الموضوع: مياه راديراتير 406

المشاركة الأصلية كتبت بواسطة م أحمد

ايه افضل الانواع للسيارة
الحمراء ام الخضراء ؟

الأفضل مش باللون, وعموماً قبل ما تقرأ ردي دا الأفضل اللي تجيبها هيا الحمراء.
ولكن,,

مياء التبريد عبارة عن:-
ماء مقطر + الأيثلين جليكول (المادة المستخدمة في التبريد) *وهيا المادة الرئيسية في مياة التبريد في السيارات, وهيا بتمنع غليان الماء عند درجة حرارة 100 مئوية, وبتمنع تجمد الماء عند درجة حرارة 0 مئوية,
يعني لو ماء التبرد عبارة عن مية حنفية بس, أو مية مقطرة بس, المياة هتغلي في الرادياتير لما درجة حرارة المحرك تعدي 100, وهتتجمد لو درجة حرارة الجو وصلت 0
فعشان كدا مادة الأيثلين جليكول مهمة سواء في الدول الحارة أو الباردة, لأن كل ما نسبة تركيزها بتزيد, بتزود درجة غليان الماء لحد 120 وأكتر شوية, وبتمنع تجمد الماء لحد -35
وفيه ملحوظة صغيرة, مينفعش ماء التبريد كله يكون ايثلين جليكول, لازم يكون فيه ماء مقطر في التركيبة لأنه هوا اللي بينقل وبيشتت الحرارة, لو تم أستخدام ايثلين جليكول خام العربية هتعلي درجة حرارتها في الحر, وهتبقي باردة في البرد.

باقي الأضات + موانع صدأ + مواد مزيته لطلمبة المياة.

معظم الشركات المصنعة بتختار لون خاص بيها عشان يميز المياة بتاعتها عن مصنعين أخرين,
في تويوتا مياة التبريد بتاعتهم من نوع OAT لونها أحمر.
في VW مياة التبريد بتاعتهم من نوع OAT لونها بينك.
في بيجو مياة التبريد بتاعتهم من نوع OAT لونها أخضر مزرق.!!

كلهم نفس التكنولوجيا, مع أختلافات بسيطة,, ولكن الأساس واحد وهوا إن كلهم متصنعين علي أساس الأضافات OAT أختصار ل Organic Acid Technology
الأضفات ودي اللي خلت مياة التبريد تعيش لفترة أطول بدورة التبريد,
لمدة تصل إلي 5 سنين أو 250 ألف كيلومتر,
وطبعاً كل ما الفترة بتزيد دا بيريح المستخدم للسيارة لأن فترات تغير المياة هتبقي علي فترات أطول,

وكمان التغير علي فترات أطول بيقل الضرر علي البيئة لأن مادة الأيثلين جليكول اللي مستخدمة في التبريد مادة سامة,
وكتر التغير الخاطئ بها مضر بالبيئة لو أتفرغت بطريقة غير مناسبة زي اللي بيغيرو مية في الشارع ويفكو خرطوم الرادياتير ويسيبوة يفضي علي الأرض,, دا لو قطة معدية ولا كلب شرب من المية دي هيموت, وطبعاً اللي عمل كدا هيتحاسب علي الكلام دا.
ونفس الكلام بالنسبة للزرع والنباتات.

المياة القديمة اللي من نوه IAT أختصار ل inorganic Acid Technology
دي كانت بتستخدم أضافات أسمها Silicates ودي كانت سريعة المفعول عن الأضافات اللي موجودة في أنواع مياة التبريد الجديدة زي الحمراء اللي هيا OAT
فال IAT كانت سريعة المفعول,, وكانت أيضاً سريعة في أنتهاء صلاحيتها,, يعني أخرها سنتين ل تلاتة ومش يتمشي بيها أكتر من 100 ألف كيلو متر,,

لو أتمشي عليها أكتر من فترة صلاحيتها, بتبدأ ال Silicate تأكل في طلمبة المياء والأجزاء الألمونيوم بداخل المحرك ودورة التبريد,!!!

