مزيد من المعلومات عن الشيرى a11 الطنابير الخلفيه

**douha_wise** · 21-02-2014 06:27 PM

السلام عليكم احبابى و اخوتى
احببت كما تعودنا أن نتعاون جميعا لفك الطلاسم المجهوله عن سيارتنا و خاصة بعد التجربه فالسمع يختلف عن التجربه الفعليه
تجربتى الأخيره عن تغيير الطنابير الخلفيه نسمع القصه و ارجو الا تكون ممله كباقى قصصى و رواياتى عن السياره
ذهبت الجمعه الماضيه للحرفيين لتغيير الطنابير الخلفيه و بعد بحث ذهبت لميكانيكى هناك و اتفقت معه على تغييرها و كنت اظن انها طنابير جولف 2 او 3 لكن فاجأنى بقوله طنابير بولو 2001 و ابيزا 2001 ايضا
المهم اخذت القديمه بعد فكها و لفيت لفه محترمه و بعد بحث لم يرضى أى أحد من البائعين هناك بيع الطنابير وحدها يريد بيع الجنبين كاملين أو الدنجل بحاله و فكرت و استخرت الله هل اشتريها جديده ام استيراد جانبين كاملين فوجدت الجديده تعمل 350 و الجنبين كاملين بنفس السعر من الآخر فقلت اشترى الاستيراد لو عجبنى و جعلته هدف أول لى لأنه سيكون كامل و ايضا الطنابير الجديده انواع غير مرضيه حتى ولو قالوا المانى
المهم انتهى بى الأمر عند محل اسمه محمد الشحات و اشرت له على دنجل يفك منه الجنبين و بسم الله ما شاء الله ربما أفضل من الجديد حتى التيل تحس انه لم يستعمل و كذلك الصره و ذهبت بهم للميكانيكى و قالى كويسين فأتفقت معه على تركيب الطنابير فقط بدلا من تركيب الجنبين الجداد كاملين و بصراحه كانوا بيغرونى اركبهم فالميكانيكى قالى اللى عندك برضه جداد و على فكرة الطنابير لها 5 فتحات 4 منهم لمسامير العجل وواحده للمسمار الصغير اللى بيربط الطنبورة بالصره فخلوا بالكم من الموضوع ده
المهم تم تركيبهم و قريبا بإذن الله سأحاول تظبيط ال abs حتى و لو لزم الأمر تغيير الجهاز ايضا و على فكره هو برضه بتاع البولو 2001 بالظبط

**ahmed2801** · 21-02-2014 07:46 PM

مشكور على المجهود الرائع الى حضرتك عملته من لف وفحص وتمحيص, ونقل تجربتك بأمانة هايلة ليستفيد منها الجميع .
لما كنت ف الحرفيين ما سألتش على تطوير للطنابير الخلفية الى سكاكين او جنب كامل او دنجل كامل يركب على العربية لتحسين حالة الفرامل الى الاحسن. (وهو ده الموضوع القادم ان شاء الله)
هل الـ 350 جنية دول للدنجل الكامل ولا للطنابير فقط؟؟؟
وهل دنجل الابيزا او البولو نفس المقاس؟؟؟
السؤال بقى هو حضرتك غيرت الطنابير ليه ؟؟؟

**douha_wise** · 21-02-2014 09:22 PM

المشاركة الأصلية كتبت بواسطة ahmed2801

مشكور على المجهود الرائع الى حضرتك عملته من لف وفحص وتمحيص, ونقل تجربتك بأمانة هايلة ليستفيد منها الجميع .
لما كنت ف الحرفيين ما سألتش على تطوير للطنابير الخلفية الى سكاكين او جنب كامل او دنجل كامل يركب على العربية لتحسين حالة الفرامل الى الاحسن. (وهو ده الموضوع القادم ان شاء الله)
هل الـ 350 جنية دول للدنجل الكامل ولا للطنابير فقط؟؟؟
وهل دنجل الابيزا او البولو نفس المقاس؟؟؟
السؤال بقى هو حضرتك غيرت الطنابير ليه ؟؟؟

بصراحه لم اسأل على موضوع السكاكين و ال 350 كما قلت للجنبين فقط و ليس للدنجل كامل و عموما ﻻزم تكون معاك الطنبوره عشان تقيس عليها الجديده و انا غيرتهم عشان غلطت و خرطت الطنبوره القديمه ساعة لما غيرت التيل الخلفى ﻷنها كانت وحشه و الفرامل كانت خفيفه جدا و ظبطت احسن مع الجديده لكن برضه محتاج اظبطها اكتر مع ال abs

**douha_wise** · 23-02-2014 12:00 PM

المشاركة الأصلية كتبت بواسطة askarfeps84

شكرا جزيلا لحضرتك أخي العزيز على افادتك ليا باستمرار وشكرا لإستاذ أحمد كثيرا ولكل اعضاء المنتدى
وسؤالي لماذا لم تشتري الطنابير ماركة Fibe كما قلت فى موضوع سابق اثناء شرائك للتيل الخلفي؟

كويس جدا انك اخذت بالك انا عمال اقول على الله محدش يأخذ باله ههههههه
لما رحت لفتح الباب وجدت البائع غير كلامه و قالى الموجود نوع اسمه topran و نوع تانى مش فاكر اسمه و السعر كما قلت 350 و بصراحه معجبنيش الموضوع ففضلت الاستيراد و ساعة لما اشتريت التيل الخلفى قلت يمكن لما اخرط الطنابير تتظبط الدنيا فوجدتها محتاجه تغيير و بس يا سيدى هو ده الموضوع