ليه بيجو 508 ومش حاجة تانية؟ أنا أقولك..

**Moenada** · 20-02-2014 10:12 PM

السلام عليكم
انا دخلت المنتدى ده بالصدفة من فترة قليلة وفعلا من احسن المنتديات المصرية الموجودة والمعلومات اللي فيه قيمة جدا...
المهم، انا حاليا بفكر اشتري عربية جديدة وكنت محتار جدا بين البيجو 508 وعربيات تانية من نفس الفئة (تحديدا الباسات والانسيجنيا)، وبعد ابحاث طالت بالساعات والايام، على مواقع عربية وغير عربية، استقريت الحمد لله على البيجو 508...انا مش هتكلم عن مميزتها عشان الموضوع ده اتهرس 50 مره هنا، بس هركز اكتر على الحاجات اللي مخليّة الناس تحتار بينها وبين عربيات تانية (زي حالاتي كدة):

1- سمعة الفرنساوي في مصر وحشة...انا معاك، بس ده بسبب موديلات تانية غير البيجو (زي الرينو والستروين) اللي جاتلهم فترة ولم تكن موفقة في السوق المصري، وبسبب ايضا التوكيل اللي كان ماسك بيجو (وجيه أباظة، وده اتغير الحمد لله) اللي اساء للماركة من حيث خدمة ما بعد البيع وقطع الغيار والموديلات الصيني اللي نزلت في الفترة الاخيرة

2- العربية في السوق المصري بقالها سنتين تقريبا ومافيش اي شكوى منها او من التوكيل الجديد...بالعكس كلها حاجات ايجابية

3- العربية قطع غيارها سعرها مناسب جدا خصوصا القطع الخاصة بالصيانة الدورية (الفلاتر، البوجيهات، التيل) وتكاد تكون مثل او اقل من الياباني والكوري...وزي ما قلت متجربة ومتوافرة ومافيش شكوى

4- اسطورة بنزين 95 اتحلت بأن التوكيل نزل بيان ان العربية تشتغل ب 92 عادي وتقتدر تحاسبهم عل كلام ده...وبرضة الموضوع متجرب...وبخصوص تحسن الأداء لو حطيت 95، ف ده في اي عربية في الدنيا مش البيجو بس

5- بالنسبة لموضوع اعادة البيع وانك هتخسر فيها: أي عربية هتبيعها قبل خمس سنين كده كده هتخسر فيها...بعد ال 5 سنين مش بتكون الخسارة الرهيبة اللي الناس متخيلاها...وانا شخصيا لو هدفع المبلغ ده في عربية مش هفكر ابيعها قبل 7 سنين على الاقل...ليه احرم نفسي من متعة العربية خوفا من مستقبل انا مش عارف ايه اللي ممكن يحل فيه؟ وعشان ماخسرش كام؟ في اعتقادي مش مبلغ هلامي، بس برضة ده انا...كل واحد ليه دماغه طبعا

6- بالنسبة لموضوع ان البيجو اول كام سنة بتكون زي الفل معاك بس بعد كدة هتبهدلك وتفلسك بسبب قطع الغيار الغالية اللي بتضرب لما العربية تقدم...انا مش هقول غير كلمتين: ال504 و ال505...دول من اكتر العربيات اللي انتشرت في مصر زمان بسبب قوة تحملهم واعتماديتهم وكل حاجة ممكن تتخيلها...بدليل انهم لسه في الشوارع لحد دلوقتي، ولو بتروح الاقاليم اكيد بتشوف "البيجو" رايحة جاية...

7- طيب هتقولي ده كان زمان وماكانش فيه ساعتها التكنولوجيا المتطورة بتاعت دلوقتي وال sensors و و و...انا معاك بس احقاقا للحق السمعة اللي طلعت على الفرنساوى بشكل عام وزي ما قلت ده شامل الرينو والستروين، والشكاوي في الموضوع ده بالنسبة للبيجو كانت قليلة جدا جدا وتقدر تسأل اي حد كان معاه بيجو قبل كده...وبعدين في حاجة تانية، ال 508 دي من سلاسة ال 504 و 505 ف ده شئ مطمئن في حد ذاته (غير سلالات البيجو التانية زي 206/7 او 307 او 406/7)...ده غير انها اعلى فئة في البيجو دلوقتي و بيجو بتراهن بسمعتها عليها (وسمعة بيجو مش حاجة قليلة في اوروبا) ف عشان كدة أشك انها تخاطر ولو ب 1% بموديل يكون فيه مشاكل...وبرضة زي ما قلت العربية متجربة بقالها سنتين وفعلا من العربيات القليلة جدا اللي الواحد ماشفش شكاوي منها

الخلاصة اني فعلا بعد ما قتلت الموضوع ده بحثا، العربية دي بتاريخها وشكلها ومميزتها تستاهل اكتر من سعرها..

اسف على الاطالة وارجو ان الموضوع يكون مفيد ويقلل من حيرتكوا

**khaled_afandy** · 20-02-2014 10:38 PM

الستروين سى 5 هى هى ال 508 بس ارخص 20 الف و فى رايى اشيك تصميمت خاصة من الخلف و بها ايرباج زيادة

**mohamed hussei** · 20-02-2014 11:02 PM

الموضوع في كذا خطأ ان رينو مبوظة سمعة الفرنساوي في مصر ممكن تشوف انتشار لوجان وفلوانس وميجان

**Anaslbda** · 20-02-2014 11:13 PM

أنا بعشق حاجة اسمها 508,
لكن لمّا تحطها جنب الباسات, آسف, الباسات تكسب.
ممكن تقول عُقدة الألماني.

**Moenada** · 20-02-2014 11:39 PM

المشاركة الأصلية كتبت بواسطة khaled_afandy

الستروين سى 5 هى هى ال 508 بس ارخص 20 الف و فى رايى اشيك تصميمت خاصة من الخلف و بها ايرباج زيادة

انا بصراحة ماعنديش معلومات عن ال سي ٥ فا ماقدرش اقول هي هي ولا لأ...اما الشكل ف دي اذواق طبعا

**Moenada** · 20-02-2014 11:43 PM

المشاركة الأصلية كتبت بواسطة mohamed hussei

الموضوع في كذا خطأ ان رينو مبوظة سمعة الفرنساوي في مصر ممكن تشوف انتشار لوجان وفلوانس وميجان

انا شخصياً سمعت شكاوي كتير من الميجان بخصوص حوار السينسورز وكده لكن ماسمعتش حاجة عن اللوجان والفلوينس الصراحة...وعموماً انا شايف ان الفرنساوي اتظلم في مصر بسبب الوكلاء مش الجودة