحدايد و البويات (اسمة سلك بقلاوة) و دة بيتباع بالمتر و انت مش محتاج اكتر من متر... الشكل بتاع السلك يرجع لاختيارك بس يفضل يبقى فتحاتة كبيرة و السلك تقيل و محمل عشان يستحمل و ميتقطعش و كمان عشان يبقى شكلة باين من بعيد

5- هتحط السلك البقلاوة فى النص بين الفريم النيكل و الجسم البلاستيك و تربط 4 مسامير بس (واحد فى كل طرف) و بقصافة هتقص كل الزيادات من السلك اللى بارزة برة الشبكة بحيث يبقى السلك مطابق فى المساحة و الشكل للشبكة و مفيش اى اطراف بارزة عن الفريم النيكل



6- هترجع تفك المسامير الابعة و تشيل الجسم البلاستيك... راجع على اماكن تركيب ال13 مسمار فى الفريم النيكل و اتاكد ان الشبكة مش قافلة على مكان اى مسمار عشان تعرف تقفل الشبكة بعد كدة بدو مشاكل

7- كدة هيبقى عندك فريم نيكل و فريم بلاستيك و الشبكة جاهزين للرش... طبعا اختيار الالوان بيرجع لزوقك الشخصى و كمان لون عربيتك... المهم انك ترش الفجسم البلاستيك اسود عشان يظهر لون الشبكة السلك و الفريم النيكل بعد الرش

8- بعد ما تخلص رش هتقفل الشبكة (فريم نيكل و فريم بلاستيك و فى النص السلك)





9- ركب الشبكة فى العربية مرة تانية فى الكابوت



MMamdouh