الموضوع: رحلة تركيب كماليات كورولا 2014 في التوكيل

رحت النهارده التوكيل فرع أبو رواش علشان أركب شوية حبشتكنات (في وجهة نظري) شايف انها حاجات مهمه وبقت المفروض العربيات تنزل بيها زيها زي الإزاز الكهربا والمريات الكهربا..يعني حتى الفئه الهاي لاين مافيهاش الحبشتكنات دي >:(
المهم الحاجات دي هي : (مرايات ضم - إنذار - وحدات رفع - زينون أبيض)
يذكر ان الكماليات ليها قسم خاص في تويتا..يعني مالهوش أي علاقه بفنيين الصيانه ومواعيد الصيانه..يعني الكماليات ليها مواعيد مختلفه وبتتزبط عن طريق رقم تليفون واحد هناك إسمه حاتم مسؤول قسم الإكسسوارات
المهم كلمته يوم الأحد وحجزت على النهارده (الثلاثاء)
سلمت العربيه وكان في ملاحظه في موضوع استلام العربيه..الطبيعي ان مادام العربيه هتدخل يبقى في مهندس يستقبل العربيه ويشوف الخرابيش اللي فيها ويشوف محتوياتها وبيسجل الكلام دا كلله في أمر الشغل..دا ماحصلش بالنسبه للكماليات يعني لو العربيه دخلت واتجرحت لا قدر الله مش بعيد يقولك احنا مستلمينها كده..انا الحمد لله العربيه ماحصلش فيها حاجه بس للتنبيه علشان لو حد راح
المهم اللي تم تركيبه عندي هو (وحدات الرفع - مرايات الضم)
بالنسبه لوحدات الرفع..الإزاز بيطلع شباك شباك مش كله مره واحده ومن تكه واحده يعني من غير ماتفضل دايس على زرار القفل في الريموت
بالنسبه للهاي لاين عادي بردو البصمه اللي على أوكرة الباب أول ماتدوس عليها وحدات الرفع تشتغل
(معلومه: الهاي لاين نظام الفتح والقفل بتاعها ذكي بمعنى ان هدفه مايخلكش تطلع المفتاح من جيبك نهائيا..يعني انت في البيت اهو ونازل والمفتاح في جيبك..اول ماتقرب من الباب وتمد ايدك على الأوكره الباب يفتح..نفس الكلام للشنطه بردو قرب منها هتفتح..لما تدخل جوه بقى مجرد انك تدوس على زرار ال start العربيه تدور..لما تيجي تنزل من العربيه وتقفلها بتعدي صباعك بس على حته كده في الأوكره تروح قافله..وبالتالي مفتاحك في جيبك دائما)
بالنسبه بقى للمرايات الضم أول ماتشغل العربيه المرايات تفتح..أول ماتقفل المرايات تضم..سواء قفلت بالريموت أو بالبصمه..وبردو بتقفل بتكه من غير ماتفضل دايس على القفل
الجدير بالذكر اني ركبت الإنذار اللي عندهم(وهو مربوط بكلاكس العربيه) وبعد ماركبوه شيلتو تاني..بإختصار لإنه بيلغي وظائف المفتاح الذكي للعربيه
يعني لو فتحت الشنطه بإيدك الإنذار يشتغل لازم تفتح بالريموت..ولو فتحت الباب بالبصمه بردو الإنذار يشتغل ولازم تفتح بالريموت..طبعا قعد يقوللي أصل هو دا نظامه وأصل انا مش عايز العب في العربيه..قولتله شكرا الإنذار يتشال وفعلا شالوه :)
الإنذار مناسب لجميع الفئات ما عدى الهاي لاين
أخر حاجه بقى جبت شوية أسعار للكماليات اللي عندهم والأسعار دي شامله التركيب
وحدة رفع الزجاج 550 جنيه
ضم المرايات 400 جنيه
الإنذارات : (تايواني ليه سرينه 550 - إيطالي ليه سرينه 800 - تايواني على الكلاكس 700)
غطاء الكورولا الأصلي 250
زينون (كوبرا 35 وات 6000 ك 750 جنيه - أوسرام 35 وات 6000 ك 2200 جنيه)
فرش في حدود 650
دواسات في حدود 220
ومعذرة على الإطاله :)

المشاركة الأصلية كتبت بواسطة mohamed.hany

الف مبروك ياكبيير.
بس دلعت العربية بحاجات كتيير مرة واحدة ، كدة تتعود علي الدلع.

الله يبارك في يا "ريسنا" وأسعدنا مرورك :)
ولا كتير ولا حاجه يا باشا دا يادوبك وحدة ضم ووحدة رفع..بس كده
وبعدين مايغلاش عليها الصراحه هو انا يعني عندي كام كورولاياه d: