الموضوع: تقرير عن صيانة ال 2500 بيجو 301 توكيل مرغم و سؤال للاستاذ احمد امين

السلام عليكم حبيت اوضح لرجالة البيجو و خصوصا رجالة الاسكندرية تقرير بسيط حول صيانة ال 2500 النهاردة فى توكيل مرغم :

اولا انطباعى الاول عن التوكيل انه سئ جدا و مايلقشى انه يكون توكيل البيجو الرئيسى اللى فى اسكندرية كلها يبقى بالمنظر ده

انا روحت الساعة 10 صباحا و كنت حاجز من اسبوع فات المهم استقبلنى المهندس و اخد بيانات العربية من الرخصة و قلتله على ملاحظاتى كلها عن العربية و انا كنت مجهزها فى ورقة و كانت كالتالى :

* نتشة بسيطة من الاول و الثانى ( ودى ماكنتشى مزعلانى اصلا )
* استهلاك البنزين عالى و ريحة العادم نفاذه و خصوصا فى مكان مقفول
* صوت دبة او طقة فى الناحية اليمين مع المطبات الغويطة
* قلتلهم على ملاحظة ان ساعات لما بدوس فرامل براحة بحس ان العربية بتزحف شويه لحد ما تلحقها بدوسة جامدة و ساعتها بتمسك تمام
* صوت تسقيفة عند الكبس على النقلة زى صوت كهربا زيادة فى العربية

المهم المهندس اخد العربية و فين و فين على الساعة 1 قالى ربطنا العفشة و كانت فعلا محتاجة تربيط قالتله تمام طيب نطلع نجرب المهم اول مطب و انا طالع بجرب سمعت صوت الدبة المهم الراجل اللى اشتغل فى العربية كان معايا قالى ما سمعتهاش المهم دخلنا شوارع مخدخة انى اسمع الصوت مافيش المهم بعد مع العربية استلمتها و مشيت سمعت صوت الدبة تانى مافيش حاجة اتغيرت و المهندس قالى لو سمعتها ابقى تعالى تانى و احنا نشوف .

المهم المهندس لقيته بيقولى خلاص قولتله طيب و السوفت وير مش فاهم خلاص ايه فقالى اصل السبت و الاحد التوكيل الرئيسى اللى فى فرنسا قافل و ده االلى باخد منه السوفت الوير الجديد قلتله نعم هو حضرتك بتكلم تلميذ و لا ايه ازاى يعنى المفروض السوفت وير ده يبقى عندكم و تنزلوه عالطول المهم طلع مش عارف فين و قالى الحمد لله لقيت فلاشة و دخلت على النت و جبت السوفت وير الجديد 2014 من الشركة الام فى فرنسا و حانزلهوللك قالتله على فكرة انا اتخنقت من 10 لحد 1.30 و يدوبك تربيط عفشة و ياريت الصوت بتاع الدبة ده راح المهم نزل السوفت وير الجديد و غسلوا العربية و مشيت بعد لما قلت للمهندس بصراحة انت مالكش ذنب لكن المكان مش لايق خالص لتوكيل بحجم و اسم بيجو و العدد للناس اللى شغالة قليل جدا و مافيش نظام و الاستراحة مقرفة تماما

بعد لما مشيت اللى حسيت بيه فعلا بما يرضى الله عز و جل ان النتشة بتاعة الفتيس قلت كتير مع انها ماكنتشى مزعلانى اصلا و السحب اول و تانى بقى احسن كتير بس صوت الدبة زى ما هيا و ملاحظة الفرامل ده زى ما هيا العفشة بعد التربيط بقت افضل كتير من حيث المطبات تحس ان العربية مسكت نفسها فى المطبات بس صوت الدبة زى ما هو لا جديد .

السؤال للاستاذ احمد امين ؟

اولا: ايه يا ترى ممكن يكون صوت الدبة اللى انا بسمعها يا اما مع المطبات الغويطة و ساعات لما ببقى طالع فوق مطب صناعى اول ما المس المطب بالكاوتش بسمع الصوت ده ؟

ثانيا: ايه سبب الزحفة دى فى الفرامل و على فكرة نفس اللى انا بشتكى منه لقيت واحد النهارده برده فى التوكيل و عامل 7000 كيلو و عنده صوت الدبة ده و ملاحظة زحف الفرامل ؟

ثالثا: المهندس قالى ان صوت التسقيف ده من البنزين قلتله طيب انا بقالى فترة طويلة بسمع الصوت ده يعنى مش تفويله واحده قالى البنزين ساعات بيبقى فيه شوائب و هو اللى بيعمل كده جرب تحط مرة كده كل ست شهور ربع التنك بنزين 95 لانه حامى و بيقضى على الشوائب الموجوده ده فهل الكلام ده صح و لا افتكاسة ؟
انا اسف طولت عليكم جدا بس قولت انقل تجربتى لرجاله بيجو و خصوصا رجالة اسكندرية و على فكرة المهندس قالى انهم بيرتبوا فرع للتوكيل انظف و احسن و حايبقى فى سموحة و ممكن يخلص بعد 6 شهور تقريبا شكرا لحضراتكم ومعلشى دوشتكم

استهلاك البنزين اتظبط طيب ولا لسة عالي؟