الموضوع: ..:: كورولا 2014 والتعديل والفروقات ما قبل وبعد التعديل ::..

بسم الله الرحمن الرحيم

تحيه طيبه لكل مرتادى قسم تويوتا
وتحية خاصة لكل مالكى الوحش اليابانى
((( كورولا 2014 )))

دائما مظلومة معانا الكورولا هذا العام وظلمت 3 مرات :

1. الكورولا ستفشل بسبب انها صناعة تركيه وليسة يابانية خالص (( خدعوك فقالو .. )) .
2. الكورولا ستفشل بسبب انخفاضها عن الارض وهتحك فى المطبات (( واهى نزلت متعدله .. )) .
3. الكورولاستفشل بسبب الى استلم من غير تعديل هيدفع تمن تكاليف لان الشركه الام مش هتدفع للتعديل .

وجائت الكورولا تجيب عن نفسها على الاتهامات السابقة بالتوالى :

1 . كل ملاك الكورولا مفيش مشاكل عويصة ظهرت فى التقفيل التركى بل بالعكس الناس اشادت بالتقفيل التركى وكمالياته مقارنة بالخليجى (( فى لييبا العربيتن موجودين بالصناعة التركيه والخليجية والناس اشادت حتى من غلقت الابواب )) .
2 . الدفعات الجديدة المستلمة اصبحت تعالج مشكلة الانخفاض والسيارة اصبحت معدله من المصنع بالارتفاع الجديد
3 . لما اصبحت الكورولا بعد التعديل الى نزل فى الدفعات الجديدة مبقاش فية حجه للناس دى تطلع مشكلة فى العربية فاصبحت ترعب الناس الى استلمت العربية وتذيع ان العربية دى خلاص هتفضل كدة ولو عايز تعدلها ادفع وان الشركه الام مش هتتكلف على السياره 10 الاف جنيه علشان تعدلها لانها مش عيب تقنى او عيب فنى او عيب صناعة المشكلة عندنا فى شوارعنا
(( ملقاش فى الورد عيب قالك احمر الخدين ))
مش هكذب عليكما انا اول الناس الى زعلت من الخبر دة لو كان حقيقى لان معنى كدة ان العربية دى خلاص كدة تاقلم بقى انت على الحك الى بيحصل دة وعيش وعايز تعدل ادفع

النهاردة انا عملت شوية اتصالات ونزلت بنفسى علشان اعرف نهاية الموضوع دة
واتصل عليا المهندس الخلوق محمد هانى وتم عمل الاتى :

1 - الاتصال بالموزع تويوتا فى المنصورة

(( شركه النصر للتوزيع والتجارة ))
العنوان / حى الجامعة
التليفون / 0502220579 - 01007227555
المهندس المختص أ / أحمد صلاح
وكان الكلام كالاتى : التعديل موجود فعلا وهيتم التنفيذ ان شاء الله فى نهاية الشهر الحالى او الشهر المقبل بامر الله والقطع التعديل موجوده فى الافرع الرئيسية والموضوع تحت الدراسة من فتره كبيرة بسبب الشكاوى .. والتعديل بيكون على حساب الشركه مش على حساب العميل

قولت كلام التليفون مش هينفع انا لازم انزله بنفسى ويبقى الكلام وجه لوجه وتم تاكيد الكلام وقالى تابع معايا فى التليفون ع اخر الشهر واعملك update للمعلومات وخد اسم الموقع وقال انه هيدخل بنفسة يتابع ويطمن الناس القلقانه ولو فية اى حد عايز يستفسر عن اى معلومة تليفونه انا حطيته علشان المصدقية فقط .

العربيات الموجودة فى المعرض كلها متعدله وهناك تسليم فورى
الفول اوبشن تسليم فورى ب 205 الف جنيه
والهاى لاين تسليم فورى ب 230 الف جنيه

2 - فرع التجمع الخامس

تم التحدث الى احد مندوبى المبيعات (( معرفة شخصية )) هاتفيا وكان الكلام كالاتى :
قطع الغيار متواجدة بالفعل بس لسة لم يصدر امر الشغل علشان نعمل اتصال بالناس الى استلمت بس متقلقش التعديل هيتعمل ..
ولو التكلفة بنسبة كبيره هتبقى على الشركه لان الشركه نزلت دلوقتى كل العربيات متعدله فى الدفعة الى استلمت بدون تعديل هتتعدل على تكلفة الشركه بس فى انتظار صدور امر الشغل وهى مساله وقت لانها روتين اوراق فقط لا غير .

