الاضواء النهارية Daytime Running Light والفوج الخلفي Rear Fog

**Mohamed.Hany** · 14-02-2014 11:01 AM

بسم الله الرحمن الرحيم

زملائي و احبائي بقسم تويوتا, حبيت اعملكم تفصيصة علي السريع للاضواء النهارية والفوج الخلفي, اللي بقم اساسيين دلوقتي في مواصفات اي عربية تباع في الاتحاد الاوروبي.
اثبتت الدراسات ان بفضل المواصفتين المذكورتين تم الحد بنسبة كبيرة من الحوادث اثناء الشبورة ,الامطار ,الثلوج و الرؤية المتعثرة.

1. الاضواء النهارية :

تم تطبيق الاضواء النهارية اولا في الدول الاسكندنافية وذلك للظلام الذي يستمر طوال الشتاء مثل السويد, فنلندا, النرويج و الدنمارك. و تم تعميم النظام في الاتحاد الاوروبي سنة 2011 واصبح اجباري لمنعه الحوادث بنسبة 5.7 %.

هو عبارة عن اضواء امامية للسيارات و للدراجات و الجدير بالذكر انها تعمل تلقائيا فور بدء تحرك السيارة . هذه الخاصية لايمكن التحكم في غلقها و فتحها لانها اجبارية .
الاضواء النهارية يمكن ان تكون في الانوار الامامية بالكشاف او بالفوج لايت, ويمكن ان تكون اي نوع من الاضاءة مثل LED او هالوجين او زينون او اضاءة ملونة , فهي لاتقتصر علي ال LED فقط.

فوجود اضاءة LED في السيارة لا يعني بالضرورة انها اضواء نهارية , ولكن الفيصل هو اذا كنت تستطيع التحكم بغلقها و فتحها فانها تفقد قيمتها بكونها اضاءة اجبارية و تعتبر اضاءة عادية زي نور التابلوه مثل الهالوجين و الزينون وليست اضواء نهارية.
فمثلا هناك سيارات بها اضواء LED و لكن يمكن التحكم بفتحها و غلقها فلم تعد اضواء اجبارية او اضواء نهارية.
معظم السيارات التي بها الاضواء النهارية تكون LED و لكن يوجد بعض السيارات مثل الهوندا بها اضواء نهارية هالوجين و هذا مسموح به طالما لا يمكن غلقها يدويا.
ولكن يفضل ان تكون LED لشدة اضائتها و لتدني قوة استهلاكها الكهربائية التي تصل الي 20 وات فقط.

2. الفوج لايت الخلفي :

طبقا للمواصفات الاوروبية , فانه يتحتم وجود فوج لايت خلفي سواء كان في فانوس واحد او اثنين بقوة اعلي من اضاءة الفانوس الخلفية و مقاربة لشدة اضاءة الفانوس في حالة الفرملة.
يتم التحكم بفتح و غلق الفوج الخلفي من زراع تحكم الاضاءة او بزرار منفصل بالتابلوه حسب العربية, و يتم تشغيله في حالات الشبورة او انعدام الرؤية لتنبيه السائق الخلفي.

*هناك مدرستين ,

الاولي بفوج خلفي واحد في جانب السائق ووجهة نظرها انه اذا تم عمل 2 فوج خلفي فانه سيخطلت علي السائق الخلفي انه نور فرامل مما قد يجعله يضغط علي الفرامل بدون داعي و يتسبب في حادث من الخلف.

المدرسة الثانية اثنين فوج خلفي ووجهة نظرها ان فوج لايت فواحد ممكن يوهم السائق الخلفي انها موتوسيكل و ليست سيارة مما قد ينتج عنها حوادث في حالة التخطي من اليمين, و لكنه لايحدث (في الدول المتقدمة) لان تخطي السيارة يكون من الجانب الايسر او جانب السائق اللي فيه الوفج الخلفي فلا داعي للقلق.

اقدر اقول ان حوالي 60% من السيارات بها فوج خلفي واحد و 40% باتنين فوج.
في مصر انا افضل 2 فوج خلفي لان اللي عاوز يعديك مش هيعدي من يمينك بس لأ ده ممكن ينط فوقيك.
في النهاية اتمني يكون التقرير عجبكو و مبسط , وبالمناسبة الخاصيتين دول موجودين في الكورولا 2014.

