هل تخرج السيارة من التوكيل كالجديدة؟

**Hanytoto12** · 21-02-2014 03:43 PM

عربيتي والحمد لله بعد استلامها بخمس ايام اتخبطت وهي في البارك (تخيلوا؟!!) وراحت فرحة العربية ومن يومها وأنا متأزم جدا وتعبني موضوع إزاي هرخصها و التأمين والإصلاح مابين برة وللا في التوكيل.المهم

عربيتي راحت التوكيل (السبع) وغيرت حاجات بسيطة :( أصل يادوب إللي خبطتها كانت عربية البوكس بتاعة الشرطة :((( يعني غيرت
فانوسين خلفي + شنطة + اسبويلر + إكصدام خلفي + رفرف خلفي شمال + طبعا سمكرة وإعادة دهان الأجزاء الخلفية + مصنعيات الفك والتركيب وخلافة .... يادوب يعني :(((((

المهم سؤالي يا أفاضل هل العربية ترجع زي ماكانت وللا هتأثر عليها وتبان بقي الخبطة وكفائتها تتنيل وكده .. والله هعيط :(((

مهندس الصيانة قاللي ماتخافش يا بشمهندس كله هيبقي زي الفل... الكلام ده صح؟ وللا إيه؟
كمان مرعوب من موضوع إن ساعات التوكيل بيفك حاجات م العربية يحطها فعربيات تانية وبصراحة عربيتي كانت ممتازة والحمد لله ماشفتش فيها المشاكل إللي كنت باقراها قبل ماشتريها..من الآخر مرعوب وعاوز حد يفهمني..وشكرا يا أفاضل

**Msanad** · 21-02-2014 04:12 PM

الحمد لله على كل شىء
المهم انك سليم - وللاسف فيه ناس بتستكتر على الناس انها تركب عربيه جديدة - ما يعرفوش ازاى الواحد شقيان فى الفلوس دى
ما علينا - ربنا يباركلك فى العربية ورزقك
التوكيل بيعمل شغل مضبوط - ولكنه غالى بس زى ما بيقولوا الغالى تمنه فيه -لانه ملتزم بكل تصليح بيعمله ومسئول عنه
طالما ان عربيتك متأمن عليها يبقى ما تقلقشى - التأمين هيتعامل معاهم - بس انت خليك متابع وزن عليهم كل شويه يخلصوا
وبعد ما يخلصوا هما ملتزمين انهم يسلموك القطع اللى اتغيرت - وما تتنازلشى عن اى قطعه لانها حقك والتأمين هيطالبك بيها والا هيخصم تمنها من فاتورتك

ابقى طمنا عليك وعلى خطواتك
ومعلشى هوا الجديد كده

**Islam_klose** · 21-02-2014 04:38 PM

معلش العين بقى هتقول ايه انا جبت صني 2014 برضو و عملت حادثه زي بتاعتك او اكتر شويه و مكنتش لسه مرخص ولا مأمن بس قوول الحمد لله انها بتيجي في العربية

**grumby78** · 21-02-2014 04:38 PM

ان شاء الله ترجع كالجديده وبعدين متزعلش نفسك وفكر في الموضوع انه قدر لامهرب منه . يعني مكتوبلك الموضوع ده والتوكيل افضل مكان للتصليح لانه بيضمن اصلاحه ومش بيسترخص يعني بيغير اللازم بدون التفكير في التكاليف الماديه وقطع غيار اصليه طبعا . دمت بصحه

**abofandy** · 21-02-2014 04:48 PM

متخفش ان شاء الله هترجع زى الاول بالضبط بدون اى مشاكل
ومفيش حاجة اسمها التوكيل بيفك دة من عربية ويركبه فى العربية دى
التوكيل مش هيضحى بسمعته الحاجة لو مطلوب انها تتغير هتتغير متقلق
وهترجع زى الاول ان شاء الله وفك كدة ومتكشرش الحمد لله اناه جت على كدة وانت سليم وبصحة

**مانويل مايكل** · 21-02-2014 08:39 PM

موقف غريب

انا بعد استلامى صنى 2013 بخمسة أشهر . حصل أنى كنت بغير ركنة العربية لظروف ما فى الشارع . يعنى العربية مشيت حوالى 30 متر . وأنا بركن سمعت صوت المراوح أشتغلت وكمان لما نزلت لقيت مية خضراء تحت العربية وبصيت على المؤشر لقيتة هيعدى النص وطالع. جبت ميكاميكى (قاصد) يشوف . ضرب كف على كف وقال أطلع على التوكيل الردياتير ضرب. (بعد الهرى والرغى مع التوكيل ) بعت ونش المهم سواق الونش خلالى الأكصدام اللى قدام (طبيخ) لأنة مربطش العربية من الخلف فكانت بتزحف لقدام (بعد الهرى مع التوكيل بخصوص الردياتير والأكصدام)
طلع العيب من سدادة الردياتير السفلى مفكوكة عشان كدة قولت (ميكاميكى) والأكصدام أترش وأتظبط (قولت نشكر الله على كل حاجة)