الموضوع: دليل اختيار قطع الغيار - الاصلى

طبعا كلنا عارفين ان السوق مليان قطع غيار اشكال و الوان اشى اصلى و اشى كورى و اشى صينى و اشى مجهول الهوية و غالبا التجار مش بتبقى صريحة مع المشترى و بتبيع اى حاجة للزبون و تعمل البحر طحينة عشان ياخدوا فلوسك و السلام

و الزبون بيبقى عايز يشترى احسن حاجة باقل سعر ممكن و بالتالى قطع الغيار اللى سعرها رخيص بتبقى مغرية... ضيف على دة شوية كلام لطيف من البياع عن القطعة هوب بتلاقى الزبون دفع و اشترى و ركب.... و بعد كام شهر تتلف القطعة و يلاقى فلوسة اترمت على الارض و يعيد نفس الفيلم تانى

و فيه زبون بيلف على كذا محل لحد ما يلاقى محل بيبيع "الاصلى" ارخص من السوق و يروح يشترى منة... و بعد ما يركب و يمشى يلاقى القطعة تلفت فى ةقت اقل من المتوقع و اقل من القطعة الاصلية اللى كانت فى العربية... دا لانة اشترى من واحد بيبيع قطع غيار مضروبة و هى مش اصلية و كان فاكر انه زبون شاطر و اشترى من بياع مش جشع ولا طماع زى باقى التجار

بعد طلب العديد من الزملاء و بعد معاصرة مشاكل البعض الاخر فى الحتة دى قولت لازم الواحد يوضح بشكل مفصل موضوع قطع الغيار دة عشان نقلل قدر الامكان من استغلال التجار لينا و نقدر نشترى قطع غيار كويسة و مينضحكش علينا تانى... اعتقد كفاية كدة رغى و نخش فى المفيد

بالنسبة ليا انا بقسم قطع الغيار فى السيارات كذا فئة...

الفئة الاولى هى قطعة الغيار الاصلية و دى اللى هنكلم عليها النهاردة.... دى طبعا قطعة غيار تعتبر من احسن القطع اللى ممكن تشتريها لعربيتك عشان تحافظ عليها... اه بتبقى غالية مقارنة بالباقى بس زى ما بيقولوا الغالى تمنة فيه

الفئة التانية هى قطعة الغيار البديلة... دى بقى ممكن تبقى احسن او زى او اقل من الاصلى حسب مين اللى بيصنع القطعة دى و بيبيعها بكام... زى كدة ما تشترى بوجيهات NGK او طنابير بريمبو او تيل جولد او سيور جيتس و هكذا... و دى هيبقى ليها موضوع منفصل

الفئة التالتة هى المضروب... و دة باختصار منتج سىء بس ملزوق علية ستيكر اما انة اصلى او انة من انتاج شركة عالمية مشهورة... و دة برضة هنتكلم عنة بشكل مفصل و فى الغالب هيبقى فى نفس موضوع القطع البديلة

بالنسبة لقطعة الغيار الاصلية بنتعرف عليها من خلال العبوة بتاعت القطعة و الستيكرات اللى عليها... القطع الاصلية بتبقى اما فى عبوات عليها لوجو GM و الرسمة الابيض فى ازرق المشهورة






او بتبقى فى علبة كرتون بنى و عليها ستيكر تعريفى


او بتبقى فى كيس بلاستيك و عليها ستيكر تعريفى للقطعة




او بتبقى من غير اى تغليف اساسا و الستيكر التعريفى ملزوق على القطعة نفسها... دا غالبا بيبقى فى القطع الكبيرة الحجم زى قواعد الموتور فى النوبيرا و قرب المية






طيب الستيكر التعريفى دة بيبقى مكتوب فيه ايه؟

انا عملت صورة فيها توضيح للبيانات اللى على الستيكر عشان برضة لما تاخد قطعة الغيار تبص فى الستيكر و تتاكد ان دى القطعة المضبوطة اللى طلبتها


البار كود مش هنفهم منة حاجة بس الستيكر اللى معليهوش بار كود يبقى مضروب... اسم القطعة بيبقى مكتوب ب3 لغات الاولى انجليزى و تقريبا التانية فرنساوى و التالتة مش عارف الصراحة

