الموضوع: فليشيا :ارخم واغلس سخونيه ملهاش حل

المشاركة الأصلية كتبت بواسطة yasser dyboo

بسم الله الرحمن الرحيم
و الحمد لله رب العالمين :

عفريت وظهر فجأه وحالف براس ابوه مينصرفش :-
مره واحده وانا ماشي ولقيت المروحه بدأت تخرف وبتشتغل تأخر مره 95 ومره 100 طبعا وقفت وكشفت علي سلك الترموستات واستنيت لغايه العربيه ما هديت شويه ومشيت تاني لغايه مكان شغلي واكان يوم الاحد معرفتش اشتري ترموستات فعملت مفتاح اشغل واطفي بيه المروحه لغايه ما اشتري ترموستات :c_laugh[1]: ( اصلي كنت فاكره ترموستات ).
المهم غيرت ترموستات واتنين وتلاته وطبعا المشكله لسه موجوده كنت مظبت تاكيهات قبلها باسبوع قلت اجرب اظبط تاكيهات تاني وطبعا النتيجه زي ما هيه
رحت لميكانيكي تاني وبرضه معرفش السبب وقالي روح لكهربائي يشدلك علي سير الدينمو والطرمبه وطبعا رحت للكهربائي ومل اللازم ولسه زي ما احنا المروحه بتشتغل علي 100
طبعا مكنش فيه اعراض جوان لا طحينه ولا الميه بتنقص والسحب كويس .
قمت روحت لمين لبتا الرديراتير فكه وسلكه ونضف دوره الميه وغير ترموستات تاني ولسه المشكله زي ما هيه .
زهقت واتخنقت
رحت لميكانيكي تالت غير الترموستات تاني ولسه ..... راح قالي هفك الوش واشوف قلتله اتكل علي الله وفك..... فك وقالي كان راكب جوانين والجوان اللي من تحت بايظ هاتلي اتنين تاني قلتله الوش اخباره قالي سليم ومش محتاج يروح مخرطه ولا يتمسح غير الجوان وظبط وركب وشغل وهب
لسه الوضع زي ما هوه بالمللي قاللي غير ترموستات تاني ونجرب
رحت غيرت ترموستات وركبتله كتاوت عند كهربائي وبنشغل واحنا واقفين الدنيا اشتغلت تمام
فرحت قوي قوي وقلت الحمد لله المشكله اخيرااا اتحلت هع هع ويا ريتني ما فرحت

مشيت بالعربيه والفرحه مش سايعاني مكملتش ربع ساعه والعطل رجع زي ما هوه ( تبك الاصل العلقه اللي فاتت) تخريف وهبل ومبتشتغلش اقل من 97

وانا ماشي لقيت لمبه الزيت بتنور وتطفي رحت رايح اغير زيت لعل وعسي والمفجأه الزيت كله مطحن وسادد الفلتر طب ازاي ومكنش فيه ميه بتنقص معرفش غيرت زيت وفلتر وبرضه العربيه بتسخن

ركبت سلك طويل بمفتاح وبشغل المروحه بيه ومش عارف اعمل ايه والميكانيكيه التلاته اللي بروحلهم غلب حمارهم
علي فكره اول لما المروحه بتشتغل العربيه بتبرد يعني طرمبه الميه شغاله ترموستات الكوعه مش موجود
احيانا احيانا بتصدف والمروحه تشتغل كويس وبستغرب قوي بس طبعا بترجع لوضعها الرخم في نفس المشوار

حد يقولي اعمل ايه هل كده الوش باظ ......الموتور شيع...... طب اختبر ازاي عايز اتاكد علشان مدفعش فلوس فوش سلندر علي الفاضي وتكون عندي مشكله اكبر تحت فالبلوكه ( عشان واحد خمن كده)


ايه الحلول المتوقعه غير اني اولع فالعربيه .
وعايز حل فالترموستاتات اللي عندي انا ممكن افتح بيهم محل اصلهم مديقين الشقه عندي

شوية اسئلة للتوضيح
هل لما غيرت الجوان الميكانيكى غير الزيت ؟
انت مركب 2 جوان للوش لية انت خرطت الوش ؟
انت بتحط مية حنفية؟
هل قبل ماتظبط التكايات العربية كانت مابتسخنش ؟
هل فية نقص بسيط للمية دلوقتى ؟
هل خراطيم المية بتتنفخ فعلا وفية ضغط هواء فى القربة لما العربية بتسخن علشان ممكن يكون فية تهيس لصباع الحرارة؟

عموما اصبر على العربية يومين وتابع الزيت ونقص المية وعاوزك كل ماترجع من مشوار تفتح القربة قبل ماتبطل العربية وتخرج الهواء السخن من القربة وتبص على المية اللى نازلة من الخرطوم الرفيع لو بتنزل ببطء وتقطع يبقى فية هواء فى دورة التبريد حاول تاخد هواء منها واسهل طريقة هى اللى انا قولتها تفتح القربة بعد ماترجع من مشوار وتطلع الهواء السخن والمية طبعا حتقل شوية كام يوم عبال مالهواء يطلع تزودها قبل ماتدور وبلغنى بالتطور وربنا يقويك
نوع المية اللى بتحطها اية ؟
ونوع الترموستات ؟