الموضوع: مقارنة الدايو نوبيرا معه كيا شوما

الاوتوماتيك فى الكيا شوما احسن من النوبيرا

شكراً للاهتمام منتظر اراء باقى الاعضاء الكرام

ياريت كل اللى يعرف سعر قطع الغيار يبلغنا بيها

من باب المعرفه

المشاركة الأصلية كتبت بواسطة mhopa2440

أنت عايز تقارن ايه بالظبط بينهم
انا ركبت النوبيرا 2001 مانيوال اكتر من سنتين وكنت حافظها بالمسمار والحمد لله
ومعايا حاليا سبكترا وينج (كيا شوما2) 2002 اوتوماتيك

خلاصة المقارنة الكيا افضل بصراحة وهوضح ليك بعض الأمور

الموتور
النوبيرا - 2 كامة موتور قوي بس مشكلته لو مش قدرت تحافظ عليه او ميكانيك غبي ممكن يضيع الدنيا زي عربيتى فضل سحبها زفت لحد ما بتعتها بسبب طقم شمبر مش ليه لازمة
الشوما 1 هو موتور السيفيا وكامة واحدة والشوما 2 هو موتور السبكترا وهو 2 كامة وبصراحة موتور ناعم جدا جدا جدا والسحب فيه عالي

العفشة
النوبيرا مشهورة بمشكلة العفشة وجلب المقصات بس ليها حل اما تركب الاصلي الأصلي او تركب جلب تانية والرجالة هنا يقول ليك على ايه المناسب ويتعمل الزاي
الشوما عموما عفشة كويسة

الوسع والصالون
النوبيرا والشوما نفس الاستايل تقريبا من جوه بس الشوما 2 يمكن اشيك شوية (طبعا وجهة نظر) انما الوسع النوبيرا اوسع طبعا (دي فئة العربيات الكبيرة) والراحة الاثنين براحة سواقتهم جميلة

قطع الغيار والأسعار
اللي يقولك حاجات الكيا اغلى دا ميعرفش حاجة انزل بنفسك واسئل الاثنين زي بعض يعني سير الكاتينة لو ب110 ف النوبيرا هيكون ب120 ف الكيا وتيل الفرامل نفس السعر
الفرق بصراحة ف الكماليات زي الفوانيس والمرايات يمكن تكون اغلى شوية بس دي فحالات الحوادث لا قدر الله وتغيرها بيكون مرة ف العمر دا لو العربية فضلت معاك مدة 5 ل 7 سنين تقريبا
الانتشار فعلا الدايوا منتشر اكتر بس ف اي مكان هتروحه هتلاقي حد عنده حاجات الكيا شوما عادي يعني

الفتيس
المانيوال مفيش فرق
بس الاوتو ف الحالتين لازم تحافظ عليه عشان يعيش معاك بس النوبيرا فتيسها مش ضعيف هو بطئ نسبيا بالنسبة للكيا يعني سحب الشوما بيكون اسرع شوية

معرفش في حاجة تانية عايز تعرفها ولا ايه لو في ان شاء الله اقدر افيدك

وربنا يوفقك ان شاء الله

افضل شيىء فى المقارنة لما يكون الشخص امتلك السيارتين