تحت على الشمال فية لوجو GM و كلمة Genuine و فوقهم عدد القطع فى العبوة

طبعا زى ما احنا شايفين ان الستيكر مكتوب علية بلد المنشاء.... و دة هيودينا لنقطة مهمة و هى ان قطع الغيار الاصلية مش شرط تبقى كورى... عندك مثلا بلى العجل الاصلى بيبقى يابانى (صحيح مش باينة الكلامة بالكامل بس يعنى JA تكمل JAPAN) و نفس الكلام فى بلى الدبرياج


البلية الثابتة فى النوبيرا امريكى


بلف خرطوم السيرفو المانى


شداد الكاتينة كندى



مفهوم كورى=اصلى غلط و لازم نبقى واخدين بالنا من كدة عشان فيه تجار كتير يقولك "دى قطعة كورى بتاعت بلادها يا بيه"... كوريا بلد صناعية و فيها مليون مصنع و طبعا مش كلهم بيعملوا قطع غيار اصلية... هو مصنع واحد بس اللى بيعمل القطعة الاصلية و بيبيعها باسم GM و فى حالات ممكن ميبقاش المصنع دة فى كوريا اساسا زى ما شرحنا من شوية بالتالى مش اى قطعة "كورى" تبقى اصلية او حتى كويسة

بالنسبة للستيكر فيه حاجتين... اول حاجة فيه احيانا بيبقى الستيكر فية علامة مائية على اليمين و احيانا لا فا مش معنى انك ملاقيتش العلامة المائية على الستيكر ان القطعة مضروبة




الحاجة التانية ان اخر جملة بتاعت التوزيع اتغيرت مؤخرا و بقت GM Korea Company فا دة عادى برضة مفيش فية مشاكل... الحاجة الوحيدة اللى ممكن تستشفها من الموضوع دة هو ان القطعة اللى عليها GM Daewoo تبقى ستوك قديم و اللى عليها GM Korea ستوك جديد... قد يكون الموضوع دة مفيد لو بتشترى قطعة يفرق فيها مدة التخزين

طيب دة بالنسبة للقطعة و ازاى نعرف انها اصلى ولا لا... افرض فية واحد بياخد الستيكر و يحطة على قطعة صينى؟...هنا بقى هنكلم فى جزئية السعر و نشترى من عند مين...

طبعا الموضوعات كتير اوى فى القسم بتتكلم عن التجار الكويسين الموثوق فيهم و التجار اللى بتبيع حاجات مضروبة... طبعا انا مش هرص كل تجار مصر و اقول مين كويس و مين وحش... يكفى انك لما تحب تشترى تبقى تسال الاول اشترى من عند مين و 1000 مين يدلك او حتى على الاقل لو انت متابع للمواضيع فى القسم انت لوحدك هتبقى عارف مين كويس و مين وحش و دة مهم عشان الضمير بقى عملة نادرة الايام دى

بالنسبة للسعر فا فى اغلب الاحوال بتبقى القطعة الاصلية غالية عن البدائل الاخرى فا لما تلاقى قطعة بسعر و قطعة قد تمنها مرة و نص اعرف ان القطعة الرخيصة دى مستحيل تبقى اصلية... يعنى لما تلاقى موضوع مكتوب فية ان ماستر الفرامل العمومى ب500 جنية و يدخل واحد يقولك انا جبت الماستر الاصلى ب275 يبقى طبعا دا اشترى ماستر اما مضروب (دا لو متباع فى علية GM عليها ستيكر GM) او اشترى قطعة بديلة (كورى او تايوانى او صينى) و التاجر ضحك علية و فهمة ان دى الاصلية

دا حتى فرق السعر دة بيبقى موجود بين القطعة الGM و القطعة البديلة اللى بتصنعها نفس الشركة اللى بتصنع القطعة الGM... يعنى على سبيل المثال لا الحصر طلمبة البنزين الاصلية ب650 و الطلمبة الكافوس ب500 مع ان الGM صناعة شركة كافوس... طبعا دة لا يعنى ان الطلمبة الكافوس وحشة... القصة دى هنتكلم عنها فى موضوع القطع البديلة ان شاء الله

اعتقد كدة انا غطيت قصة قطعة الغيار الاصلية... لو فيه حاجة وقعت منى ياريت حد ينبهنى ليها

MMamdouh