3 - فرع العباسية (( الفرع الام ))

تم التحدث الى احد مندوبى المبيعات (( الى سلمنى سيارتى شهر 11 فى العام الماضى ))
أ / محمد عبد الفتاح
الوظيفة : مندوب مبيعات فرع العباسية
الهاتف : 01227326713
المكالمه :
فية تعديل تم اقراره من اليابان والموضوع بيدرس فقط وبنشوف اية الى تم تعديلة فى العربيات الى فى الدفعة دى والقطع الى ركبت فى العربيات الدفعات الحديثة بنشوف رد الفعل الاول وتجربة السياره فى المطباب ويتعمل feedback وهل فية شكاوى من التعديل الى اتعمل فى المصنع ولا لا والحمد لله مفيش اى شكوى واحدة تم تسجيلها من الدفعات الجديدة ودة يدل ان العربية كويسة
فان شاء الله لا تقلق التعديل هيتعمل بس امتا .. السوال دة للادارة هى الى تبت فى الموضوع لانها الى هتعمل recall ويتم التعديل بامر الله .

4 - أ / شادى محمد
الوظيفة : مدير قسم الاكسسورات فى فرع العباسية
الهاتف : 01003666087
المكالمه :
الموضوع موجود وطبعا العربية فى الدفعة الاول حصل كلام كتير بسبب انها بتحك عند العجلة الامامية فى الكارتيره بس الانخفاض وفية شكاوى كتير وتم ارسالها لليابان وجاء الرد بالتعديل بالموافقة حتى الدفعات الجديدة اتعدلت كلها ومفيش عربية بتنزل دلوقتى الا متعدلة من بره
وبالنسبة للعربيات الى استلمت قبل كدة فتعديلها موجودة اقصد القطع موجودة بس الاستدعاءات للسياره للتعديل امتا .. لسة محدش يعرف الميعاد بالضبط

دة يا جماعة الى قدرت اعمله النهاردة علشان اطمن الناس الى قلقت وكلمتنى
انا عملت الموضوع وكتبت الاسماء بالاسم وبارقام التليفونات علشان الى مقلق من حاجة يقدر يرفع سماعة التليفون ويكلم الناس دى ويسمع الكلام بنفسة ومفيش اى فرد من الى انا كتبت اسمه او تليفونه هيمانع من الاسئلة او الاستفسارات علشان يبقى بس فية مصدقية للكلام

الناس الى استلمت العربية انا عملت تقرير فى شهر 9 العام الماضى ولما اتكلمنا عن انخفاض العربية مانكرناش ان العربية واطية ولكن احنا اشترينا العربية وعارفين انها منخفضة ليس عيبا فى السيارة ولكن عيب فى شوارعنا ورضينا بالامر ولما اتجمعنا كلنا وبدانا نعمل شكاوى لتويوتا ايجيب حتى فية ناس عملت معانا ايميلات لتويوتا الام فى اليابان وكانت النتيجة
- العربية الجديدة نزلت متعدله (( الف مبروك لكل الى استلم متعدل ))
- العربية الى استلملت بدون تعديل (( التعديل موجود ويبقى الموعد وبدون تكلفة ان شاء الله ))

مقارنة سريعة للسياره قبل وبعد التعديل
اثناء تواجدى فى معرض النصر موزع تويوتا بالمنصورة كان هناك احد الاصدقاء وكان استلم السيارة بالتعديل طبعا احرجت اقوله انزل واسوق انا لانها مش ظريفة منى
انا معايا طبعا السياره قبل التعديل وعارف المطبات الى كانت بتحك فيها العربية فى المنصورة
فبذكاء المصريين المعتاد ومن غير ما يشعر قولتله انا هعزمك على ايس كريم وخليت يسوق ونلف شوية ومريت على المطبات الى كانت بتحك معايا ولازم اخد المطب بالجنب وكدة .. فى الجديدة ماشاء الله فرقت كتير اى نعم الزيادة فى الارتفاع مش كتير حوالى 2.5سم بس فرقت فى المطبات بصورة رهيبة
بالنسبة للثبات كان الطريق مزدحم شوية العربيات على الطريق السريع على 120كم كانت ثابتة مفيش اى مشاكل بس للامانه مقدرش يجيب اكتر من كدة لان الطريق كان مزدحم . بعتذر ان مفيش صور لان المووضوع ماخدش نص ساعة على بعضها بس لو ربنا ارد فى فرصة تانية اعمل تقرير محترم

فى النهاية
مبروك لكل الى استلم العربية
ومبروك لكل الى بيفكر فى العربية
ومبروك لكل الى مستنى التعديل