عشان كدا كل العربيات الجديدة بتستخدم مياة تبريد من نوع OAT لأن دي اللي مناسبة للسيارات الجديدة ودورات المياة اللي فيها رادياتير المونيوم,

أما السيارات القديمة قبل 1996 اللي كان فيها رادياتر نحاس دي كان أفضل ليها مياة التبريد من نوه IAT

المشاركة الأصلية كتبت بواسطة م أحمد

انا لقيت الخضراء موبيل مكتوب عليها
glystanin30
و الحمراء مكتوب عليها
glystanin48
و الكتالوج
glystanin33 بس دا للدول الباردة جدااااا جدااااا

G48 دي الخضراء, ودي الل هيا IAT مش أورجانيك,
ودي غلط جداً علي موتور ورادياتير عربيتك, ومتوافقه مع العربيات اللي أتصنعت لحد قبل 1996
وكنت مصورها وكاتب عنها في الموضوع دا,


http://www.nilemotors.net/Nile/35771...post3874994100

ال G33 دي بتاعت بيجو وستروين الأصلية, اللي لونها أخضر علي أزرق كدا.
ومش للدول الباردة جداً ولا حاجة, دا اللي بينزل في كل العربيات البيجو الجديدة بما فيهم عربيتك, وتركيزة مناسب لأي دولة في العالم زي ما وضحت لك في أول ردي عن الأيثلين جليكول (المادة المستخدمة في التبريد).

وال G30 دي بتاعت ال VW
والأتنين دول ممكن تستخدمهم عندك من غير مشاكل,

المشاركة الأصلية كتبت بواسطة م أحمد

فما مش عارف ايه افضل نوع و هل فى حاجة افضل من موبيل ؟

موبيل زي الزفت, سواء في الحمراء أو الخضراء,,
الخضراء مضرة بالموتور ودورة التبريد عموماً لأنها مش مناسبة للعربيات الجديدة,
والحمراء عبارة عن مية طرشي, المفروض إن تركيزها 33% بس هيا أقل من كدا بكتير وتعبانة جداً يعني هتشتري مية مقطرة ب حوالي 88 جنيه.!!

أفضل حاجة ممكن تشتري وموثوق فيها المياة بتاعت تويوتا الحمراء, بتجيبها من توكيل تويوتا بتكون أمريكي مش معمولة في مصر زي موبيل, وبتكون مركزة وتخففها كل لتر ماء تبريد أحمر ب 2 لتر ماء مقطر وهتاخد أداء ممتاز وتركيز مظبوط,
وبرضه المية بتاعت سوبارو ممتازة جداً جداً.
الأتنين ممتازين.

وشوف ايه اللي متاح حواليك وقلي لاقيت أيه, وصورهم, وهقلك الأفضل لعربيتك منهم.

المشاركة الأصلية كتبت بواسطة م أحمد

ملاحظة :المياه الموجودة فى السيارة بلا لون واضح لكى اضع مثله

اللون ما هوا اللي صبغة, dye
لها عمر أفتراضي وبتروح بعد فترة للأسف.
عربيتك لو موديل حديث فوق ال 1996 في الغالب هتكون نازلة بمياة تبريد OAT
ولما تغيرها يفضل تغيرها بمياة OAT زي اللي كانت فيها, سواء كانت حمراء أو خضراء OAT الخاصة ب بيجو.

في بيجو مياة التبريد بتاعتهم من نوع OAT لونها أخضر مزرق.! ودي الأفضل لعربيتك لو لاقيتها,
أما لو ملاقتهاش وصعب تلاقيها هنا لأن أكتر الأخضر اللي في مصر IAT ودا غلط جداً علي محرك ودورة تبريد عربيتك. فساعتها هتحط مياة حمراء وتتأكد أنها OAT قبل ما تحطها.


مواضيه مشابهة لو حابب تقرأ أكتر عن موضوع المياة,
http://www.nilemotors.net/Nile/37991...post3875281502
http://www.nilemotors.net/Nile/361223-a.html
http://www.nilemotors.net/Nile/35771...post3874993860

http://www.nilemotors.net/Nile/35531...post3874979063
http://www.nilemotors.net/Nile/360272-a.html
http://www.nilemotors.net/Nile/388269-301-3.html