الموضوع: 5000 كم مع ياريس سيدان 2014

السلام عليكم و رحمة الله و بركاته
امبارح عملت صيانة 5000 كم فى تويوتا التجمع الخامس - فيسنفال سيتى اتمنى افيدكم بتقرير صغير
انا معايا الفئة الاولى اوتوماتيك استلمت من ابو رواش العربية كانت عاملة 40 كم و لمبة البنزين منورة و فولت من موبيل اللى قبل البوابات
ضغط الكاوتشات كان كبير و ظبطه فى البنزينة على 30 بعد ما سألتهم هناك ( قايم العربية مكتوب عليه 21/22)
ال4 كاوتشات دانلوب 15
الحاجات اللى جاية مع العربية 4 طاسات و شنطة عدة و استبن و مسمار قطر و كوريك متثبت تحت الكرسي و طفاية سجاير و كتيب ارشادات عربي/انجليزى.

السيارة من الخارج:
عالية عن الارض - الخلوص 14.5 سم انا مقستوش للامانة بس انا عديت على مطبات حلوان المشهورة و محكتش.
الصاج بتاع العربية محمل مش خفيف - صاج السقف فى تكريب خفيف علشان تقليل مقاومة الهواءمقاومة

ورا الاكصدام فيه قايم حديد متوصل فى الشاسيه و ورا القايم بمسافة يجي الريداتير - لا قدر الله فى حالة حدوث صدام من الامام الاجزاء الداخلية بعيدة شوية عن الضرر.
من الداخل
الفرش بيج التابلوه شكله عاجبني-و دى اذواق طبعا - انما الخامات كويسة
3 عدادات - سرعة - rpm- بنزين
مافيش عدادحرارة - انما فى لمبتين بيان واحدة زرقاء بتفضل منورة لحد ما العربية تسخن و واحدة حمراء بتنور و تطفى لو العربية سخنت و بتفضل منورة لو الحرارة اصبحت كبيرة و لازم تقف.
الصفارة بتعات الحزام بتفضل شغالة دقيقتين و بعد كده بتعرف ان انت مصري و تقف :)
تانك البنزين 42 لتر و اللمبة بتنور لما يوصل 7.5 لتر
الشاشة اللى فى التابلوه فيها الساعة و عدد الكيلومترات المقطوعة و فى زرار تدوس عليها يعرض مسافة الرحلة و ممكن تحسب رحلتين
الكاسيت صوته حلو و فيه مدخل usb-aux
فيه مسند بين الكرسين و فيه مكان تخزين
العربية واسعة من وراء و من قدام و الشنطة مساحتها كبيرة
الفتيس الاوتوماتيك فيه l-2-3-d-n-r-p و لمبة الاستهلاك الاقتصادي بتنور فى حالة الوضع d بس و بتتطفى بعد سرعة 130 كم/س
العربية طبعا زى ما انتم عارفين 1300 سي سي و الموتور قدرته 84 حصان - ناس كتير شايفة الموتور تعبان
الفتيس ناعم و مش بتحس بالنقلات
العفشة ناعمة و الناس اللى ركبت ورا كانوا مبسوطين
اول صيانة كانت عند ال 1000 كم مجرد كشف ع العربية تربيط عفشة الخ الخ ده كان ابو بلاش
الموتور فى الاول كنت حاسس ان صوته عالي بعد كده بدأ يقل و رجع يزيد تانى قبل ال 5000 كم قبل ال 1000 مكنتش شغلت التكييف بعد كده كنت باشغله - تقريبا مافيش فرق فى عزم العربية بتكييف او من غير و استهلاك البنزين كمان مش بيفرق قوى
صيانة ال 5000 كم كلفتني حوالى 370 جنيه عملوا كل اللى فى الصيانة الاولى + تغيير زيت موبيل 5000 و فلتر الزيت + اختبار الفرامل الامامية
العربية فاقت تماما بعد غيار الزيت اداء رائع موتور متسمعش صوته سحب ممتاز
استهلاك البنزين فى المتوسط اللتر بيعمل 13 كم الكلام ده شاكب راكب يعنى باصفر العداد و انا داخل البنزينة و المرة اللى بعدها باشوف انا عملت كام كيلو بكام لتر
فرامل العربية لوز الجوز و ال abs حساسيته رائعة - العربية ذكية جدا - طبعا لو كيست بنزين جامد مرة واحدة او حسيت ام المسافة مش هتجيبك و تزود ال abs بيشتغل و مرة حصلت معايا كان فى زيت على الطريق و مع دوسة بنزين خفيفة اشتغل برضو - طبعا مننساش ان الكاوتشات لسه جديدة - abs مع كاوتشات ممسوحة مالوش 30 لازمة
الصيانة عند ال 5000 كم ممكن تحط زيت 10000 و تخلى الصيانة اللى بعدها عند ال 15000 او تعمل زيي علشان بعد ال 10000 بيختبروا الفرامل ورا و قدام
كان فى ملاحظة عنده فى الصيانة ان العجلة اللى ورا يمين فيها رفة و لما روحت لبتاع كاوتش مالقتش حاجة !!! مش فاهم ازاى يعنى
بالنسبة لكون العربية جديدة و حاجاتها مش موجودة غير عنده انا قاعدة المراية اتكسرت و لما سألت عليها طلعت ب 2500 جنيه بس دى طلعت بتاعت الفول اوبشنز (ضم كهربا + اشارة) بعد كده عرفت انها ب 1450 و ده سعر معقول للفئة دى من العربيات
فلتر البنزين ب 57 جنيه و بالمرة سألت ع الاكصدام الامامي اصل انا مروقه كام خربوش و كام خبطة طلع بـ 5400 جنيه :)))
عموما العربية الى حد ما عاجباني اعتقد انها غالية شوية بس كل العربيات غليت و صدقونى الكلام بتاع 1300 سي سي و السحب و الكلام ده ولا فارقة ده غير ان انا مش عاوز عربية ادخل بيها سباق او اقل بيها العداد انا طريق شغل استحالة اعدى فيه ال 120 كم/ساعة غير على الاوتوستراد من مايو لمدخل حلوان بالضبط حوالى 5 دقائق :))
ربنا يكفينا جميعا شر الطريق اتمنى اكون افدتكم