السلام عليكم ورحمة الله وبركاته .
انا اخوكم شريف محمد زميلكم من قسم رينو و محتاج رايكم في عربية متسوبيشي لانسر بطه مانيوال موديل 93 ومواصفاتها كالأتى :-
- راشة بره كلها نضافة ماعدا السقف والصاج من بره شكله سليم وعدل من غير انبعاجات
- اللون فيراني فاتح
- عداد 145 الف كم (فعلى)
- صالون وقوايم بحالة الزيرو بمعني الكلمة الفرش الجلد الأصلي بحالته تماماً من غير اي خدوش او قطع والتابلوه كل حاجه فيه تحسها جديده ومفيش اي كسور او خدوش ونفس الكلام فرش البيبان والسقف والأرضيه الموكيت كله زيرو .
- عفشة سليمه مفيش اصوات كركبة
- حوض الموتور جديد وتحس ان مفيش حاجه اتفكت منه خالص والشنب وقنطرة الرداياتير متلمسوش نهائي .
- موتور حالته ممتازه مالوش صوت وناعم جداً مفيش اي تسريب زيوت نهائي
- 4 فرد كاوتش بريدجستون ماشيين 15 الف كم
- التكييف يعمل بكفاءة
العيوب فيها خبطه خفيفة في العضم الى ورا الفانوس الخلفي يمين وشمال ومردودين على البارد ومش مسمعين في اي جزء اخر (فقط خلف الفانوسين مباشرة جزء لا يتجاوز 5 سم في كل جانب) اما باقي الشنطه فابريقة وبحالة ممتازة ..
السقف من ركنه العربية الكلاب خلته هبط لتحت خالص بس لما خبطه من الداخل رجع مكانه تاني بس مازال به بعض الانبعاجات الخفيفة .
مفيش اي عيوب تانيه في العربية وهيا بتاعت واحد صاحبي هو مدير عام في وزارة الخارجيه وهو شاريها ومسافر بعثة بقاله سنه ونص والعربية مرفوعه من ساعتها بس ماشاء الله اول محطيط المفتاح في الكونتاكت دارت من اول تكه ..
انا معايا رينو ميجان وكنت ببيعها بـ 70 الف جنيه وكنت بدور على حاجه اقل منها عشان محتاج فرق الفلوس
المهم ان الميجان عاجبه صاحبي ده جداُ وهو عرض عليا انه ياخدها ويديني البطه وحسبنا الميجان بـ 70 والبطه بـ 37 ...
مشكلتي اني متعاملتش في الياباني قبل كده وخايف العربية تتعبني وكمان لأنها مفيهاش غير تكييف بس مفيش باور ولا زجاج كهرباء ولا اي اوبشن تاني وكمان عاوز اعرف ينفع تتقلب اوتوماتيك ولا لاوالتكلفة هتبقى كام تقريباً
والمشكله التانية ناس كتير قالتي البطه واطيه وهتقرفك في المطبات خاصة اني بسافر كتير وبملى الشنطه للأخربس اسرتي صغيرة
كمان مش عارف السعر كده طبيعي ولا عالى
ارجوكم فيدوني عشان اعرف اخد القرار الصح وشكراً مقدماً لكل الأعضاء
المفضلات