تحياتي,,,

**abofandy** · 14-02-2014 11:13 AM

ان مش عارف اية الى ممكن تعملة تانى فى التقارير
دة انا فصصت العربية يابنى
خايف المرة الجاية اشوفك فاتح الكبوت وفاكك الموتور والفتيس وبتشرحهم لينا من جوة هههههه
حبيبى يا ابو هانى ... جمعة مباركة ياصديقى العزيز ..

**bassem.naguib** · 14-02-2014 04:05 PM

تقرير جميل تسلم أيدك يا باشا .. وأنا عن نفسي أفضل السيارة اللي فيها اتنين فوج لايت خلفي مش واحد بس

فمثلا هناك سيارات بها اضواء led و لكن يمكن التحكم بفتحها و غلقها فلم تعد اضواء اجبارية او اضواء نهارية.

مش حنبطل نكش بقى!!! هههههههههههههههه

والاتنين حلوين والله .. والعبره في النهاية من وجهة نظري للارتياح النفسي

**saddam** · 14-02-2014 04:41 PM

صديقي المواطن
شكرا لجهودك اﻹستثنائية في خدمة أعضاء المنتدى الكرام ولا تحرمهم من كل جديد لك
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**Hany Saad** · 14-02-2014 05:14 PM

باشمهندس محمد هانى، اسمحلى يا كبير اضيف بعض النقاط لاكتمال الموضوع و هى سلبيات الأضواء النهارية ، طبعاً شويه استهلاك بنزين خفيف علشان هى شغاله طول ما العربية ماشية لكن مش هنا المشكلة، فكرة ال DRL متناسبش اى بلد لأن لو عايزين نبين العربية الصبح او فى الاضاءة الضعيفة طيب ما نشغل احنا الضوء الواطى بمزاجنا لو احتجنا، المشكلة بقى فى النقط اللى جاية:
١- زيادة الابهار فى العين
نتيجة شدة إضاءة ال Led بيعمل ابهار فى العين سواء للقادم فى وشك او اللى انت ماشى خلفه و اضوائك فى مرايته
٢-تقليل وضوح رؤية اشارات الانعطاف نتيجة شده ابهارهم
٣-بدلاً من دورهم فى زيادة وضوح السيارة فى حالات الاضاءة المنخفضة تؤدى اضواء ال drl الى نوع من التشتيت بالنسبة لباقى السائقين او للمرور العادى
٤-تؤدى الى تغيير المنظور للمسافة
جاءت شكاوى من سائقين انهم يرو السيارات المزودة ب DRL سواء القادمة امامهم او عند النظر اليها فى المراة على مسافة غير ما هى عليه..بعضهم اشتكى انها تظهر اقرب و بعضهم اشتكى انها تظهر ابعد و لكنهم كلهم اكدوا انها تظهر المسافة على غير الحقيقة
٥-لا تشجع السائقين على اضاءة الانوار الامامية العالية عند خفوت ضوء النهار او بالليل و ده اخطر و اهم عيب فى رأى
نظراً لما تقدمه من توضيح للرؤية الامامية مما يترتب عليه عدم تشغيل الاضواء الخلفية للسيارة فى حالة الضوء الخافت او بالليل و بالتالى زيادة نسبة الحوادث من الخلف نتيجة عدم رؤية السيارات القادمة خلفك لأضواء سيارتك الخلفية
٦- ال DRL بتبقى واضحة جداً فى مراة السيارة التى امامك و لكنه عاجز عن رؤية ابعاد عربيتك بوضوح نتيجة ابهارهم

علشان كده نصيحة لاى حد عنده DRL من فضلك ما تعتمدش على إضائتهم بالليل او العصر و من فضلك شغل الضوء العالى حتى لو اللى قدامك اتضايق و ذلك لتقليل الحوادث من الخلف...و ربنا يكفينا جميعاً شر الطريق
حبيت انقل البعد الاخر للموضوع علشان يبقى شرحنا مزاياها و عيوبها
تقبل تحياتى.....