الموضوع: عربية للمبتدئ اوتوماتيك؟؟؟؟

السلام عليكم معلش عايز رايكوا في حاجة مهمة،دلوقتي المدام لسه متعلمة سواقة جديد وعايزة تجيب عربية تتعلم عليها انتوا عارفين طبعا لو حد اول مرة يسوق بيجيب حاجة زي 128 مثلا يخبط فيها سنة ولا اتنين لحد مايبقي متمكن بس للاسف هي متعلمه علي اوتوماتيك وهتسوق اوتوماتيك وانا مش عارف ايه العربية الاوتوماتيك المكافئة لل128 في حالة المبتدئين ويكون سعرها قليل؟؟ بحيث انها تتعلم عليها كويس وبعدين تبيعها من غير ماتخسر كتير وتشتري وحده جديدة تعيش معاها ايه رايكوا يا جماعه ياريت تساعدوني ؟؟ واسف للاطالة

المشاركة الأصلية كتبت بواسطة shiko85

بسعر مقارب للـ 128 موديل كام ؟؟ لان الأسعار فيها تفاوت طبعا
بس صعب جدا تلاقى عربيه اوتوماتيك بسعر مقارب لأى 128 لان الأوتو بيبدأ من 35 الف "سويفت - برايد - اكسيل - النترا 90's - سيفيك 90's - شاريد " و هكذا
اشترى جديد احسن
نفرض انك لقيت عربيه مستعمله سعرها مناسب طيب هى عايزه تتعلم السواقه ولا عايزه تتعلم الصيانه ؟؟!!
مفيش عربيه بالسعر ده هتكون سليمه 100% لازم تكون محتاجه مصاريف او فتيس او عمره او او او و خصوصا فظل انعدام الأخلاق و الضمير و اعتقاد ان النصب على الناس نصاحه و شطاره يبقى صعب جدا او مستحيل تلاقى حاجه ممتازه بالمبلغ ده
و انت كده كده ناوى ان شاء الله تشترى عربيه جديده للمدام, يبقى توكل على الله و اشترى جديد من الأول
خايف العربيه تتخبط ؟؟ ما هى كده كده ها تتخبط حتى لو مركونه
و بدل ما تروح تشترى عربيه قديمه و تدفع تراخيص و صيانه و تغيير زيت و سيور و فلاتر و مساعدين و عفشه و كاوتش جديد و صيانة او تركيب تكييف و نظافه للعربيه و شد الفرش و المصاريف الكتير المعروفه و كمان وقت عند الصنايعيه و فالأخر هتلاقى نفسك دفعت مبلغ محترم بدون اى استفاده لان انت هتبيع العربيه بعد كده و لو جابت نفس السعر اللى انت جبتها بيه هتبقى خسرت المصاريف دى كلها
طيب لو جيب جديد انت هترتاح من كل ده و المدام هترتاح و هتركب عربيه جديده مش كل شويه تعطل و تتعطل هى و انت كمان تتعطل و هتلاقى نفسك متصاحب على الميكانيكى و الكهربائى. و كمان اسعار العربيات كل يوم بيزيد يعنى لو معالك مبلغ تجيب بيه عربيه السنه دى ممكن المبلغ ده ميجبش حاجه كمان سنه
يعنى بفرق الفلوس اللى هتدفعها فالمستعمل القديم اوى و المبلغ اللى هتوفره لو اشتريت جديد قبل ما الأسعار تغلى تانى تقدر تصلح اى حاجه ممكن تحصل لا قدر الله

متشكر لحضرتك انت تقريبا لخصت الموضوع كله وعندك حق في موضوع تتعلم الصيانة مش السواقة!! ده اللي انا خايف منه فعلا وبدل مانا جايبلها عربية عشان افضي انا هشغل بتصليحها اكتر ربنا يسهل واشوفلها حاجة جديدة معقولة انت رايك اجيبلها ايه طيب؟؟؟